სეზონური გრიპი, გრიპის A და B ვირუსით გამოწვეული მწვავე ინფექციური დაავადებაა. მისი სიპმტომების შესახებ ჯერ კიდევ 2 400 წლის წინ ჰიპოკრატე საუბრობდა.
2018 წელს ე.წ. „ესპანური გრიპის“ ეპიდემიიდან 100 წელი სრულდება.
wikipedia-ს ცნობით, „ესპანურ გრიპს“, რომელიც 1918-1920 წლებში მთელი მსოფლიოს მასშტაბით მძვინვარებდა, სავარაუდოდ, მოსახლეობის 5% ემსხვერპლა, რომელთაგან 25 მილიონი ადამიანი, ვირუსის შედეგად პირველ 25 კვირაში დაიღუპა, როდესაც აივ ინფექციით, 25 მილიონი ადამიანი, 25 წლის განმავლობაში იღუპება.
ჯანდაცვის მსოფლიო ორგანიზაციის ინფორმაციით, გრიპს სეზონურს უწოდებენ, რადგან წელიწადის ცივ დროს, ზამთარში ვრცელდება.
მათივე ცნობით, მსოფლიოში გრიპის ვირუსით, რომელიც ადამიანიდან ადამიანს გადაეცემა ხველით, ცემინებით ან ვირუსით დაბინძურებულ საგნებთან შეხებით, ყოველწლიურად 650 000 ადამიანი იღუპება. დაღუპულების 20% ბავშვები, ხოლო 10 % ზრდასრულები არიან, რომელთაც გრიპის ვირუსის საწინააღმდეგო ვაქცინა ჩატარებული არ აქვთ.
როგორ უნდა დაიცვან ადამიანებმა თავი გრიპის ვირუსის შეყრისგან, რა სიმპტომებით ვლინდება გრიპი, რა რეკომენდაციები არსებობს ვირუსის გართულების თავიდან ასაცილებლად და არის თუ არა გრიპის ვირუსი ამ დროისთვის საქართველოში დაფიქსირებული_ამ საკითხებზე „გურია ნიუსი“ დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსს, ხათუნა ზახაშვილს ესაუბრა.
როგორც ზახაშვილი ამბობს, ადამიანებს თავისა და კუნთების ტკივილი, სურდო, ხველა, სიცხე, ხშირად გაციებაში ერევათ და არ ფიქრობენ, რომ შესაძლოა გრიპის ვირუსი ჰქონდეთ.
„გრიპის დროს სიმპტომები უფრო მძიმედ არის გამოხატული, ვიდრე ჩვეულებრივი გაციების შემთხვევაში. თუმცა, გრიპიც შეიძლება მიმდინარეობდეს მსუბუქად და ძალიან შემაწუხებელი არ იყოს. ადამიანი თავს შეუძლოდ გრძნობს და არ ფიქრობს, რომ შესაძლოა გრიპი ჰქონდეს“,_ამბობს ზახაშვილი.
დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსი მოქალაქეებს გრიპისგან თავის დასაცავად ვაქცინის გაკეთებას, ხოლო დაავადების გართულების თავიდან აცილებისთვის ექიმისთვის დროულ მიმართვას ურჩევს.
„იმისთვის, რომ გრიპი არ დაემართოს ადამიანს, არსებობს გრიპის საწინააღმდეგო ვაქცინაცია. თუ ადამიანი იტარებს სეზონური გრიპის საწინააღმდეგო ვაქცინაციას ძალიან მაღალი ალბათობით, მას ზამთრის მანძილზე გრიპი არ დაემართება და გადარჩება ამ საშიში დაავადებისგან. იმ შემთხვევაში, თუ გრიპი დაემართა, მაშინ გართულებისგან უნდა დაიცვას თავი. ამისთვის აუცილებელია დარჩეს სახლში, დაიცვას წოლითი რეჟიმი, მიიღოს დიდი რაოდენობით სითხე, მიიღოს ტკივილგამაყუჩებელი, სიცხის დამწევი პრეპარატები, მაგრამ თუ შენიშნავს, რომ სიმპტომები არის მძიმე ან მძიმდება, მნიშვნელოვანია, რომ მიმართოს ექიმს და დროულად მიიღოს სპეციალიზირებული სამედიცინო დახმარება“, _ამბობს ის.
როგორც ზახაშვილი „გურია ნიუსთან“ საუბარში აღნიშნავს, ადამიანებს გრიპი 7 დღეში გადააქვთ, თუმცა, იშვიათად, ლეტალური შედეგიც დგება.
„გრიპით დაავადება, სამწუხაროდ, ისეთი თავისებურებაა, რომ ძირითადი უმრავლესობა გრიპს გადაიტანს და 7 დღის თავზე დაიწყება გაუმჯობესება ადამიანის, ზოგ შემთხვევებში ადამიანებს სჭირდებათ სპეციალიზირებული დახმარება, რაც საავადმყოფოებში ხდება და იშვიათ შემთხვევებში ლეტალურადაც მთავრდება ანუ სიკვდილით. ამიტომ გრიპი სახუმარო დაავადება არ არის“,_ამბობს ზახაშვილი.
დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსის თქმით, საქართველოში ჯერ გრიპის ვირუსი არ ფიქსირდება, მისი ფართო გავრცელება დეკემბრის ბოლოდან არის მოსალოდნელი, თუმცა, ჯერ იმის განსაზღვრა როგორი იქნება სეზონი, შეუძლებელია.
„ჯერჯერობით, გრიპის ვირუსები საქართველოში არ ჩანს. ევროპაში ფიქსირდება თუმცა, ფართოდ გავრცელებული არ არის. ალბათ მომავალ ერთ თვეში უფრო ფართოდ გავრცელდება და როგორც წესი, დეკემბრის ბოლოს, იანვრის დასაწყისში გამოჩნდება ხოლმე ჯგუფური შემთხვევების სახით გრიპის გავრცელება. თუმცა, რამდენად მძიმე იქნება სეზონი დამოკიდებულია იმაზე, რამდენი ადამიანი ჩაიტარებს ვაქცინას და რომელი შტამი იქნება დომინანტური სეზონის მანძილზე, რომლის წინასწარ პროგნოზირება არ ხდება და მიმდინარეობს ყოველკვირეული მონიტორინგი და განახლებული ინფორმაცია თავსდება დაავადებათა კონტროლის ეროვნული ცენტრის გვერდზე“,_ამბობს ზახაშვილი.
