“ჩემნაირი პატიოსანი, შრომისმოყვარე, ერთგული და პროფესიონალი ადამიანები, ამ ქვეყანაში არავის სჭირდება. მთავარია, გყავდეს, ან მოიპოვო გამოსადეგი პატრონები და მფარველები და ყველა გზა ხსნილია.
ხო და თუ ვინმე ჩემნაირი გულწრფელი კადრით დაინტერესდებით, უმუშევარი ვარ და შეგიძლიათ, საინტერესო წინადადებები შემომთავაზოთ! რა თქმა უნდა, ვაკანტურ ვაკანსიას ვგულისხმობ, სხვის სკამზე არასოდეს დავმჯდარვარ და არც განიხილება ეგ თემა!“ _ ამ სახის ფეისბუქსტატუსს გურიის სამხაარეო ადმინისტრაციის უკვე ყოფილი თანამშრომელი ნინე ულუმბელაშვილი წერს.
როგორც ნინე ულემბელაშვილი “გურია ნიუსთან“ საუბრის დროს ამბობს ის 8 თვის განმავლობაში მუშაობდა გურიის სამხარეო ადმინისტრაციის პრესსამსახურში.
“გურიაში სახელმწიფო რწმუნებულის ადმინისტრაციაში 31 დეკემბერს შემიწყდა ხელშეკრულება, თუმცა წინა ხელშეკრულებაზე ვადა 4 ოქტომბერს გამდიოდა და მიუხედავად წინასწარ ერთი თვით ადრე, რწმუნებულს და მის მოადგილეს ქეთი მოისწრაფეშვილს ვესაუბრე და ვკითხე, თუ რას აპირებდნენ ჩემთან დაკავშირებით, კონკრეტული პასუხი ვერცერთმა გამცა. 28 სექტემბერს მითხრეს, რომ მიშვებდნენ მიზეზით _ კარგი გოგო ხარ, საუკეთესო რეკომენდაციას მოგცემთ, მაგრამ ბიუჯეტში ფული არ გვაქვს. კონკურსს არ ვაცხადებთ, ერთი პიარიც გვეყოფაო და როდესაც ვიკითხე ვაკანტური ვაკანსია არის ჩემს პოზიციაზე და რატომ არ ატარებთ კონკურსს-მეთქი, ქეთი მოისწრაფეშვილმა მითხრა, რომ დიახ, არის ვაკანსია, მაგრამ სხვა პროფილისთვის ფიქრობენ გამოთავისუფლებას.
ჩემი დიდი უკმაყოფილებისა და რწმუნებულზე მიწერილი წერილის შემდეგ, რომელიც საკმაოდ რთული წერილი იყო და სადაც მას მე ჩემი ცხოვრებისეული გამოწვევების შესახებ ვწერდი, გამიგრძელეს ხელშეკრულება და მითხრეს, რომ ჩემი წერილის შემდეგ შეწუხდა რწმუნებული და ფინანსთა სამინისტროსთან მოლაპარაკებების შემდეგ გამიგრძელეს ხელშეკრულებაზე ვადა.
ნიშანდობლივია, რომ ეს ყველაფერი ხდება არჩევნებამდე ორი დღით ადრე. მე ვფიქრობ, ჩემ გამო არავინ შეწუხებულა, უბრალოდ, ისინი არჩევნებამდე ორი დღით ადრე, მოერიდნენ სკანდალს, რომელიც, შესაძლოა, გამომეწვია. ასევე, ჩემი ხელშეკრულების გაგრძელებიდან, ანუ 5 ოქტომბრიდან ზუსტად 6 დღეში, გამოაცხადეს ღია კონკურსი, იმავე პოზიციაზე, რომელზეც მე ვიყავი დასაქმებული. რადგანაც სხვა გზა არ მქონდა, მივიღე მონაწილეობა ამ კონკურსში, მაგრამ თავისი კადრი მოიყვანეს _ არჩილ და ავთო თალაკვაძეების ბავშვობის მეგობარი, გურიის მაჟორიტარი დეპუტატის ვასილ ჩიგოგიძის ბიუროს თანამშრომელი და მათი ნდობით აღჭურვილი პირი.
მე კონკურსზეც ვაჯობე, თუმცა, მაინც ის დანიშნეს. გამოვითხოვე საკონკურსო ინფორმაცია, ჯერ შემაჯამებელი ოქმი, მოგვიანებით, ქულების ფურცელი. შემაჯამებელი ოქმი ძლივს ვადის გასვლის დღეს გადმომცეს, რაც შეეხება ქულების ფურცელს, რომელიც გამოთხოვილი მაქვს ოფიციალური წერილით 13 დეკემბერს, დღემდე არ მოუციათ, ასევე, არანაირი პასუხი არ მოუწერიათ. ახლა ხდება ის, რომ ათეთრებენ იმ დოკუმენტაციას, რაც არ მომცეს.
მმართველ პარტიას საჯაროდ მხარდაჭერას არ ვუცხადებდი და ამიტომ დამსაჯეს. აპარტიული ვიყავი და ალბათ, არ მენდობოდნენ. იმედს ვიტოვებ, სასამართლო მიიღებს სათანადო გადაწყვეტილებას და ჩემი სარჩელით გათვალისწინებულ ძირითად მოთხოვნას, რომ გაუქმდეს გადაცდომებით ჩატარებული კონკურსი, დააკმაყოფილებენ ჩემს სასარგებლოდ“, _ აღნიშნავს ნინე ულემბაშვილი.
“გურია ნიუსი“ გურიის გუბერნატორს გიორგი ურუშაძე დაუკავშირდა. ურუშაძემ პრესსამსახურის დახმარებით ნინე ულუმბელაშვილთან დაკავშირებით ასეთი კომენტარი გააკეთა:
“ნინო ულუმბელაშვილი დროებით, არამუდმივ ამოცანათა შესრულებლის მიზნით, განსაზღვრული ვადით დადებული ხელშეკრულების საფუძველზე, 2021 წლის 4 მაისიდან 2021 წლის 31 დეკემბრის ჩათვლით, იყო დასაქმებული სახელმწიფო რწმუნებულის ადმინისტრაციაში მასობრივი ინფორმაციის საშუალებებთან და პრესასთან ურთიერთობის მიმართულებით.
კანონმდებლობის თანახმად, შრომითი ურთიერთობის შეწყვეტის საფუძველს წარმოადგენს შრომითი ხელშეკრულების ვადის გასვლა. მოცემულ შემთხვევაში, რადგან ნინო ულუმბელაშვილთან განსაზღვრული ვადით დადებული ხელშეკრულების დასრულების თარიღს წარმოადგენდა 2021 წლის 31 დეკემბერი, შესაბამისად, სახელმწიფო რწმუნებულის ადმინისტრაციასა და დასაქმებულს შორის შრომითი ურთიერთობის დასრულებაც ხელშეკრულებით განსაზღვრული ვადის გასვლით იყო განპირობებული.
ზემოაღნიშნულიდან გამომდინარე, გავრცელებული ინფორმაცია ნინო ულუმბელაშვილის თანამდებობიდან გათავისულფლების თაობაზე არ შეესაბამება რეალობას.“
გიორგი ურუშაძეს არ უპასუხია ჩვენთვის უკვე ჩატარებულ კონკურსთან დაკავშირებით, რომელიც გურიის სამხარეო ადმინისტრაციაში 2021 წელს ჩატარდა.
