ლანჩხუთის საკრებულოს წევრი „ევროპული საქართველოდან“ ამირან გიგინეიშვილი მიიჩნევს, რომ მის მიმართ ადგილი აქვს პოლიტიკურ შევიწროებას და ამ თემაზე ბრიფინგიც გამართა.
„გურიაში ევროკავშირის მიერ დაფინანსებული პროექტი ხორციელდება, რომელიც რეგიონში ტურიზმის განვითარებაზეა მიმართული. საგრანტო თანხა ცალკ-ცალკე მუნიციპალიტეტებს უნდა გაეცათ. ლანჩხუთში ათზე მეტი განაცხადი შევიდა, მათ შორის _ ჩემიც, რომელიც ეხებოდა გრიგოლეთის ბალნეოლოგიურ კურორტად გამოცხადებას. როგორც ვიცი, ეს 99%-ითაა შესაძლებელი. ამისთვის კი საჭირო იყო პლაჟის შესწავლა. შეთანხმებული ვიყავი კონკრეტულ მეცნიერთანაც, უნდა მომხდარიყო პლაჟის მაგნიტური აგეგმვის საველე სამუშაოების ორგანიზება, ქვიშის ანათლების მაგნიტური ლაბორატორიული კვლევა, გრიგოლეთის პლაჟის მაგნიტური რუკის შედგენა და ასე შემდეგ… ეს ყველაფერი კი მიზნად ისახავდა გრიგოლეთის ტურისტული პოტენციალის მნიშვნელოვანი ზრდის ხელშეწყობას. შესაბამისად, გაუმჯობესდებოდა გრიგოლეთისა და მიმდებარე სოფლების მოსახლეობის საცხოვრებელი პირობები, გაიზრდებოდა საბიუჯეტო შემოსავლები და გაჩნდებოდა ტურიზმის განვითარებისა და დაგეგმვის ახალ შესაძლებლობები“, _ აღნიშნა ბრიფინგზე გიგინეიშვილმა და დასძინა, რომ კომისიაში ლანჩხუთთან დაკავშირებულ პროექტებთან მიმართებაში გადამწყვეტი სიტყვა მერს, ალექსანდრე სარიშვილს ეთქმის და ჩვენი მუნიციპალიტეტის ტურიზმის განვითარებისთვის პრიორიტეტული პროექტი მას უნდა შეერჩია.
„ეს პროექტი ჩავარდა და ამ ჩავარდნაში, ვფიქრობ, ჩემი პოლიტიკური ორიენტაციაა მნიშვნელოვანი და არა პროექტის შინაარსი. ამ დღეებში გასაჯაროვდება გამარჯვებული პროექტები და ყველას შეუძლია შეადაროს მასშტაბები, თუნდაც, ნინოშვილის სახლ-მუზეუმის ფანჩატურსა და ჩემს პროექტს შორის. შეიძლება ვინმემ თქვას, გრიგოლეთის სასტუმროებმა დააფინანსოს მაგნიტური ქვიის კვლევაო. ჯერ ერთი, ეს სახელმწიფოს ფუნქციაა, მეორეც სასტუმროების პლაჟთან მიმართება სულ 110 მეტრია და ეს არაა გრიგოლეთის პლაჟის სიგრძე, რომელიც 2კმ-ზე მეტია. აუცილებლად გავაგრძელებ დონორის მოძიებას და ლანჩუთის ერთადერთი პლაჟის სიმდიდრეს მაინც დავაფიქსირებთ“, _ ითქვა „ევროპული საქართველოს“ პარტიულ ოფისში გამართულ ბრიფინგზე.
გიგინეიშვილმა აღნიშნა, რომ რამდენიმე ადამიანს პირადად დაეხმარა ამ მცირე გრანტების მოპოვების დროს და პროექტი დააწერინა:
„წარმოიდგინეთ, ყველა მათგანი დააფინანსეს, ის პროექტი კი, რომელსაც ხელს მე ვაწერდი, დაბლოკეს“.
გიგინეიშვილის მხრიდან გამოთქმულ ბრალდებებს არ ეთანხმება ალექსანდრე სარიშვილი, რომელიც საკმაოდ მოკლე კომენტარით შემოიფარგა.
„მე არავინ დამიბლოკია, შეგიძლიათ, თავად ამირანს ჰკითხოთ ახლა და ნახავთ, რას გეტყვით“, _ გვითხრა მერმა.
გიგინეიშვილთან კომუნიკაცია „გურია ნიუსს“ სარიშვილთან საუბრის შემდეგაც გვქონდა, თუმცა, მან ამჯერადაც იგივე გაიმეორა, რაც ბრიფინგზე ითქვა.
