ჯამბულათ, ჯაბა, როგორც მას მეგობრები და თანამებრძოლები ეძახდნენ, ხოფერია გასულ შაბათს სამხედრო პატივით გმირი ბიძის, უფროსი ჯამბულათ ხოფერიას გვერდით, ლანჩხუთში, სოფელ გვიმბალაურში დაკრძალეს.
საგვარეულო სასაფლაოზე ოჯახის წევრები, მეგობრები და მოქალაქეები იყვნენ შეკრებილი.
თანამებრძოლებისა და მეგობრების მიერ გავრცელებული ინფორმაციით, ჯამბულათი ხერსონთან, ქიმიური იარაღის ზემოქმედების შედეგად მოიწამლა, საავადმყოფოში მკურნალობის კურსი გაიარა, მაგრამ 1 დეკემბერს, კიევში გარდაიცვალა.
ჯაბა ხოფერია უკრაინაში საბრძოლველად გერმანიიდან, მიუნჰენიდან ჩავიდა. 27 თებერვალს იგი უკვე უკრაინაში იყო.
ამ დღეებში ლანჩხუთელ გმირ ბიჭზე ბევრმა დაწერა, ბევრმა გამოხატა სამძიმარი. ჯამბულათ ხოფერიას ოჯახს საქართველოს კათალიკოს-პატრიარქმაც მიუსამძიმრა.
“გამოვთქვამთ გულისტკივილს უკრაინაში დაღუპული ქართველი მებრძოლის, ჯამბულათ ხოფერიას გარდაცვალების გამო.
იგი საქართველოსთვის მებრძოლი ოჯახის შვილია და თავადაც სიცოცხლე სხვათა დასაცავად გასწირა. ღმერთი შეეწიოს და მის უკვდავ სულს თვისი სავანე დაუმკვიდროს; ოჯახის წევრებსა და ახლობლებს კი ლოცვის ძალა მისცეს და განაძლიეროს რწმენამ იმისა, რომ სიკვდილი რეალურად არ არსებობს და რომ გარდაცვალება მხოლოდ დროებითი განშორებაა ახლობლებთან”, _ განაცხადა საქართველოს პატრიარქმა ილია II-მ.
ლანჩხუთელი სამოქალაქო აქტივისტი ლუი ორაგველიძე ჯამბულათის მამას, არჩილ ხოფერიას, რომელიც აფხაზეთის ომის მონაწილეა, მადლობას უხდის გმირი შვილის აღზრდისთვის: “მადლობა თქვენს წინაპრებს, მადლობა თქვენს მამას, თქვენნაირი გმირის, თქვენი ძმის, დიდი, გმირი ჯამბულათ ხოფერიას აღზრდისთვის, მადლობა პირადად თქვენ რომ აღზარდეთ ჩემი თაობის გმირი, ჩვენი, ყველას ჯამბულათი!
იმ ეპოქაში, სადაც გმირების აღზრდა ძალიან რთულია, თქვენ ეს იდეალურად შეძელით, იმდენად მრავლისთქმელია თქვენთან საუბარი, თქვენი თითოეული სიტყვა, ამ რამდენიმე წუთში მივხვდი, რომ არსად არ გამიგია, არც სკოლაში მისწავლია, არც უნივერსიტეტში და არც არსად წამიკითხავს და მომისმენია მსგავსი.
თქვენ მიერ წარმოთქმული სიტყვები, “გმირობას ყველას ვერ მოთხოვ”, იმდენად რეალურია დღევანდელ ცხოვრებაში, ვისგანაც ვითხოვდი, ახლა საერთოდ საპირისპიროდ ვფიქრობ, ამ რამდენიმე წუთში.
ჩემთვის პირადად, ჩემს ქვეყანაში, თუ ნებისმიერ სხვა ქვეყანაში, ვინმემ რომ მკითხოს როგორია გმირობა, როგორია ქართველი ვაჟკაცები, აუცილებლად თქვენს ოჯახზე მივუთითებ.
ის სიტყვები, “ჩემს ოჯახში თუნდაც ჩემი მტერი თუ ჩამოადგამს ფეხს, ის ხელშეუხებელიაო”, ცრემლებს ძლივს ვიკავებდი.
ისეთ ფრაზებს ვისმენდი თქვენგან, რაც მტკიცედ უნდა ჩავიდო მეხსიერებაში!
მადლობა რომ არსებობთ, თქვენ იმაზე მეტად ძლიერი უნდა იყოთ, ვიდრე აქამდე ყოფილხართ, რადგან მე და ჩემს ძალიან ბევრ ქალ მეგობარს გაგვიჩნდა იმის გრძნობა, რომ სანამ თქვენნაირი გმირი მებრძოლები ხართ, დაცულები ვართ!
მადლობა და მინდა გითხრათ ჩემი მეგობრების სახელით, თქვენ!
ჩვენ გვჭირდებით”.
ტელეკომპანია “ფორმულას ერთ-ერთი დამფუძნებელი გიორგი რურუა: “მივაბარეთ ძმათა სასაფლაოს, საქართველოს და უკრაინის გმირი _ ჯამბულათ ხოფერია.
გამოსამშვიდობებელ სიტყვაში არჩილმა თქვა, რომ ჭირმა გაგვაერთიანა სხვადასხვა ხალხი და გამოჩნდა აქ მთავარიც _ შეგვიძლია გაერთიანება. მე ერთი მტერი დამრჩა, მე და საქართველოს! სიტყვით გავცემ პასუხს და თუ საჭირო გახდა, იარაღითაც.
იბრძვიან, კვდებიან, რომ იცოცხლოს საქართველომ!
პ.ს. თვალნათლივ ჩანდა სამძიმარზე შემოსული ყოფილი მტრები, სხვადასხვა ორგანიზაციების დროშები, პრეფექტები და მოხალისეები, პარტიული თუ ვეტერანთა საძმო.
ჩვენ ჭირმაც და ლხინმაც უნდა გაგვაერთიანოს.
აცხონოს ჯამბულათის სული ღმერთმა!
დიდება საქართველოს!
დიდება უკრაინას!
დიდება გმირებს!”
ლანჩხუთელი გმირის, ჯამბულათ ხოფერიას დაკრძალვის შემდეგ, მისმა, ასევე, გმირმა მამამ არჩილ ხოფერიამ სოციალურ ქსელში დაწერა:
“სულ მარტო დარჩა ბებერი ქოფაკი გამცვდარი ერთგან ჩამოტეხილი ეშვით და ყელზე ძველი ჩანგლებით, რომელიც მხოლოდ იმიტომ არ იჟანგება, რომ ჟამიდან ჟამზე მომხდურის სისხლით იფერება…
ხვადი დაკარგა ახალგაზრდა, ერთადერთი ხვადი მისი და ფარის იმედი… ამჯერად ხროვამ იძალა… და თუ მთვარიან ღამეში გადაბმულ ყმუილს გაიგონებთ, ეს მარტოდ დარჩენილი გლოვობს და ისევ ელოდება ხროვის გამოჩენას…”
საქართველოს პარლამენტის ეროვნული ბიბლიოთეკის დირექტორის, გიორგი კეკელიძის ინფორმაციით, გამორჩეულ გურულ ბიჭის, ჯამბულათ ხოფერიას პატივსაცემად სტეპენდიის დაწესებაც იგეგმება: “ჩვენი ფონდი სოფელ გვიმბალაურის ან მახლობელი სოფლის საუკეთესო მოსწავლეს ჯამბულათის სახელობის სტიპენდიას დაუნიშნავს. ეს იქნება ჩვენი მოკრძალებული ნაბიჯი მისი ხსოვნის პატივსაცემად”, _ დაწერა ფეისბუქზე გიორგი კეკელიძემ.
ავტორი
