გურიელის ქუჩა “სასწაულისა და ღვთის წყალობის” მოლოდინში

ჯერ კიდევ 2023 წლის 25 იანვრის სხდომაზე,  ლანჩხუთის მუნიციპალიტეტის საკრებულომ დაამტკიცა საკითხი, რომ ქალაქ ლანჩხუთის ცხრა ქუჩაზე უნდა გახორციელებულიყო სარეაბილიტაციო სამუშაოები. ამისთვის კი, 4 მილიონ 500 ათასი ლარი დაიხარჯებოდა. მაშინ მერიის ინფრასტრუქტურის სამსახურის მიერ წარმოდგენილ დოკუმენტში, კერძოდ, ქუჩების ჩამონათვალში ნახსენები იყო გურიელის ქუჩაც, რომლის მოსახლეობაც წლებია, ასფალტის საფარის დაგებას ითხოვს.

“ველოდებით სასწაულსა და ღვთის წყალობას. მარტო გვპირდებიან, რეალური კი, ჯერჯერობით, არაფერი ჩანს. არადა, რამდენი წელია მოლოდინით ვცხოვრობთ, გამგეობაში განცხადებაც დავწერეთ და ვნახოთ, წელს მაინც თუ მოხდება სასწაული”, _ ამბობდნენ მაშინ გურიელის ქუჩის მობინადრეები. თუმცა, როგორც ფაქტებმა ცხადჰყო, არაერთი დაპირების მიუხედავად,”სასწაულისა და ღვთის წყალობის” მოლოდინი გურიელის ქუჩის მცხოვრებლებს ამჯერადაც გაუცრუვდათ და აქ ასფალტის საფარი არც 2023 წელს დაიგო. სამწუხაროდ, დიდი ალბათობით, არც 2024 წელს უნდა ჰქონდეთ აქაურებს ამ სიკეთის იმედი.

“ცხრა ქუჩის ჩამონათვალში შედიოდა გურიელის ქუჩა; ინფორმაცია გაზეთშიც გამოქვეყნდა და ახლა გვეუბნებიან, არ შედისო. კომპეტენტურმა პირმა გაგვცეს პასუხი _ არის თუ არა გურიელის ქუჩა ამ სიაში და თუ ამოიღეს, რატომ?! აგვიხსნან! ნახევარი საუკუნეა, ამ ქუჩაზე ვცხოვრობ და ჯერ აქ ასფალტი არ გვღირსებია. დაპირებები იცოცხლეთ, უამრავია. ახლა გვეგონა, გვიკეთებდნენ და შეჩერებულიაო! რა დავაშავეთ, ველოდებით პასუხს”, _ დაწერა რამდენიმე დღის წინ ლანჩხუთის მერიის ფეისბუქგვერდზე გურიელის ქუჩის მცხოვრებმა გულო ჭყოიძემ.

მერიის განმარტებით კი, გურიელის ქუჩაზე სარეაბილიტაციო სამუშაოების ვერგახორციელება წყალმომარაგების კომპანიის მიერ დაგეგმილ სამუშაოებს უკავშირდება:

“გურიელის ქუჩაზე გაერთიანებული წყალმომარაგების კომპანია სამუშაოებს გეგმავს, რის დასრულების შემდეგაც დაიგება ასფალტის საფარი”, _ განმარტა გულო ჭყოიძის პასუხად ლანჩხუთის მერიის პიარმა, მაკა სულაბერიძემ.

ცნობისთვის, გარდა გზის საფარისა, გურიელის ქუჩაზე კანალიზაციის სისტემაც პრობლემას წარმოადგენს.

“ძალიან გვაწუხებს საკანალიზაციო სისტემის არარსებობაა. წვიმის მოსვლის გვეშინია _ ფეკალიებით ივსება ეზოები. იყო დაპირება, რომ კანალიზაციის პრობლემას მოგვიწესრიგებდნენ, მაგრამ მოტყუებულები დავრჩით, მერე გვითხრეს, არაო. სანიაღვრე არხის გაკეთება ამჯობინეს, საკანალიზაციო სისტემის გაყვანა სირთულეებთანაა დაკავშირებულიო. რატომღაც ხელისუფალთაგან მოძულებულები ვართ გურიელის ქუჩის მცხოვრებლები. ლამის, ყველა ქუჩა და ყველა შუკა მოაასფალტეს და სირცხვილია, ქალაქის ცენტრში ასეთი მოუწესრიგებელი ქუჩა იყოს”, _ წლებია პრობლემას აჟღერებს ამ ქუჩის მოსახლეობა.

საგულისხმოა, რომ გურიელის ქუჩაზე გარკვეული ინფრასტრუქტურული სამუშაოები 2019 წლის ზაფხულში გახორციელდა და ადგილობრივი ხელისუფლების გადაწყვეტილებით, სანიაღვრე არხები მოეწყო, უფრო ზუსტად, უკვე არსებული არხის რეაბილიტაცია მოხდა ქუჩის ერთ მხარეს.

ასე გამოიყურება გურიელის ქუჩა ქალაქ ლანჩხუთში.