მოძრაობა „ქართული კინო საფრთხეშია“ ინიციატივით და ორგანიზატორობით საქართველოს რეგიონებში ქართველი რეჟისორები ქართული ფილმების პრემიერას აწყობენ. ერთი კვირის განმავლობაში ლანჩხუთში, ოზურგეთსა და ჩოხატაურში არაერთი დოკუმენტური, მხატვრული და ანიმაციური ფილმის ჩვენება შედგა. შეიძლება ითქვას, რომ ასეთი სახალხო ღონისძიება დიდი ხანია არ ყოფილა რეგიონებში.
„ჩვენთვის, რეჟისორებისთვის მთავარი არის ქართველი მაყურებელი და ამიტომ ღია ცის ქვეშ ვაწყობთ დოკუმენტური და მხატვრული ფილმების ჩვენებას, რის შემდეგ მიმდინარეობს საინტერესო სტუმრებთან და მაყურებელთა დისკუსია. მინდა ვთქვა, რომ მეტად საინტერესო დისკუსიებია ფილმის ჩვენების შემდეგ და ამით კიდევ უფრო ვამაყობთ ამ პროექტით.“ – თქვა „გურია ნიუსთან“ საუბრის დროს რეჟისორმა და ღონისძიების ერთ-ერთმა ორგანიზატორმა, ირინა ჟორდანიამ.
ირინა ჟორდანია ცნობილი რეჟისორის გიზო ჟორდანიას ქალიშვილია.
„მამაჩემი სამ წლამდე ლანჩხუთში იზრდებოდა და ამიტომ, როდესაც პროექტზე მუშაობა დავიწყეთ… მივიღე გადაწყვეტილება ლანჩხუთში მამაჩემის საპატივცემულოდ ჩემს ფილმს ვაჩვენებდი. ჩემთვის ეს დღე ძალიან ემოციური იყო.“ – აღნიშნა ჩვენთან საუბრის დროს ირინა ჟორდანიამ.
მანვე გვითხრა, რომ ქართული ფილმის პოპულარიზაციისთვის და აღორძინებისთვის კულტურის სამინისტრო არ ზრუნავს.
ირინა ჟორდანია: ძალიან სამწუხაროა, რომ კულტურის სამინისტრო არაფერს აკეთებს იმისთვის, რომ მხარში დაუდგეს ქართულ კინოს და ასევე არ ხდება ქართული ფილმის პოპულარიზაცია.
ქართველი რეჟისორების გურიაში ვოიაჟის ბოლო დღეს, ქალაქ ოზურგეთში, ამ დროისთვის უმოქმედოდ დარჩენილი კინოათეატრ „ოზურგეთის“ შენობის წინ ლუკა ბერაძის დოკუმენტური ფილმის „ღიმილიანი საქართველო“ ჩვენება გაიმართა.
ფილმში ასახულია მიხეილ სააკაშვილის მიერ საარჩევნო პროგრამის, „ღიმილიანი საქართველოს“ ამბავი, რომელიც 12 წლის შემდეგაც არ დასრულებულა.
ფილმის ჩვენების შემდეგ გაიმართა დისკუსია.
როგორც ორგანიზატორები ჩვენთან საუბრის დროს აცხადებენ, მსგავსი ღონისძიებების დაგეგმა და განხორციელება მომავალში აუცილებლად მოხდება.
ავტორი
