გუშინ, გორში, ძიუდოს ჩემპიონთა ლიგის ტურნირი მიმდინარეობდა, სადაც გურამ თუშიშვილმა ლეგენდარული ფრანგი ძიუდოისტი ტედი რინერი დაამარცხა.
მეოთხედფინალში ერთმანეთს თბილისის „მებრძოლი“ ფრანგულ „პარი სენ ჟერმენს“ შეხვდა და ქართველების კლუბმა მეტოქე 4:1 დაამარცხა, რის შედეგადაც ნახევარფინალში გასვლა მოახერხა.
90 კილოგრამ წონით კატეგორიაში თუშიშვილმა რინერს ბოლო ათ წამში ვაზარი აუღო და 10 გზის მსოფლიოს, 5 გზის ევროპისა და 2-გზის ოლიმპიური ჩემპიონი ისტორიაში პირველად დაამარცხა.
ჩემპიონთა ლიგის ფინალში ერთმანეთს ქართული კლუბი – „მებრძოლი“ და სერბული „ცრვენა ზვეზდა“ შეხვდნენ.
ჩვენმა ფალავნებმა 3:2 მოიგეს და ტურნირის გამარჯვებულები გახდნენ. თავიანთი ორთაბრძოლები მოიგეს ტატო გრიგალაშვილმა, გურამ თუშიშვილმა და ბაგრატ ნინიაშვილმა.
რაც შეეხება მედლებისთვის მებრძოლ მეორე ქართულ კლუბს, „გოლდენ გორს“, მან ბრინჯაოსთვის კიდევ ერთი ქართული კლუბი, ახალგაზრდებით დაკომპლექტებული „არეა“ დაამარცხა 3:2.
გუშინ, ხვიჩა კვარაცხელიას შესახებ ჟურნალისტმა ჯოვანი სკოტომ ისაუბრა. მისი მტკიცებით, „ნაპოლი“ ქართველთან ხელშეკრულებას ერთი წლით განაახლებს, ხელფასი კი, რომელიც ახლა წელიწადში 1.2 მილიონ ევროს შეადგენს, როგორც მინიმუმ გაორმაგდება.
„კვარაცხელიასთან კონტრაქტი ერთი წლით განახლდება, მინიმუმ გაორმაგებული ხელფასით, მაგრამ ბონუსებიც მზადაა, რომელსაც სეზონის ბოლოს ან შეიძლება მანამდე მიიღებს“, – აღნიშნა სკოტომ.
გუშინ „ნაპოლის“ ადამა ტრაორე დაუკავშირეს. ნეაპოლელები ესპანელი ფეხბურთელის დამატებას მომავალი წლის ზაფხულში ეცდებიან.
ტრაორეს ინგლისურ „ვულვერჰემპტონთან“ კონტრაქტი 2024 წელს ეწურება და კლუბის შეცვლა უნდა, ვინაიდან კონტრაქტს ვადა გასდის, ნეაპოლელები იმედოვნებენ, რომ მის გადაბირებას სიმბოლურ ფასში, 5 მილიონ ევროზე ნაკლებად შეძლებენ.
ადამა ტრაორე „ვულვზის“ წევრი 2018 წლიდანაა და 168 მატჩში 13 გოლი აქვს გატანილი. მას ასევე უთამაშია „ბარსელონაში“, „ასტონ ვილასა“ და „მიდლსბროში“.
გუშინ ცნობილი გახდა, რომ 2023 წლის მსოფლიო თასის წინ, საქართველოს მორაგბეთა ეროვნულმა ნაკრებმა ერთ-ერთი მოსამზადებელი მატჩი შესაძლოა ფიჯისთან გამართოს.
ფიჯის მსოფლიო თასის დაწყებამდე ხუთი ტესტის ჩატარება სურს და მეტოქეთა შორის, საქართველოს გარდა, საფრანგეთს, ინგლისს, იაპონიასა და სამოას მოიაზრებენ.
დღეს არსებული ინფორმაციით, ფიჯელები ინგლისელებსა და ფრანგებს, სტუმრად, შესაბამისად, 19 და 26 აგვისტოს ეთამაშებიან, დანარჩენი ტესტების თარიღები კი, ჯერჯერობით, დასაზუსტებელია.
საინტერესოა, რომ ფიჯი და საქართველო მომავალ მსოფლიო თასზე ერთ ჯგუფში მოხვდნენ.
როგორც ცნობილია გლეიზერების ოჯახი „მანჩესტერ იუნაიტედს“ ყიდის. გავრცელდა ცნობა რომ გუნდის შეძენით დევიდ ბექჰემიცაა დაინტერესებული..
გუშინ ინგლისურ მედიაში კიდევ ერთხელ გაიჟღერა ბექჰემის გვარმა. აღმოჩნდა რომ ყოფილი ფეხბურთელი პოტენციურ ინვესტორებთან მოლაპარაკებებს „მანჩესტერ იუნაიტედის“ შესყიდვასთან დაკავშირებით უკვე აწარმოებს. გლეიზერები კლუბს შვიდ მილიარდ გირვანქა სტერლინგად აფასებენ, ამ საფასურის გადახდა კი ბექჰემს არ შეუძლია, მაგრამ წყაროს თანახმად, დევიდი დამატებითი ინვესტორებით ეცდება კლუბის საკონტროლო პაკეტის შესყიდვას.
„მანჩესტერ იუნაიტედის“ გულშემატკივრებში 47 წლის დევიდ ბექჰემი დიდი პოპულარობით სარგებლობს, რამაც შეიძლება გარიგებაში გადამწყვეტი როლი შეასრულოს. ბექჰემი „მანჩესტერ იუნაიტედში“ 1992-2003 წლებში თამაშობდა და 394 შეხვედრაში 85 გოლი გაიტანა. კარიერის განმავლობაში დევიდმა მადრიდის „რეალის“, „ლოს ანჯელეს გელექსის“, „მილანისა“ და „პსჟ“-ს რიგებში ითამაშა.
გუშინ, ბრაზილიის ნაკრების მცველმა, დანი ალვეშმა, განაცხადა, რომ „პარი სენ-ჟერმენში“ მესი და ნეიმარი უკეთესი მოთამაშწეები არიან ვიდრე კილიან მბაპე.
„დიდ ფეხბურთელს ყოველთვის უნდა ესმოდეს და გრძნობდეს, ვინ არის გვერდით. პარტნიორებს შეუძლიათ შენი თამაშის გაუმჯობესება. მბაპე ფენომენია, მაგრამ დღემდე ვერ მიხვდა ვინ თამაშობს მის გვერდით, უფრო ფენომენალურები, ვიდრე თავად ფრანგია. ნეიმარი და მესი უნიკალურები არიან. ისინი ხედავენ და აკეთებენ იმას, რაც არავის შეუძლია და თუ ჭკვიანი მოთამაშე ხართ, მათი გენიალურობა უნდა გამოიყენოთ. მიმაჩნია, რომ ბურთს კარგად ვფლობ, მაგრამ როცა ლეოსთან ერთად ვთამაშობდი, ბურთს მას ვაწვდიდი. იგივე ხდებოდა როცა ნეიმარი იყო ჩემი პარტნიორი. თუ მბაპე ამ ორს პასებს მისცემს, 150 გოლს გაიტანს.“ – განაცხადა დანი ალვეშმა.
ამაჟამად 39 წლის ალვეშს თავის დროზე მესისთან ერთად „ბარსელონაში“ უთამაშია, ნეიმარისა და მბაპეს მხარდამხარ კი „პარი-სენ-ჟერმენში.
ავტორი
