“გურია ნიუსი“ მიუკერძოებლად და ჟურნალისტური სტანდარტების დაცვით მუშაობდა. გამოცემაში არ გვხვდება სუბიექტური, გადაუმოწმებელი და დაუსაბუთებელი ინფორმაციები, _ ამის შესახებ სამი არასამთავრობო ორგანიზაციის (საქართველოს ჟურნალისტური ეთიკის ქარტია, ინტერნიუს საქართველო და CRRC-საქართველოს) მონიტორინგის ანგარიშშია აღნიშნული და მოიცავს 43 მედია საშუალებას _ 12 ტელევიზიას, 10 რადიოს, 8 გაზეთსა და 13 ონლაინ გამოცემას.
” ყოველკვირეული გაზეთი „გურია ნიუსი“, ძირითადად, რეგიონის ახალ ამბებს აშუქებდა. გამოცემა ყველა პოლიტიკური ძალის მიმართ ნეიტრალური განწყობით გამოირჩეოდა, დაბალანსებული იყო და სხვადასხვა მხარეთა პოზიციებს წარმოაჩენდა. საანგარიშო პერიოდში გამოცემამ ყველაზე მეტად ადგილობრივი მთავრობა (24%) და მთავრობა (15%) გააშუქა. არჩევნებში მონაწილე პარტიებიდან ყველაზე მეტად „ქართული ოცნება-დემოკრატიული საქართველო“ (11%) გაშუქდა, მას 9%-ით მოჰყვება „ევროპული საქართველო“, ხოლო 7%-ით „ჩვენი საქართველო – სოლიდარობის ალიანსი“. მონიტორინგის სუბიექტებისთვის დათმობილი მთლიანი ფართის 6-6% დაეთმოთ პოლიტიკურ გაერთიანებებს: „ერთიანი ნაციონალური მოძრაობა“, „პროგრესი და თავისუფლება“ და „ლელო საქართველოსთვის“.
გამოცემა რეგიონში მიმდინარე მოვლენებს აქტიურად აშუქებდა. განსაკუთრებული ყურადღება ეთმობოდა ინფრასტრუქტურულ და სხვადასხვა სოციალურ პრობლემებს. საკითხების გაშუქებისას წარმოდგენილი იყო როგორც ხელისუფლების, ასევე ოპოზიციის და ადგილობრივი მოსახლეობის კრიტიკული კომენტარები. ადგილობრივი მთავრობის 29%-იანი უარყოფითი ტონი, უმეტესწილად, სწორედ რესპონდენტთა განცხადებებმა და საკრებულოს სხდომების ჩანაწერების გამოქვეყნებამ განაპირობა. ჟურნალისტების მხრიდან რომელიმე პოლიტიკური ძალის მიმართ მიკერძოებული დამოკიდებულება არ დაფიქსირებულა და ბალანსი, უმეტესწილად, დაცული იყო. „გურია ნიუსი“ საარჩევნო თემებსაც აქტიურად აშუქებდა.
12-18 ოქტომბრის ნომერში დაიბეჭდა ინფორმაცია გურიის საარჩევნო ოლქში მაჟორიტარი დეპუტატობის კანდიდატების შესახებ. ამავე ნომერში პროექტის „ვითხოვთ პასუხს“ (ხორციელდება აშშ-ს საერთაშორისო განვითარების სააგენტოსა (USAID) და ეროვნული დემოკრატიული ინსტიტუტის (NDI) დაფინანსებით) ფარგლებში, კონკრეტულ საკითხებთნ დაკავშირებით წარმოდგენილი იყო 7 კანდიდატის ხედვები და გეგმები. მკითხველს შესაძლებლობა ჰქონდა მათი რეგიონის მუნიციპალიტეტებისთვის აქტუალურ, მნიშვნელოვან საკითხებზე (სკოლამდელი განათლება, მიგრაცია რეგიონიდან, სოფლის მეურნეობა, ხარისხიანი სამედიცინო სერვისების ხელმისაწვდომობა) კანდიდატების მოსაზრებებს გაცნობოდა. 5-11 ოქტომრის ნომერში გამოქვეყნდა დეტალური ინფორმაცია იმ პროცედურების შესახებ, რომელთა დაცვა აუცილებელია კენჭისყრის დღეს კოვიდინფექციის გავრცელების თავიდან ასაცილებლად.
„გურია ნიუსი“ მიუკერძოებლად და ჟურნალისტური სტანდარტების დაცვით მუშაობდა. გამოცემაში არ გვხვდება სუბიექტური, გადაუმოწმებელი და დაუსაბუთებელი ინფორმაციები”, _ აღნიშნულია მონიტორინგის ანგარიშში.
