ლანჩხუთის ცენტრალურ სტადიონზე, საქართველოს ქალთა მეორე ეროვნული ჩემპიონატის მე-12 ტურის მატჩი გაიმართა, სადაც „ლანჩხუთი“ „თბილისს“ მასპინძლობდა. მატჩი ტურის ცენტრალური შეხვედრის სტატუსს ატარებდა და უნდა ითქვას, რომ სრულად გაამართლა მოლოდინი, მსგავსი დაძაბული შეხვედრის ხილვა იშვიათობაა, არათუ ქალთა, არამედ კაცთა ეროვნულ ლიგაშიც კი.
სწორედ ამ დაძაბულობის შედეგი იყო ის ფაქტი, რომ მოედნის თითოეულ მონაკვეთზე ნამდვილი ბრძოლა მიმდინარეობდა, განსაკუთრებით მეორე ტაიმში. ხისტი ორთაბრძოლების გამო ფეხბურთელებს ხშირად ესაჭიროებოდათ დახმარება, რის გამოც თამაში რამდენჯერე შეჩერდა. რამდენიმე ფეხბურთელს კი, ტრამვის გამო, მოედნის დატოვება ნაადრევად მოუწია.
თავიდან შეხვედრა მშვიდად დაიწყო, ბურთი, ძირითადად, მოედნის ცენტრს არ გაცდენია. სწორედ მოედნის ცენტრში, მეცხრამეტე წუთზე, მარჯვენა ფლანგზე მოიპოვა ბურთი ჩვენებურმა თამარ თავდიშვილმა, უმალ რამდენიმე ფეხბურთელს შორის აღმოჩნდა და მარიამ კალანდაძესთან ,,კედელი” გაითამაშა. საბოლოოდ კი ბურთი საჯარიმოში უმეთვალყუროდ დარჩენილ ანა რომანჩუკს მიუვიდა, რომელსაც ახლოდან გატანა არ გასჭირვებია.
მართალია, გატანილმა გოლმა სტუმრები გააქტიურა და სათამაშო უპირატესობაც ხელთ იგდეს, თუმცა, რეალური მომენტი მაინც ვერ გაიხერხეს.
დარჩენილ დროში სტუმრები მთელი ძალით ცდილობდნენ, მარცხისგან თავის დაღწევას, მაგრამ გურულებს საჯარიმოს მისადგომები საიმედოდ ჰქონდათ გადაკეტილი. მართალია, ერთხელ მაინც მოახერხეს თბილისელებმა მასპინძელთა დაცვის გარღვევა, თუმცა, საჯარიმოს გარედან დარტყმული ბურთი თათია გაბუნიამ ხელებში ადვილად დააფიქსირა.
საბოლოოდ კი ჩვენებურებმა ჩემპიონობისთვის მებრძოლ გუნდს არაფერი დაუთმეს და დაძაბულ ბრძოლაში 1:0 გაიმარჯვეს.
ქსკ ლანჩხუთი: თათია გაბუნია, მარიამ გოგეშვილი (ქრისტინა ხუხუნაიშვილი), ნინო გუჯაბიძე, ანა ჯოჯუა, მანონი საღარაძე, თამარ თავდიშვილი, ნინო ჩხარტიშვილი, მარიამ კალანდაძე, ია ალელიშვილი (მარიამ რომანჩუკი), ანა რომანჩუკი, ნათია წოწერია (თინათინ ჯიჯიეშვილი); სათადარიგოები: ქეთევან ურუშაძე, სალომე სანიკიძე, მონიკა შურღაია, ლანა მჟავია; მწვრთნელები: გიორგი ჩხაიძე, კახა ურუშაძე.
