ორი ბინა, ორი მიწის ნაკვეთი, აგარაკი და მსუბუქი ავტომობილი _ გურიის გუბერნატორის ოჯახის ქონებაა.
აღნიშნულის შესახებ საქართველოს ადმინისტრაციულ–ტერიტორიულ ერთეულებში (ლანჩხუთის, ოზურგეთის, ჩოხატაურისა და ქ. ოზურგეთის მუნიციპალიტეტები) სახელმწიფო რწმუნებულ–გუბერნატორის გია სალუქავაძის ქონებრივ დეკლარაციაში წერია, რომელიც საჯარო სამსახურის ბიუროს ვებ-გვერდზე გამოქვეყნდა.
დეკლარაციის თანახმად, გია სალუქვაძე ფლობს 2005 წელს, 67 000-დოლარად ნაყიდ 134,00 კვ.მ-ის ფართობის ბინას თბილისში, ვაჟა-ფშაველას 70 ნომერში. ასევე, 2010 წელს, მემკვიდრეობით მიღებულ 114,00 კვ.მ-ის ფართობის მეორე ბინას ამავე ქუჩაზე (ვაჟა-ფშაველას მე-6 კვარტალი მე2 კორპუსი). მის საკუთრებაშია ასევე 2013 წელს 26000,00-დოლარად შეძენილი მსუბუქი ავტომანქანა Mercedes GL 450.
გარდა ამისა, გია სალუქვაძის მეუღლე, ქეთევან სალუქვაძე ფლობს 2010 წელს, 24000,00-ლარად აშენებულ 104,00 კვ.მ-ის ფართობის აგარაკს ბახმაროში და ამავე მისამართზე არსებულ 100,00 კვ.მ-ის ფართობის მიწის ნაკვეთს, რომელიც დეკლარაციის თანახმად, 2010 წელს 2000,00-დოლარად შეუძენია. მის 100%-იან საკუთრებაშია ასევე 2003 წელს მემკვიდრეობით მიღებული 300,00 კვ.მ-ის ფართობის მიწის ნაკვეთი ოზურგეთის მუნიციპალიტეტში, კაპროვანში.
რაც შეეხება ფინანსურ მდგომარეობას, როგორც დეკლარაციიდან ირკვევა, ოჯახის გასული წლის შემოსავალი მხოლოდ გია სალუქვაძის გუბერნატორის პოსტისთვის მიღებული 70800,00 ლარი იყო. რაც 2015 წელს მიღებულ შემოსავალს 4436 ლარით აღემატება, ხოლო 2014 წელს მიღებულ შემოსავალს – 36 300 ლარით.
როგორც საჯარო სამსახურის ბიუროს ვებ-გვერდზე განთავსებული დეკლარაციებიდან ირკვევა, 2015 წელს, გია სალუქვაძის ოჯახს ჯამში 66 364 ლარი მიუღია. კერძოდ, რწმუნებულ-გუბერნატორის პოსტიდან სალუქვაძემ 48286.00 ლარი მიიღო, ხოლო ს.ს.საქრუსსენერგოს გენერალური დირექტორის მრჩევლის თანამდებობიდან – 18078.00 ლარი.
2014 წელს კი, გია სალუქვაძის შემოსავალი მხოლოდ ს.ს.გესსაქრუსენერგოს გენერალური დირექტორის მრჩევლის პოსტიდან მიღებული 34500.00 ლარი იყო.
2017 წლის 4 ივლისს, დეკლარაციის შევსების დროს გია სალუქვაძეს „ვი–თი–ბი ბანკის“ სახელფასო ანგარიშზე 4,00 ლარი ჰქონდა, მის მეუღლეს, ქეთევან სალუქვაძეს „ლიბერთი ბანკის“ მიმდინარე ანგარიშზე 3372,05 ლარი ერიცხებოდა. შვილებს – რევაზი სალუქვაძეს „პროკრედიტ ბანკის“ ანაბარზე – 1617,84 ლარი; გიორგი სალუქვაძეს ამავე ბანკის ანაბარზე – 1529,99 ლარი, ხოლო ლუკა სალუქვაძეს – 2865,71 ლარი ერიცხებოდათ.
დეკლარაციის თანახმად, გია სალუქვაძის სახელზე 2015 წელს აღებული 30 000-ლარიანი სამომხმარებლო სესხია, რომლის ვადა 2019 წელს იწურება, ხოლო გასულ წელს „ვი თი ბი ბანკისთვის“ 9948,00 ლარი გადაუხდია.
