“გურია” _ ასე ჰქვია ლიტერატურულ-მუსიკალურ კომპოზიციას, რომელიც ფესტივალ “აღდგომიდან ამაღლებამდე” ფარგლებში, საქართველოს პარლამენტის ეროვნულ ბიბლიოთეკაში 10 მაისს შედგა.
ღონისძიებაზე წარმოდგენილი იყო ირაკლი მახარაძის გამოფენა – “გურულები”; გრიგოლ ტატიშვილის ჩართული ანბანის გამოფენა; ლევან კოღუაშვილისა და გიორგი კეკელიძის ფილმის “თხილი” ტრეილერის ჩვენება; ანჩისხატის მგალობელთა ტრიო “სააღდგომო საგალობლები“, გურიისა და გურულების შესახებ კი გიორგი კეკელიძემ ისაუბრა.
როგორც საქართველოს პარლამენტის ეროვნული ბიბლიოთეკის გენერალურმა დირექტორმა აღნიშნა, გურიამ შეძლო ძალიან რთულ პირობებში საკუთარი ნიშანი შეენარჩუნებინა და გურულობა _”გაძლების ხელოვნების ძალიან უცნაურ ნიჭად” მოიხსენია.
“გურიაში რაღაცნაირად წაშლილია ზღვარი ძალიან გლობალურსა და წვრილმანს შორის, პაკისტანში მომხდარ ტერაქტსა თუ მეზობლის ეზოდან გადმოსული ქათმის ამბავს ერთნაირი ემოციურობით უყურებენ. ეს არის, ალბათ, ძალიან სერიოზული პარადოქსი, რომელიც მეორე მხრივ არის სიცოცხლის მთავარი ნიშანი. 90-იან წლებში როდესაც ვცხოვრობდი გურიაში, გურია ძალიან ჰგავდა სხვა კუთხეებს, იმიტომ რომ ჩვენი ძილისპირული იყო მეზობლის დაყაჩაღებისას გასროლილი ტყვიების მოსმენა. ყველაფერი რაც იყო ნოდარ დუმბაძესთან რომანტიკული და ძალიან მნიშვნელოვანი, 90-იანმა წლებმა მთლიანად დაცალა და მოგვცა სულ სხვა რეალობა.
ძირითადი ამბები არის ყოველთვის სადღაც ზურგში დამალული და კონკრეტული ადამიანის თავს ხდება ხოლმე. ამ ძირითად ამბებში იგრძნობა გურულობა. ეს არის გაძლების ხელოვნება. გაძლების ხელოვნება, რომელიც ძალიან იშვიათი და ძალიან უცნაური ნიჭით არის წარმოდგენილი, თორემ ის, რომ ვიღაც ყველაფერზე ისეთ პასუხს იძლევა, რომ შეიძლება ღიმილი მოგვგვაროს კარგია, მაგრამ არ არის ძირითადი ამბავი”, _აღნიშნა კეკელიძემ.
როგორც “გურია ნიუსთან” საუბრისას გიორგი კეკელიძე ამბობს, გამოფენა მნიშვნელოვანია ქვეყნის მრავალფეროვნებისთვის და იმის მითითებისთვის, რომ სახასიათო კუთხეები გვაქვს ძალიან ბევრი საინტერესო ნიშანით, რომელიც აუცილებლად უნდა იყოს ცნობილი სხვა ადამიანებისთვის.
გამოფენის გაკეთების იდეა ბიბლიოთეკის საზოგადოებასთან ურთიერთობის სამსახურის თანამშრომელს, ნინო ქადაგიძეს ეკუთვნის.
როგორც ის ჩვენთან საუბარში აღნიშნავს გურია გამოფენის თემად აირჩა არა იმიტომ რომ კეკელიძე გურულია, არამედ იმიტომ რომ ფესტივალში პირველად იღებენ მონაწილეობს და მოსამზადებლად ცოტა დრო ჰქონდათ.
“შარშან საუბრის დროს გვეგონა, რომ ის შეიძლება ყოფილიყო მხოლოდ მუსიკალური, გაირკვა რომ ასეთი სახისაც შეიძლებოდა. გიორგის შევთავაზე მიგვეღო მონაწილეობა და მისთვის არ არსებობს სიტყვები “არა, ვერ გავაკეთებ”. დავიწყეთ ფიქრი და ავარჩიეთ თემად-გურია, არა იმიტომ რომ გიორგი კეკელიძე გურულია, იმიტომ რომ რადგან პირველად ვმონაწილეობდით და ცოტა დრო გვქონდა, უნდა გვქონოდა საიმედოობა, აქვეა გიორგი კეკელიძე, ირაკლი მახარაძე. გაისისთვის ალბათ რაღაც უფრო სერიოზულს გავაკეთებთ”, _ აღნიშნა მან.
რაც შეეხება ფესტივალს “აღდგომიდან ამაღლებამდე” წელს ის 4 მაისიდან 6 ივნისის ჩათვლით მეთოთხმეტედ იმართება.
საერთაშორისო მუსიკალური ფესტივალი „აღდგომიდან ამაღლებამდე” 2006 წელს სრულიად საქართველოს კათოლიკოს-პატრიარქის საერთაშორისო საქველმოქმედო ფონდმა დააარსა ფონდ „ტრადიციები და ინოვაციებთან” ერთად. ფესტივალის სამხატვრო ხელმძღვანელია იტალიაში მცხოვრები ცნობილი ქართველი საოპერო მომღერალი იანო თამარ ალიბეგაშვილი, ღონისძიების მხატვრული მრჩეველი კი პიანისტი ალექსანდრე კორსანტია აშშ-დან.
