გურიაში, საბჭოთა ოკუპაციის დღეს, 1921 წლის თებერვალში, კოჯორში გმირულად დაღუპული იუნკერების ხსოვნას პატივი მიაგეს.
ჩოხატაურში ,,ქართული ოცნება-დემოკრატიული საქართველოს” წევრებმა, სამხარეო ადმინისტრაციისა და მერიის ხელმძღვანელებთან ერთად, სოფელ სამებაში, ყვავილებით შეამკეს 1921 წლის თებერვალში, კოჯორში გმირულად დაღუპული იუნკერის, მაკარ ბურჭულაძის საფლავი.
ლანჩხუთში, მერმა ალექსანდრე სარიშვილმა ადგილობრივი ხელისუფლების წარმომადგენლებთან ერთად სოფელ ქვიანში გენერალ-მაიორ დავით ართმელაძის საფლავი ყვავილებით შეამკეს. შემდეგ კი ოკუპაციის მუზეუმში დაათვალიერეს ისტორიის ამსახველი მნიშვნელოვანი დოკუმენტები და განახლებული ექსპოზიცია.
ყვავილებით შეამკეს საქართველოს ტერიტორიული მთლიანობისთვის დაღუპულთა მემორიალი ოზურგეთშიც.
საბჭოთა რუსეთის მე-11 არმია საქართველოში 1921 წლის 11 თებერვალს შეიჭრა. ბრძოლები თბილისის მისადგომებთან, ტაბახმელა-კოჯრის მდელოებზე გაიმართა, სადაც საბრძოლო გამოცდილების არმქონე სამხედრო სასწავლებლის კურსანტებმა მტერს წინააღმდეგობა გაუწიეს. 1921 წლის 25 თებერვალს იუნკერთა დიდი ნაწილი კოჯრის მახლობლად გმირულად დაეცა. გარდაცვლილი იუნკრები დიდი პატივით დაკრძალეს ეკლესიის ეზოში, იქ, სადაც ახლა საქართველოს პარლამენტის შენობა მდებარეობს.
საარქივო მასალებზე დაყრდნობით საბჭოთა რეჟიმის მსხვერპლთა და რეპრესირებულთა რაოდენობა 500 ათას ადამიანს აჭარბებს.
ოკუპაციის დღესთან დაკავშირებით, დღეს სახელმწიფო და მუნიციპალური დროშები დაშვებულია.
