22 წლის ნიკა კვარაცხელია, რომელსაც გუშინ, ვერაზე 8 ტყვია დაახალეს, დღეს დილით კლინიკაში გარდაიცვალა. ექიმების თქმით, მას სიცოცხლესთან შეუთავსებელი დაზიანებები ჰქონდა. გავრცელებული ინფორმაციით, მას მკვლელი ნაქირავებ ბინასთან ელოდებოდა. დამნაშავე ჯერ კიდევ არ არის დაკავებული და არც მისი ვინაობაა ცნობილი.
ნიკას უამრავი ადამიანი გულშემატკივრობდა, რომ ეცოცხლა, მაგრამ…
,,1999 წელი იყო განსაკუთრებული. დაიბადა ჯერ ჩემი დუდუ, მერე ჩემი ნიკო…
გუშინ ქალაქის ცენტრში ჩამიცხრილეს ნიკო! ყველაზე ნათელი გონების ადამიანი, ჩვენი იმედი… რომ ვეუბნებოდი ამას, იცინოდა, გაჩერდიო… 22 წლის ნიკო აღარ გვყავს… მარტო ჩვენ არა, მსოფლიომ დაკარგა უნიჭიერესი ადამიანი! გამთენიისას გარდაიცვალა 9 ტყვიით! რა გითხრათ, მე მკვდარი ვარ ნიკოსთან ერთად და არ ვიცი, ამ დამპალ ქვეყანას როგორ ვანდო ჩემი შვილის ცხოვრება!! ან თქვენ როგორ უნდა იყოთ მშვიდად აქ, არ მესმის!”, – წერს ხათუნა მაღლაკელიძე.
,,ნიკო 2019 წელს გავიცანი, როცა ევროპულ განათლებამიღებული საფრანგეთიდან საქართველოში დაბრუნდა და საოცარი აპლიკაცია feeds შექმნა. მას მერე ვმეგობრობდით, სულ ვწერდი, ბოლოს მაინც სოფლის მეურნეობით დაგაინტერესებ-მეთქი. დღეს დილით გავიგე, რომ ჩემი ნიკო მოკლეს, 8 ტყვია დააცალეს! ვინ ხართ, ვინ გაგზარდათ ვინ? რა ბოროტება გაქვთ ასეთი გულში, რომ დედას შვილს უკლავთ და თან ასეთ ნიკოს”, – წერს ნინო ზამბახიძე.
მწერალი და პარლამენტის ბიბლიოთეკის დირექტორი, გიორგი კეკელიძე კი ნიკა კვარაცხელიას ასე იხსენებს:
,,მოკლული 20 წლის ახალგაზრდა, ნიკო კვარაცხელია, დაახლოებით ერთი წლის წინ ბიბლიოთეკაში მესტუმრა და მითხრა, რომ დიდი გეგმები ჰქონდა – ფეისბუქის ქართულ ანალოგს ჰქმნიდა – Feedc.com-ს. ვიღაცას ალბათ გაეღიმებოდა, მაგრამ თუ ოდესმე ნიკოს შეხვედრიხართ, მისი ერუდიცია და ენთუზიაზმი მცირე მიზეზსაც არ დაგიტოვებდათ ამის. მთხოვა, პერიოდულად სტატიები მეწერა და სიამოვნებით დავთანხმდი. მასე მერე ხშირად მწერდა და სიახლეებს მიზიარებდა. საქართველოს მომავალს მისი მნიშვნელოვანი შვილი მოუკლეს. ვწუხვარ, ძალიან ვწუხვარ”.
წყარო: სარკე
