ძალიან მძიმე დღეები უდგას საფეხბურთო კლუბ ლანჩხუთის “გურიას”. მესამე ლიგაში კარგა ხანია, მაჩანჩალათა შორის მყოფი ერთ დროს საამაყო ტრადიციების კლუბი, მესამე ლიგის სამ ტურში უქულოდ რჩება და ამას დაემატა ფინანსური გადასახადი, რომელიც 117 ათასი ლარი იქნება.
ფეხბურთის განვითარების ფონდიდან მთელი წლის მანძილზე მისაღები თანხის ნახევრის გადახდა ფეხბურთის ფედერაციის დავების საბჭოს ვერდიქტს მოჰყვა, საფეხბურთო არბიტრაჟმა “გურიას” ყოფილი მწვრთნელების: გიორგი და როინ ონიანების სარჩელი დააკმაყოფილა და კლუბს ექსმთავარი მწვრთნელისთვის 90 ათასი ლარის, ხოლო მისი თანაშემწის სასარგებლოდ _ 27 ათასი ლარის გადახდა დააკისრა.
საქმე იმაშია, რომ თავის დროზე “გურიაში” მოსულმა ახალმა მეპატრონემ, კლუბში მოღვაწე მწვრთნელების გამოცვლა მოინდომა, მაგრამ გიორგი ონიანმა მაშინ მოახერხა პოსტის შენარჩუნება. თუმცა, როგორც ამბობენ, ფარული ბრძოლა მის გასაშვებად მაინც გაგრძელდა. ეს შედეგზეც აისახა და მალე კლუბის პრეზიდენტმა მიხეილ ჯაფარიძემ, არასაკმარისი შედეგების გამო, ონიანები კლუბიდან დაითხოვა. ბუნებრივია, მწვრთნელებმა კონტრაქტის ცალმხრივად გაწყვეტა გააპროტესტეს და შესაბამის არბიტრაჟს მიმართეს. როგორც ირკვევა, გიორგი და როინ ონიანები კლუბს ედავებიან, რომ ხელშეკრულება ცალმხრივად შეუწყდათ და კომპენსაციას ითხოვენ. გიორგი ონიანი აცხადებს, რომ მას შემდეგ, რაც მოპასუხემ აუქციონი მოიგო, მისმა წარმომადგენელმა, მიხეილ ჯაფარიძემ განუცხადა, რომ მასთან თანამშრომლობას აღარ გააგრძელებდნენ. კითხვაზე, მოსთხოვა თუ არა კლუბს დასაბუთება, მწვრთნელმა განაცხადა, რომ მოსთხოვა _ კერძოდ, კლუბის წარმომადგენელს, მიხეილ ჯაფარიძეს რამდენიმეჯერ მიწერა მოკლე ტექსტური შეტყობინება, რომელშიც მიუთითა, რომ მათი (მისი და როინ ონიანის) კლუბიდან გაშვების საკითხთან დაკავშირებით არ მიუციათ ოფიციალური სახე და სთხოვა, ეცნობებინათ, თუ რა ფორმით უშვებდნენ კლუბიდან.
თავის მხრივ, “გურიას” ხელმძღვანელობა აცხადებს, რომ მწვრთნელები გუნდიდან არავის გაუშვია და ამის დამადასტურებელი დოკუმენტი არ არსებობს. კლუბის განცხადებით, მწვრთნელი 22 ივლისიდან აღარ გამოცხადდა კლუბში. ამ დროს “გურია” წარუმატებლად ასპარეზობდა და კლუბში მიიჩნიეს, რომ მწვრთნელმა თავისი ნებით დატოვა კლუბი.
“გურიას” წარმომადგენელთა თქმით, კლუბმა მისცა გათავისუფლების ფურცელი გიორგი ონიანს მისი მოთხოვნის შესაბამისად, რათა ახალი სამსახური დაეწყო. მათივე მტკიცებით, მათ სფფ-დან რეზო შენგელიამ დაურეკა და უთხრა, რომ ახალ სამუშაოს იწყებს გიორგი ონიანი და სჭირდება კლუბიდან გათავისუფლების ფურცელი. შესაბამისად, კლუბში მიაჩნიათ, რომ მწვრთნელებს ახალი სამსახური გამოუჩნდათ და თავად დატოვეს კლუბი.
ახლა გიორგი ონიანი მეორელიგელ “გარეჯს” წვრთნის, რომელიც უმაღლეს ლიგაში დაწინაურების კანდიდატია. წარმატებული იყო “გურიაში” ონიანის პირველი მუშაობაც, როცა გუნდში მოსული ახალი ხელმძღვანელობა კონტაქტის გაწყვეტაზე შეუთანხმდა, რისთვისაც მწვრთნელმა საკომპენსაციო თანხა _ 20 ათასი ლარი მიიღო.
ბოლოს მას სამწლიანი კონტაქტი ჰქონდა, აქედან პირველ წელს თვეში 3 ათას ლარს იღებდა, ხოლო დანარჩენ ორ წელიწადში თვეში 5 ათასი ლარი (!) უნდა მიეღო. “გურია” “გარეჯში” მისი ანაზღაურების დადგენას ითხოვს და ამის მწვრთნელის წინააღმდეგ გამოყენებას შეეცდება _ “გურიადან” 5 ათასები რატომ უნდა მიეცეს, თუ ახალ კლუბშიც ასეთივე ანაზღაურება აქვსო. ლოგიკურიცაა, გიორგი ონიანი ორივე კლუბში ვერ იმუშავებდა და უსამსახუროდ რომ დარჩენილიყო, გასაგებია, მაგრამ ის ფინანსურად, გამოდის, არც დაზარალებულა.
კლუბი არბიტრაჟის გადაწყვეტილების გასაჩივრებას შემდეგი არგუმენტებით აპირებს:
“საქმესთან დაკავშირებული ფაქტები წარმოდგენილია არასწორად _ კერძოდ, არ არის სრულყოფილად გადმოცემული საჩივრის წარდგენის პროცედურა, რაც არსებითი მნიშვნელობისაა ამ საქმის განხილვისას. აღნიშნულია, რომ 2022 წლის 21 დეკემბერს გიორგი ონიანმა დავების განხილვის კომიტეტს წარუდგინა დაზუსტებული საჩივარი, მაგრამ არ არის დაზუსტებული, რომ ეს საჩივარი შეტანილია 2022 წლის 16 აგვისტოს. ამ თარიღის არსებითი მნიშვნელობა გამოიკვეთება იმ ფაქტობრივ მდგომარეობაში, როდესაც წარმოდგენილი საჩივარი წინ უსწრებს კლუბის მიერ გიორგი ონიანის განთავისუფლების ბრძანებას, რომელიც გაცემულია 2022 წლის 1 სექტემბერს.
სხდომაზე არ ყოფილა წარმოდგენილი რაიმე “სქრინშოტი”, რომელიც პირდაპირ ან ირიბად ადასტურებს საჩივარში მოყვანილ ფაქტს კლუბის მიერ გიორგი ონიანის შრომითი ხელშეკრულების ცალმხრივად გაწყვეტის თაობაზე.
ყურადღება არ გამახვილებულა იმ ფაქტზე, რომ 2022 წლის 16 აგვისტოს შეტანილი პირველადი სარჩელით მოთხოვნილი თანხა იყო 5 ათასი ლარის ანაზღაურება, რომელიც 2022 წლის 21 დეკემბერს საჩივრის დაზუსტებისას გარდაიქმნა 90 000 ლარის კომპენსაციის მოთხოვნად. რაც ეფუძნება კლუბის მიერ განთავისუფლების ფურცლის გაცემას 2022 წლის 1 სექტემბერს, უკვე როცა გიორგი ონიანის მიერ გუნდში მიმდინარე სავარჯიშო და საშეჯიბრო პროცესების სრული უგულებელყოფა და კლუბის წინააღმდეგ საჩივრის შეტანა განიხილებოდა ხელშეკრულებიდან მისი მხრიდან გასვლის საფუძვლად.
ასევე, არ გამახვილებულა ყურადღება იმ გარემოებაზე, რომ 2022 წლის 22 ივლისს გამართული აუქციონის შემდგომი პროცედურები გაგრძელდა 14 აგვისტოს ხელშეკრულების გაფორმებამდე ლანჩხუთის მუნიციპალიტეტსა და აუქციონში გამარჯვებულ კომპანიას შორის. შესაბამისად, ბუნებრივია, ამ პროცესებისას კლუბის ადმინისტრაცია შეზღუდული იყო როგორც მნიშვნელოვანი გადაწყვეტილებების, ასევე, სანქციების ან სხვა სახის სადისციპლინო გადაწყვეტილებების მიღებაში.
ამიტომ შეუძლებელია, 14 აგვისტომდე გიორგი ონიანს ჰქონოდა კლუბის მხრიდან დასაბუთებული, იურიდიულად გამართული საფუძველი ხელშეკრულების გაწყვეტის თაობაზე, ან კლუბის მხრიდან გაკეთებულიყო ასეთი მნიშვნელობის განაცხადი, ხოლო 16 აგვისტოს მან უკვე შეიტანა საჩივარი კლუბის წინააღმდეგ.
არ არსებობს არც ზეპირი, არც დოკუმენტალური დადასტურება კლუბის მხრიდან მიღებული რაიმე გადაწყვეტილებისა ამ საქმესთან მიმართებით, 2022 წლის 1 სექტემბრამდე. აღნიშნული პერიოდის განმავლობაში გიორგი ონიანის მხრიდან არ ყოფილა კლუბის ადმინისტრაციაში ოფიციალური წერილობითი მიმართვა და არ არსებობს არანაირი ოფიციალური ან არაოფიციალური შეტყობინება, სადაც დასტურდება, რომ კლუბმა ცალმხრივად გაუწყვიტა მას ხელშეკრულება.
კონკრეტულ სიტუაციაში გიორგი ონიანის მხრიდან გამოიხატა არაკეთილსინდისიერება, რაც დასტურდება მისი მხრიდან გუნდის მართვასა და ვარჯიშებზე უარის თქმაში, ოფიციალური მატჩების უგულებელყოფაში 7 აგვისტოს, 18 აგვისტოს, 25 აგვისტოს და 1 სექტემბერს, ასევე, 2022 წლის 16 აგვისტოს შეტანილი საჩივრის ფაქტით, ხოლო მოპასუხეს ერთი სწორი გზა ჰქონდა დარჩენილი, რომ ჩაეთვალა შეწყვეტილად კონტრაქტი. მხოლოდ ამის შემდეგ, მოპასუხემ, სფფ-ს პასუხისმგებელი პირის, ბატონ რეზო შენგელიას მოთხოვნის და კანონის შესაბამისად, 1 სექტემბერს გასცა განთავისუფლების ფურცელი”.
ესაა კლუბის არგუმენტები, ახლა ყველაფერს სააპელაციო კომიტეტი გაარკვევს.
ავტორი
