გაბრიელ-ბეგი მამალაძის სახელობის კულტურულ-საგანმანათლებლო ფონდის _ „ჩემი საქართველო,“ ორგანიზებით, თბილისში უკვე მეორედ გაიმართა ა(ა)იპ ჩოხატაურის მუნიციპალიტეტის სახელოვნებო სკოლების გაერთიანების სამხატვრო სკოლის (მენეჯერი მზია კვინტრაძე) და მოსწავლე-ახალგაზრდობის სახლის (ხელმძღვანელი შორენა კეკელიძე) ნორჩი მხატვრების გამოფენა სახელწოდებით _ „გვაქვს უთვალავი ფერითა“, თბილისელ თანატოლებთან ერთად.
ცნობისთვის, შარშანდელი გამოფენა მიეძღვნა ქეთევან დედოფლის საიუბილეო თარიღებს- წამებიდან 400 და დაბადებიდან 450 წლისთავს.
15 ნოემბერს მწერალთა სახლში მოწყობილ გამოფენას ჩოხატაურელი მოზარდებს ამჯერად თბილისის სამხატვრო სკოლის და მწერალთა სახლთან არსებული ბავშვთა ლიტერატურული კლუბის (ხელმძღვანელი ნინო ქადაგიძე) აღსაზრდელებიც შეუერთდნენ. ერთობლივ გამოფენაზე წარმოდგენილ მეტად მრავალფეროვანი ფერწერულ-გრაფიკულ და თექის ტექნიკაში შესრულებულ ნახატებსა და ხელით ნაქსოვ თოჯინებში გაცოცხლებული იყო გენიალური ქართველი მწერლის ნოდარ დუმბაძის ლიტერატურული გმირები.
გამოფენა გახსნა ფონდის პრეზიდენტმა მარიკა ზედელაშვილმა. გამოფენის მონაწილეებს მიესალმა მწერალი ნინო ქადაგიძე, რომელმაც ისაუბრა ნოდარ დუმბაძის როლზე მოზარდი თაობის აღზრდის საქმეში და ბავშვებს წაუკითხა დუმბაძის ნაწარმოები „გული“, რის მიხედვითაც შემდგომ ბავშვებმა, ლიტერატურული კლუბის წევრებთან ერთად და მოზარდებმა განიხილეს მათ მიერ ილუსტრირებული ლიტერატურული გმირები და გაუზიარეს ერთმანეთს საკუთარი ნაფიქრალი.
გამოფენას ესწრებოდნენ მხატვრები: თეონა ღლონტი, აჩიკო კუტალაძე, თამარ ბატატუნაშვილი, ნინო რამიშვილი, ნინო ბასილაშვილი, დავით საჯაია, თეა ბერძენიშვილი, დარია ავსაჯანიშვილი, ნინო ჩხაიძე, მწერალი და პოეტი ნინო ქადაგიძე და სხვები.
ღონისძიებაზე გამოითქვა სურვილი, რომ მსგავსი გამოფენა ჩატარდეს ჩოხატაურის მუნიციპალიტეტშიც, კერძოდ, ხიდისთავში.
დასასრულს ფონდის პრეზიდენტმა მარიკა ზედელაშვილმა სამახსოვრო სიგელებით დააჯილდოვა გამოფენის მონაწილეები და მათი პედაგოგები.
„ფონდის უპირველესი მიზანია, აღმოაჩინოს ნიჭიერი მოზარდები და ხელი შეუწყოს მათი შემოქმედებითი უნარების განვითარებას. ამის ნათელი დასტურია თუნდაც ბეგის სტიპენდიანტების _ მარი ბრეგუს და ანდრია ბენაშვილის ნამუშევრები“, _ თქვა ზედელაშვილმა.
ღონისძიებაზე გამოითქვა სურვილი, რომ მსგავსი გამოფენა ჩოხატაურშიც გაიმართოს.
საღამოს დასრულების შემდეგ, გამოფენაში მონაწილე მოსწავლეები თბილისის სამხატვრო სკოლაში დირექტორმა ნინო ბასილაშვილმა მიიწვია სასწავლო პროცესების გასაცნობად, სადაც ჩოხატაურელმა მხატვრებმა დაათვალიერეს მათი აღსაზრდელების ნამუშევრები. პედაგოგებმა გაუზიარეს ერთმანეთს გამოცდილება და სამომავლო თანამშრომლობაზეც ისაუბრეს.
16 ნოემბერს თბილისის სტუმრები ფონდის ორგანიზებით ეწვივნენ საქართველოს ეროვნული გმირის მერაბ კოსტავას და მხატარ ელენე ახვლედიანის ახლად რესტავრირებულ მუზეუმებს.
ელენე ახვლედიანის მუზეუმის დირექტორის ნებართვით მარი ბრეგუმ და ანდრია ბენაშვილმა შეასრულეს მუსიკალური ნაწარმოებები იმ ისტორიულ როიალზე, რომელზეც მეოცე საუკუნის უდიდესი პიანისტი სვიატოსლავ რიხტერი უკრავდა.
მუსიკალური ნაწარმოების შესრულებისას, მოზარდების თხოვნით, შეხვედრაში ონლაინ ჩაერთო არაერთი საერთაშორისო კონკურსის ლაურეატი, პიანისტი სანდრო გეგეჭკორი, რომელმაც სასარგებლო რჩევები მისცა პატარა მუსიკოსებს და წარმატებები უსურვა მათ. ის დეკემბერში ბეთჰოვენის საერთაშორისო კონკურსზე მიემგზავრება ბონში _ ბავშვებმა და პედაგოგებმა პიანისტს გზა დაულოცეს ურთულეს ფინალში გასამარჯვებლად.
ინფორმაციისთვის, სანდრო გეგეჭკორი ფონდის ერთ-ერთი მხარდამჭერი და გულშემატკივარია. 7 ნოემბერს ამავე დარბაზში მისი ინიციატივით და ფონდის ორგანიზებით ჩაატარა საქველმოქმედო სოლო კონცერტი, რომელიც ამერიკის შეერთებულ შტატებში სამკურნალოდ მყოფ დათუნა ქოქრაშვილს მიეძღვნა და ონლაინ ჩართვით ბეთჰოვენისა და ლისტის ნამუშევრებით გაულამაზა დილა.
სიყვარული და მადლიერება ადამიანის ალბათ ყველაზე დიდი ნიჭია, რომელიც დღეს ასე აკლია სამყაროს. თბილისელი და ჩოხატაურელი ბავშვების ორდღიან ერთობლივ თავშეყრას ნოდარ დუმბაძის შემოქმედების გარშემო ამ ნიჭით გაცისკროვნებული სახეები ანათებდა.
„მომავალ შეხვედრამდე „სიცოცხლის“ სამოსახლო პატარა გურიაში“!
