21-ე საუკუნის ცივილიზებულ ევროპაში დაიწყო ის შემზარავი საომარი მოქმედებები რომლის გაჩაღებისაც ბოლომდე არავის სჯეროდა. ასე ფიქრობდა ნებისმიერი საღად მოაზროვნე ადამიანი, ოღონდ არა რუსეთის ამჟამინდელი პრეზიდენტი. ეს ცხოვრება ულმობელია და ამაში გუშინ დილით დავრწმუნდით.
უკრაინაში განვითარებულ საომარ მოქმედებებს არაერთი ცნობილი სპორტსმენი გამოეხმაურა.
წარსულში ცნობილმა უკრაინელმა მოკრივე ვიტალი კლიჩკომ, რომელიც ამჟამად კიევის მერია, საგანგებო განცხადება გაავრცელა და ქვეყანას ერთიანობისკენ მოუწოდა, რათა რუსული აგრესიის მოგერიება მოხერხდეს.
„დღეს დიდი ტრაგედია ხდება არა მხოლოდ უკრაინისთვის, არამედ, მთელი ევროპისა და მსოფლიოსთვის. უკრაინას თავს აგრესორი დაესხა, ჩვენი შეიარაღებული ძალები კი თავს გმირულად იცავენ. ჭურვების ხმა უკვე დედაქალაქში ისმის. კიევში კრიტიკულად საჭირო ინფრასტრუქტურის მოქმედებისთვის ყველაფერს ვაკეთებთ და ჩვენს ქალაქს ბოლომდე დავიცავთ. მოთმინება და მობილიზებაა საჭირო. ცივი გონებით უნდა ვიმოქმედოთ. მხოლოდ ასე გავძლებთ. დიდება უკრაინას!“.
რუსეთის ფედერაციის მიერ უკრაინაში დაწყებულ სამხედრო ოპერაციას ცნობილი ძიუდოისტი დარია ბილოდიდიც ეხმაურება:
„დღეს, დილის 6 საათზე, კიევში სროლების ხმაზე გამეღვიძა. სიტყვები არ მყოფნის – ძალიან მეშინია, ჩემი ოჯახისა და ქვეყნისთვის ვლოცულობ. რუსეთმა ჩვენი დაბომბვა დაიწყო, დაიწყო ომი. ბოლო დრომდე არ მჯეროდა, რომ ეს შეიძლებოდა მომხდარიყო. რატომ? რატომ ანგრევთ ადამიანების სიცოცხლეს? რუსეთო და ბელორუსია, გაჩერდით! ჩვენ გვინდა მშვიდობა, გვინდა ვიცხოვროთ!“
„მანჩესტერ სიტის“ უკრაინელი მცველი ოლექსანდრ ზინჩენკო ირწმუნება, რომ „ინსტაგრამმა“ წაუშალა პოსტი, რომლითაც ვლადიმირ პუტინს „საშინელი ტანჯვით სიკვდილი უსურვა“, – დაწერა „დეილი მეილმა“.
„I hope you die the most painful suffering death, creature“ – დაუწერა ზინჩენკომ პუტინს ცოტა ხნის წინ „ინსტაგრამზე“. 25 წლის ფეხბურთელი დასძენს, რომ ვერ გაჩუმდებოდა იმ ფონზე, რაც მის სამშობლოში ხდება, როცა მთელი ცივილიზებული მსოფლიო მხარს უჭერს უკრაინას.
კიევის „დინამომ“ შექმნილ ვითრებასთან დაკავშირებით შემდეგი განცხადება გაავრცელა:
„ჩვენ ჩვენს მიწაზე ვართ და არავის დავუთმობთ. ჩვენს მხარესაა სიმართლე და ჩვენ გავიმარჯვებთ! ჩვენ აუცილებლად გავიმარჯვებთ, ხოლო უკრაინელები უჟგოროდიდან ლუგანსკამდე, ჩერნიჰოვიდან სევასტოპოლამდე იამაყებენ იმით, რომ დიადი სახელმწიფოს მოქალაქეები არიან, რომლის სახელწოდება უკრაინაა. დიდება უკრაინას! დიდება ერს!“
დონეცკის „შახტარის“ რუმინელმა მწვრთნელმა მირჩა ლუჩესკუმ განაცხადა, რომ მშიშარა არ არის, სამშობლოში არ დაბრუნდება, ომის დამწყები იდიოტები კი რაც შეიძლება მალე უნდა შეაჩერონ.
„გენტის“ უკრაინელმა ლეგიონერმა რომან ბეზუსმა აღშფოთება სოციალურ ქსელში გამოხატა:
„უკრაინა ყოველ ჩვენგანშია, ჩვენი ისტორია, ჩვენი კულტურა, ენა თაობიდან თაობას 1000 წელზე მეტია გადაეცემა. სამწუხაროდ, ისევე, როგორც 8 წლის წინ, ჩვენს ქვეყანას თავს ისევ დაესხა გველი. ვლოცულობთ, რომ უკრინელმა გმირებმა ისევ დაიცვან ჩვენი სამშობლო“.
ომის დაწყებას გმობენ პროგრესულად მოაზროვნე რუსული სპორტის მოღვაწეებიც.
მსოფლიოს ყოფილი პირველი ჩოგანი ევგენი კაფელნიკოვი რუსეთის მიერ უკრაინის ოკუპაციას გამოეხმაურა და აღნიშნა, რომ ეს მის ქვეყანას კატასტროფულ შედეგებს მოუტანს.
„ერთი ადამიანის სიხარბე, დღევანდელი დღის შემდეგ, რუსეთში ბევრ დედას ცრემლებამდე მიიყვანს“, – დაწერა მან სოციალურ ქსელში.
„ვერც კი გავიგე, დღეს როგორ გავაკეთო პროგრამა. რა დროს ფეხბურთია. რჩევებს არ ველი, რადგან დარწმუნებული ვარ, ახლა ასეთ რჩევას არავინ მომცემს. ყველაზე უარესი დღე ჩემს ცხოვრებაში. რეკორდი დამხობილია და ისე მოჩანს, ეს რეკორდი სისტემატურად განახლდება. წყვდიადი და უსუსურობა. არ მეგონა, თუ ჩემს ცხოვრებაში ასეთი დღე დადგებოდა“, – დაწერა ცნობილმა ჟურნალისტმა ვასილი უტკინმა თავის ტელეგრამ-არხზე.
მოსკოვის „დინამოს“ საფეხბურთო გუნდის თავდამსხმელმა ფიოდორ სმოლოვმა ომის შეჩერება მოითხოვა: „არა ომს“, – დაწერა სმოლოვმა „ინსტაგრამზე“.
რუსეთის მიერ უკრაინის ოკუპაცია მძაფრად შეაფასა გარი კასპაროვმაც. ყოფილი მსოფლიოს ჩემპიონის განცხადებით, ყველა ერთად უნდა დავეხმაროთ უკრაინას ურჩხულის წინააღმდეგ ბრძოლაში.
„2014 წლიდან, მას შემდეგ რაც რუსეთი პირველად შეიჭრა უკრაინაში, ყოველი დოლარი მათთან ვაჭრობაში, ყოველი ევრო კორუფციულ გარიგებებში, დაეხმარა პუტინს ომის მანქანის შესაქმნელად, რომელსაც დღეს ევროპაში მშვიდობიანი მოსახლეობის დასამხობად იყენებს. ახლა თქვენ უნდა დაეხმაროთ უკრაინას იმ ურჩხულის წინააღმდეგ ბრძოლაში. ყველაფერი უნდა გავაკეთოთ მის შესაჩერებლად“. – დაწერა კასპაროვმა ტვიტერზე სამხედრო ოპერაციის დაწყების შემდეგ.
[sexy_author_bio]
