„გზა თავისუფლებისთვის“ – ასე ჰქვია გამოფენას, რომელიც 9 აპრილთან დაკავშირებით ჩოხატაურის თანამედროვე სახვითი ხელოვნების გალერეაში გაიმართა.
ღონისძიების ორგანიზატორმა და გალერიის ხელმძღვანელმა გურამ ბერძენიშვილმა „გურია ნიუსს“ განუცხადა, რომ გამოფენაზე წარმოდგენილი სურათები საქართველოში ბოლო ერთი საუკუნის განმავლობაში განვითარებულ ტრაგიკულ მოვლენებს ასახავს. თუმცა, საქართველოს გარდა, გამოფენაზე ყურადღება უკრაინაზეც არის გამახვილებული.
„ეს გამოფენა ეძღვნება იმ ისტორიის გახსენებას, რა ბოროტებასთანაც გვქონდა ჩვენ საქმე და რასთანაც ამ წუთას მსოფლიოს აქვს საქმე რუსეთის სახით“,_ ამბობს ბერძენიშვილი.
კითხვაზე_ რას ნიშნავს 9 აპრილი თქვენთვის_ ბერძენიშვილი გვპასუხობს:
„ჩემთვის ცხრა აპრილი ნიშნავს ტკივილს და სიხარულს, რადგან მოვიპოვეთ დამოუკიდებლობა, მაგრამ ამ დამოუკიდებლობას უნდა განმტკიცება. ის გზა, რომელიც ჩვენ ავირჩიეთ, დამოუკიდებლობის გადის სამწუხაროდ მსხვერპლთანაც. უნდა შევინარჩუნოთ და მომავალ თაობას დავანახოთ რამდენად აუცილებელია გაფრთხილება თავისუფლების. თავისუფლება სადაც არ არის, იქ მშვიდობა ვერ იქნება და სადაც მშვიდობა არ არის, იქ თავისუფლება ვერ იქნება. ეს გამოფენაც ამის პასუხი არის, რომ ვანახოთ მხატვრულად, ჩემი ხედვით, დანახული 1 საუკუნე, რაც გაიარა საქართველომ“.
კულტურულ ღონიძიებას, სადაც 9 აპრილის შესახებ ფილმიც აჩვენეს მხარის რწმუნებული გიორგი ურუშაძე, ჩოხატაურის მერი დავით შარაშიძე, საკრებულოს თავმდჯომარე ირაკლი კუჭავა და მერიის სხვა თანამშრომლები დაესწრნენ.
შეკრებილი საზოგადოების წინაშე სიტყვით გამოვიდა გურიის გუბერნატორი გიორგი ურუშაძე და ყურადღება გამოფენის მნიშვნელობაზე გაამახვილა. გუბენატორმა ასევე მადლობა გადაუხადა გმირების მშობლებს და აღნიშნა, რომ სამშობლოს შეწირული ადამიანები ყოველთვის უნდა გვახსოვდეს.
„ზუსტად ასეთი გამოფენები უნდა გვქონდეს, რომ სულ გვახსოვდეს, რის ფასად მოვედით აქამდე. ამ ადამიანების დამსახურება და ღვაწლი ყოველთვის უნდა იყოს ჩვენს გონებაში და მეხსიერებაში მუდმივად. მინდა მადლობა ვუთხრა ამ გმირების მშობლებს. ნატოს საფლავზე რომ მივედით დღეს, იქაც ვთქვი და აქაც მინდა გავიმეორო, ჩვენი ერი, ჩვენი ქვეყანა და მშობლები ზრდიდნენ შვილებს იმ შემართებით და იმ სულისკვეთებით, რომ პირველი სიწმინდე კაცის არის სამშობლო და უნერგავდნენ შვილებს, რომ სამშობლოსთვის ყველაზე ძვირფასი სიცოცხლეც კი არ უნდა დაიშურონ. მინდა მადლობა გადავუხადო ყველა იმ გმირის მშობელს, ვინც შეეწირა ჩვენი თავისუფლებისთვის ბრძოლას. მინდა ამ გმირებს გადავუხადო დიდი მადლობა ამ მონაპოვარისთვის, რასაც ჩვენი თავისუფლება ჰქვია. სამწუხაროდ, ჩვენ გვაქვს ესეთი რეალობა რაც ვიხილეთ დღეს კადრების სახით, მაგრამ ეს დიდ მწუხარებასთან ერთად თითოეულ ჩვენთაგან დიდი სიამაყის გრძნობით გვავსებს, რომ ჩვენი ერი, ჩვენი ქვეყანა საუკუნეების მანძილზე იყო, არის და იქნება გაუტეხელობის ერთ-ერთი მთავარი სიმბოლო“,_ განაცხადა ურუშაძემ.
გუბერნატორის შემდეგ სიტყვით ჩოხატაურის მუნიციპალიტეტის მერი, დავით შარაშიძე გამოვიდა. მერის განცხადებით, გმირებმა თავი სამშობლოს სიყვარულს და თავისუფლებას შესწირეს.
„9 აპრილის მოვლენები საყურებლად ძალიან მძიმე იყო. ვერცერთმა ჩვენგანმა ვერ გავატარეთ ცრემლების გარეშე დღევანდელი დღე. განსაკუთრებით დიდი პატივისცემით მინდა შევეხო 9 აპრილის გმირის, ნატო გიორგაძის ოჯახს, ასევე მერაბ ახობაძის ოჯახს. ქედს ვიხრი თქვენს წინაშე. ზუსტად მათი ოფლის, სისხლისღვრის შედეგია რომ ჩვენ აქ ვართ და ერთად ვართ. საქართველოს სულისკვეთებისთვის შეწირეს თავი ამ ხალხმა რასაც ჩვენი ქვეყანა, ჩვენი ქვეყნის სიყვარული და ქრისტიანობა ჰქვია“,_ განაცხადა შარაშიძემ.
ჩოხატაურის მუნიციპალიტეტის საკრებულოს თავმჯდომარემ ირაკლი კუჭავამ კი განაცხადა, რომ 9 აპრილს, მადლობის გადახდასთან ერთად ბოდიშის მოხდაც არის აუცილებელი.
„სამწუხაროდ პატარა ჩოხატაურსაც ბევრი გმირი ჰყავს. სამწუხაროდ, იმიტომ რომ არ უნდა ხდებოდეს ეს. საუბარი ძნელია, მაგრამ უნდა ვისაუბროთ. ჩვენ გაქვს პრობლემა. კაცობრიობას აქვს პრობლემა. 9 აპრილმა, შემდეგ კი აგვისტოს ომმა კიდევ უფრო ნათლად დაანახა მსოფლიოს, რომ ეს ბოროტების იმპერია არასოდეს გაჩერდება და არ იტყვის უარს თავის მეთოდებზე. 9 აპრილის მიმართ, ჯერ კიდევ საბჭოთა კავშირში, უფრო მეტად რომ აემაღლებინა ხმა მსოფლიო საზოგადოებას, სხვა შედეგი დადგებოდა. დღეს ამას მთელი ევროპა იმკის. საქართველო დღევანდელი ხელისუფლების პოზიციიდან გამომდინარე გადაჭარბების გარეშე უნდა ითქვას, რომ დაადგა რაციონალურ გზას და მეგობრისთვის არ უღალატია. როცა ვამბობთ მადლობა გმირებს, ბოდიში სადაა? როცა ქართველი ქართველს ემუქრება, “შენ ვერ მოხვალ დღეს 9 აპრილის მემორიალთან”. ბოდიშია საჭირო და ქართველებმა უნდა შევძლოთ და პირად ამბიციაზე მაღლა დავაყენოთ ქვეყანა, რომლისთვისაც დაიღუპნენ ეს ადამიანები“,_ განაცხადა კუჭავამ.
ღონისძიების მიწურულს უკრაინის და საქართველოს ჰიმნები გაჟღერდა.
ავტორი
