„ნაპოლის“ მთავარმა მწვრთნელმა რუდი გარსიამ „ბრაგასთან“ მოგებული შეხვედრის შემდეგ კომენტარი გააკეთა და ხვიჩა კვარაცხელიაზეც ისაუბრა.
„კვარამ კარგი რაღაცები გააკეთა, პირველ გოლში მისი წვლილიც იყო. თამაშის რიტმი ცოტა აკლია, რადგან მოსამზადებელ ეტაპზე ტრავმა მიიღო, პირველი მატჩი გამოტოვა, მეორე სათადარიგო სკამიდან დაიწყო. ბოლო სამი თამაში დაიწყო ძირითადში, მაგრამ სეზონის სტარტზე მიღებული მცირე ტრავმის გამო, ბრწყინვალების დასაბრუნებლად ცოტა მეტი სათამაშო დრო სჭირდება“, – განაცხადა რუდი გარსიამ.
ხვიჩა კვარაცხელიას უგოლო სერია 19 მარტიდან იწყება. მიმდინარე სეზონში მან ოთხ მატჩში თავი 1 საგოლე პასით გამოიჩინა. „ნაპოლი“ მომდევნო მატჩს 24 სექტემბერს, „ბოლონიასთან“ გამართავს.
„ბრაგასთან“ ჩატარებული მატჩის შემდეგ, იტალიური მედიისგან ხვიჩას, სამწუხაროდ, დაბალქულიანი შეფასებები ერგო:
Calcionapoli1926 – 6 ქულა: „ეს სწორი გზაა! მეტოქეებს ფლანგზე პრობლემები შეუქმნა, მაგრამ უნდა ითქვას, რომ ბრწყინვალება და შეტევის დასკვნით ფაზაში სიზუსტე უნდა დაიბრუნოს“.
Calciomercato.it – 4.5 ქულა: „პირველი ხიფათი ნახევარი საათის თავზე შექმნა და მორჩა. მძიმე იმედგაცრუება“.
Tuttomercatoweb 5 – ქულა: „მორიგი მატჩი უგოლოდ. ეძებს სწორ თამაშს, რაც არასდროს გამოდის. გოლზე მეტად მას აკლია სიმშვიდე, სურს გადამწყვეტი იყოს და არათანმიმდევრულად მოქმედებს“.
Tuttonapoli – 5.5 ქულა: „მორიგი იმედგამაცრუებელი თამაში. პირველი ტაიმის მიწურულს მოუმატა, რასაც მოჰყვა ჯერ გაუქმებული პენალტის მომენტი, მერე კი ოსიმენის თავური და დი ლორენცოს გოლი. მეორე ტაიმში მეტ მოქმედებას იღებს საკუთარ თავზე, თუმცა, ერთხელ ბურთი მთებისკენ გაგზავნა და შეცვალეს“.
Mediaset – 5.5 ქულა: „რამდენჯერმე კლასი გამოავლინა, მაგრამ ბევრი შეცდომაც დაუშვა და ისეთი შეგრძნებაა, რომ გარსიას 11-ეულში ჯერ კიდევ ცოტათი თავს უცხოდ გრძნობს. პირველი გოლი მისი პასით გავიდა, თუმცა, ეს არ იყო საკმარისი თუნდაც საშუალო შეფასებისთვის. გარემარბი, რომელმაც ერთი წლის წინ სერია A-ს ნახევარი და ნახევარი ევროპა გააგიჟა, ჯერ კიდევ არ ჩანს“.
ვეტერანმა იტალიელმა ფეხბურთელმა ანტონიო კასანომ კი „ნაპოლის“ შესახებ კიდევ ერთხელ ისაუბრა და აღნიშნა, რომ რუდი გარსიას ორი პრობლემა აქვს – სტანისლავ ლობოტკა და ხვიჩა კვარაცხელია.
„მე არ ვარ გენიოსი, მაგრამ პირველივე დღიდან ვამბობ იმას, რასაც ვფიქრობ. „ნაპოლის“ არც თავი აქვს და არც ბოლო, უჭირს, იდეების გარეშეა. დიდი დაბნეულობაა ფეხბურთელებში იმის გამო, რის გაკეთებასაც მწვრთნელი მათ აიძულებს. სპალეტი გენიოსი იყო, გარსია ყოჩაღი პერსონაა, მაგრამ სპალეტისთან საერთო არაფერი აქვს, დაცვაში უჭირთ, არ იციან, ბურთით რა გააკეთონ. ორი რეალური პრობლემაა: ლობოტკა შეიძლება ბევრჯერ ეხება ბურთს, მაგრამ თუ არ იცი, ბურთით რა გააკეთო, რა აზრი აქვს? გარსიამ ეს პრობლემა მიიღო, მანამდე „ნაპოლი“ გიჟურად თამაშობდა. მეორე პრობლემაა – კვარაცხელია. გენუაში ის მარჯვნივაც თამაშობდა, 10 წუთი მარცხენა ფლანგზე არავინ იყო, მას ასეთი რეაქცია სპალეტისთან არასდროს ექნებოდა. ასე რომ, ფეხბურთელები ანარქიულები არიან, დაბნეულები. „ნაპოლის“ გარსიასთან ერთად უჭირს, მაგრამ კონტეს თუ დანიშნავენ, გუნდი ისევ ათამაშდება, რადგან ფეხბურთელები ძლიერები არიან. მანამდე ნახავთ, რომ გარსია ლობოტკას სკამზე დასვამს კაიუსტეს გამო და 4-2-3-1 სქემით თამაშს დაიწყებს“, – განაცხადა ანტონიო კასანომ.
გუშინ, „ფროზინონეს“ მთავარმა მწვრთნელმა ეუსებიო დი ფრანჩესკომ „სერია A“-ს მე-5 ტურის მატჩის წინ პრესკონფერენცია გამართა, სადაც გუნდის ქართველ შემტევ გიორგი კვერნაძეზეც ისაუბრა.
20 წლის ქართველი ფეხბურთელი „ფროზინონეს“ ზაფხულში შეუერთდა და მისი მაისურით იტალიის თასისა და ჩემპიონატის თითო მატჩში ითამაშა. გიორგი „პიზასთანაც“ (1:0) და „ნაპოლისთანაც“ (1:3) მოედანზე ცვლილებაზე შევიდა.
„ის ორი კვირით ნაკრებში იყო წასული, რომლის მაისურით ითამაშა კიდეც. ის ბრწყინვალე ფიზიკურ ფორმაში მყოფი დაგვიბრუნდა, მომავალი მატჩისთვის შემადგენლობაში გვყავს და ჩვენთვის ერთ-ერთი ვარიანტია. ის ნიჭიერი ფეხბურთელია, მაგრამ ზრდა უნდა გააგრძელოს. ის ახლა უკეთესად მუშაობს, ვიდრე მაშინ, როდესაც ჩვენთან მოვიდა“, – ასეთია ეუსებიო დი ფრანჩესკოს აზრი გიორგი კვერნაძის შესახებ.
ავტორი
