რამდენიმე დღეში, 28 მარტს, საქართველოს ეროვნული გუნდი ევროპის ჩემპიონატის პირველ საკვალიფიკაციო შეხვედრაში, ბათუმში, ნორვეგიის ნაკრებს დაუპირისპირდება.
საინტერესოა რომ სტუმარი გუნდის შემადგენლობაში „ნაპოლის“ მოთამაშე ლეო ოსტიგორიც ირიცხება და დიდი ალბათობით ორ „ნეაპოლელს“ – ხვიჩასა და ლეოს ერთმანეთის წინააღმდეგ თამაში მოუწევთ.
გუშინ ლეო ოსტიგორი ნორვეგიულ მედიას ესაუბრა და როგორ იქნებოდა „ნაპოლის“ შესახებ რამდენიმე სიტყვა არ ეთქვა:
„როდესაც შენს კლუბში ბევრი სათამაშო დრო არ გაქვს, ბუნებრივია, რომ ნაკრების მთავარი მწვრთნელის არჩევანში კითხვის ნიშნებს ბადებს. ეს მშვენივრად მესმის, მაგრამ მიუხედავად იმისა, რომ „ნაპოლიში“ ბევრი სათამაშო დრო არ მქონია, თავს კარგად ვგრძნობ. გარწმუნებთ, რომ ვარჯიშებზე, ყოველდღე, ოსიმენისა და კვარაცხელიას მეურვეობა თამაშის ტოლფასია“.
გუშინ, ესპანელმა საფეხბურთო აგენტმა პაბლო სეიხასმა ადგილობრივ მასმედიასთან ხვიჩა კვარაცხელიაზე ისაუბრა. მისი მტკიცებით, თავის დროზე შეიძლებოდა ქართველი ფეხბურთელი ესპანეთის „ლა ლიგაში“ გადასულიყო.
„იყო ლაპარაკი „ვალენსიაზე“, „ლევანტესა“ და „სევილიაზე“, დაახლოებითი 6 მილიონ ევროზე. „სევილია“ გახლდათ კლუბი, რომელიც კვარაცხელიას შეძენასთან ყველაზე ახლოს გახლდათ, მაგრამ მონჩიმ უარი თქვა. მათ ვერ გათვალეს, როგორი ფეხბურთელი შეიძლებოდა გამხდარიყო. ახლა ის 100 მილიონი ევრო ღირს. კვარას შეუძლია კარგად ითამაშოს მადრიდის „რეალში“ ან „ბარსელონაში“, მაგრამ ვფიქრობ, რომ პრემიერლიგაში გადავა, რადგან მხოლოდ ინგლისურ კლუბებს შეუძლიათ ასეთი თანხის გადახდა“.
გუშინ, ხვიჩა კვარაცხელიაზე ცნობილმა იტალიელმა სპორტულმა ჟურნალისტმა და რეპორტიორმა ფაბრიციო რომანომაც ისაუბრა. რომანო აცხადებს, რომ ნაპოლის 22 წლის ქართველი შემტევის მიმართ „პარი სენ-ჟერმენის“ დაინტერესების შესახებ გავრცელებული ინფორმაცია სიმართლეს არ შეეფერება.
„ამ ეტაპზე, „პარი სენ-ჟერმენსა“ და ხვიჩა კვარაცხელიას შორის რაიმე კონტაქტის თაობაზე ჩემთვის არაფერია ცნობილი. მათ ისიც კი არ იციან, ვინ იქნება მომავალ სეზონში გუნდის მთავარი მწვრთნელი. ამასთან, თუკი კილიან მბაპე მარცხნივ ითამაშებს, როგორ იქნება კვარაცხელიას საკითხი, რომელიც სწორედ ამ ფლანგზე გამოდის?!
არის უამრავი დაინტერესებული კლუბი, მაგრამ ახლა კონკრეტული არაფერია. დაივიწყეთ კვარაცხელიაზე მოლაპარაკებები მარტში, აპრილსა და მაისში, რადგან „ნაპოლი“ ახლა მხოლოდ სეზონის მეორე ნაწილზეა კონცენტრირებული და ზაფხულამდე ნამდვილად არაფერი მოხდება“.
გუშინ, „სან ანტონიო სპურსის“ ლეგენდარულმა მთავარმა მწვრთნელმა გრეგ პოპოვიჩმა კიდევ ერთხელ ისაუბრა სანდრო მამუკელაშვილის შესახებ კიდევ ერთხელ ისაუბრა:
„მასში ყველაფერი მომწონს, უბრალოდ, ზოგჯერ ცოტა სიმშვიდისკენ მოვუწოდებ ხოლმე, რადგანაც ზედმეტ დაძაბულობას ვამჩნევ. მამუს იუმორის ჩინებული გრძნობა აქვს და ესეც არის მიზეზი, რომ მაგარი ბიჭია. მასთან ერთად გატარებული ყოველი წუთი მსიამოვნებს და ეს, გადაჭარბებული ნათქვამი ნამდვილად არაა“, – განაცხადა გრეგ პოპოვიჩმა.
სასიხარულოა, რომ სანდრომ სახელოვანი მწვრთნელის ნდობა ასე მოკლე პერიოდში მოიპოვა. „სან ანტონიომ“ სანდრო მიმდინარე წლის 3 მარტს სტანდარტული კონტრაქტით აიყვანა. მეტი ამ ხელშეკრულებაზე არ თქმულა, თუმცა ამერიკულ მედიაში გაჟონა ინფორმაციამ, რომ კლუბმა ქართველ კალათბურთელს ერთწლიანი კონტრაქტი (357 717 დოლარი) გაუფორმა და ეს ხელფასი გარანტირებულია.
ერთწლიანი კონტრაქტი ეწოდება, მაგრამ, ბუნებრივია, მისი ვადა სეზონის ბოლომდეა. მამუკელაშვილი ზაფხულში თავისუფალი აგენტი გახდება და იმ შემთხვევაში, თუ „სან ანტონიოს“ მისი დატოვება მოესურვება, კონტრაქტი სეზონში 2.2 მილიონიდან და ზემოთ უნდა შესთავაზოს.
გუშინ, „სან ანტონიო“ სტუმრად სანდრო მამაუკელაშვილის ყოფილ კლუბს, „მილუოკის“ დაუპირისპირდა დავ დამარცხდა – 94:130. როგორც მოსალოდნელი იყო ქართველს მილუოკიში ძალიან თბილი დახვედრა მოუწყვეს – ყოფილმა თანაგუნდელებმაც და „ბაქსის“ გულშემატკივრებმაც.
ყოფილი გუნდის წინააღმდეგ მამუკელაშვილმა 27:43 წუთი ითამაშა. მის ანგარიშზე 12 ქულაა – მან 13-დან 6 ორქულიანი ჩააგდო. სამქულიანი 4-ჯერ ისროლა და ყველა არაზუსტად. ასევე 7 მოხსნაც ჰქონდა, პლუს 2 დაფარება, ბურთი კი ერთხელ დაკარგა.
გუშინ, უკრაინის ნაკრების მთავარი მწვრთნელის მოვალეობის შემსრულებელმა, რუსლან როტანმა, გააკრიტიკა ქვეყნები, რომლებიც რუსეთის ნაკრებთან ამხანაგურ მატჩებს თანხმდებიან.
„ის ქვეყნები, რომლებიც თანხმდებიან ითამაშონ აგრესორ ქვეყანასთან, მხარს უჭერენ მათ ქმედებას უკრაინაში. ყველაზე კარგი, რაც შეგვიძლია გავაკეთოთ არის მათთან თამაშის იგნორირება. ისინი არ იმსახურებენ ურთიერთობას.
ქვეყნებმა, რომლებიც პატივს სცემენ საერთაშორისო ნორმებს და განსაკუთრებით ადამიანებს, უნდა უარყონ ისინი, ვინც რუსეთს ეთამაშება, არც კი იფიქროთ მათზე“, – განაცხადა რუსლან როტანმა.
ავტორი
