გუშინდელი დღის პირველ შეხვედრაში ავსტრალიის ნაკრებმა ტუნისი დაამარცხა და მერვედფინალურ სტადიაზე გასვლის შანსი შეინარჩუნა – 1:0.
უხვად დასაჩუქრებულმა საუდის არაბეთის ნაკრებმა პოლონეთთან ძალიან მოინდომა, მაგრამ მეტოქეების კლასში განსხვავებამ თავი მაინც იჩინა და რობერტ ლევანდოვსკის თანაგუნდელებმა მიმდინარე მუნდიალზე პირველი გამარჯვება მოიპოვეს – 2:0.
დანიის ეროვნულმა გუნდმა მსოფლიოს ამჟამინდელ ჩემპიონს – საფრანგეთის ნაკრებს ღირსეული წინააღმდეგობა გაუწია, მაგრამ მინდორი დამარცხებულმა დატოვა – 1:2.
გუშინდელი დღის უკანასკნელ შეხვედრაში არგენტინის ნაკრებს ცოტა გაუჭირდა, მაგრამ მატჩის მეორე ნახევარში მექსიკის წინააღმდეგობა მაინც დაძლია – 2:0.
აშშ-ის ეროვნულ გუნდთან უგოლოდ დასრულებული შეხვედრის შემდეგ, ინგლისის ეროვნულ გუნდს თანამემამულე გულშემატკივრებმა უსტვინეს და კრიტიკის ქარცეცხლში გაატარეს. ინგლისელთა თავკაცმა გარეთ საუთგეიტმა ამ სამწუხარო ფაქტთან დაკავშირებით შემდეგი კომენტარი გააკეთა:
„ჩვენ გვისტვენდნენ? დარწმუნებული არ ვარ, რომ ეს სტვენა ჩვენკენ იყო მომართული, არ ვიცი. ჩვენ დიდ გზაზე ვართ. ჯგუფის მოგება ისევ შეგვიძლია და ეს ჩვენი მთავარი მიზანი იქნება. რა თქმა უნდა, თამაშთან დაკავშირებით ბევრი კრიტიკა იქნება, მაგრამ ბევრი გუნდი ვერ შეძლებს ჯგუფში 9 ქულის დაგროვებას. მოთამაშეები იმედგაცრუებულნი არიან, ჩვენთის ახლა წინსვლაა მნიშვნელოვანი“, – განაცხადა გარეთ საუთგეიტმა.
ინგლისის ნაკრები გააკრიტიკა ცნობილმა რუსმა ჟურნალისტმა ვასილი უტკინმაც:
„ნულებს უკვე მივეჩვიე და რაღაცნაირად დავუმოყვრდი კიდეც, მაგრამ საღამოს მატჩში ნულები… მე უბრალოდ სიტყვები არ მაქვს. უნამუსო! მშიშარა! ვერაგი ანგლოსაქსები! ვიგინდარები ხართ თქვენ ყველანი, აი რა“.
ირანთან ნაკრების შემდეგ, ინგლისის ნაკრების დელეგაციაში რამდენიმე ადამიანმა თავი შეუძლოდ იგრძნო. გავრცელებული ინფორმაციით, ნაკრებში რამდენიმე ადამიანს კორონავირუსი დაუდასტურდა.
ინგლისის ნაკრებმა ფიფას წარმომადგენლებს მიმართა, რომ მათ ნაკრებთან ყოფნისას ორგანიზატორებმა პირბადეები გამოიყენონ. ეს ეხება ყველა იმ ადამიანს, რომლებიც ინგლისის ნაკრებს საორგანიზაციო საკითხებში ეხმარებიან.
კატარში არსებული შეზღუდვების გამო ერთი სკანდალიც აგორდა. ფეხბურთის საერთაშორისო ფედერაციამ გულშემატკივრებს კატარის სტადიონებზე ჯვაროსნების კოსტიუმებით გამოჩენა აუკრძალა, რადგან მუსულმანურ ქვეყანაში ის შესაძლოა შეურაცხყოფად აღიქვან.
„ჯვაროსნების კოსტიუმები არაბულ კონტექსტში შესაძლოა შეურაცხმყოფელი იყოს მუსულმანებთან მიმართებაში. ამიტომ ანტიდისკრიმინაციული განყოფილებიდან ჩვენმა კოლეგებმა გულშემატკივრებს ასეთი სამოსის დაფარვა ან შეცვლა სთხოვეს“, – ნათქვამია ფიფას განცხადებაში.
ბრიტანულ მედიაში გაჩნდა ინფორმაცია იმის შესახებ, რომ ინგლისის ნაკრების ორ გულშემატკივარს, რომლებიც რაინდების ფორმაში იყვნენ გამოწყობილნი და ხელთ პლასტმასის ხმლები და ფარები ჰქონდათ, ირანთან მატჩზე დასწრების უფლება არ მისცეს.
ანტიდისკიმინაციულმა ჯგუფმა „Kick It Out“ ასევე ურჩია გულშემატკივრებს, უარი თქვან კოსტიუმებზე, რომლებითაც რაინდებსა თუ ჯვაროსნებს განასახიერებს – შუა საუკუნეების ქრისტიან მებრძოლებს, რომლებიც მუსულმანების წინააღმდეგ ომს აწარმოებდნენ.
ხორვატიის ნაკრების ცნობილ და ულამაზეს გულშემატკივარს, ივანა კნოლს კი კატარში … პატიმრობა ემუქრება.
30 წლის ლამაზმანი, რომელიც მის ხორვატიის ტიტულსაც ფლობს, ხორვატიისა და მაროკოს შეხვედრას გამომწვევი ჩაცმულობით დაესწრო, რამაც კატარელების აღშფოთება გამოიწვია.
ივანას ამის გამო პატიმრობა ან ქვეყნიდან დეპორტაცია ემუქრება. ჩვეულებრივ, კნოლი ხორვატიის ნაკრების თამაშებზე მსგავსი ჩაცმულობით დადის, მაგრამ კატარში ეს ყველაფერი აკრძალულია, მიუხედავად ამისა, მან ადგილობრივი აკრძალვები არ გაითვალისწინა. ივანამ სტადიონზე გადაღებული ფოტოები სოციალური ქსელის პირად გვერდზე გამოაქვეყნა, რასაც დადებითი კომენტარები მოჰყვა, მაგრამ იყო უარყოფითი შეფასებები და კომენტარები, რომლის მიხედვით მან პატივი არ სცა იმ ქვეყნის კულტურასა და რელიგიას, სადაც იმყოფება.
გუშინ, ბრაზილიის ნაკრების ფეხბურთელმა ნეიმარმა სოციალურ ქსელში პოსტი გამოაქვეყნა და ტრავმის შესახებ ისაუბრა. როგორც მან დაწერა, ყველაფერს გააკეთებს დასაბრუნებლად, რომ თავის ქვეყანას დაეხმაროს.
„სიამაყე და სიყვარული, რომელსაც ვგრძნობ, როცა ამ მაისურს ვიცვამ, ახსნა შეუძლებელია. ღმერთს რომ მოეცა საშუალება ამერჩია ჩემი დაბადებისთვის ქვეყანა, ეს იქნებოდა ბრაზილია. ჩემს ცხოვრებაში არაფერი ადვილად არ მიმიღია, ყოველთვის ვიბრძოდი, რომ მიმეღწია ჩემი ოცნებებისა და მიზნებისთვის. არასოდეს არავისთვის მისურვია ცუდი, მაგრამ ვეხმარებოდი მათ, ვისაც ეს სჭირდებოდა. დღევანდელი დღე ერთ-ერთი ყველაზე რთული მომენტი იყო ჩემს კარიერაში და ისევ მსოფლიო ჩემპიონატზე. ტრავმა მაქვს, დიახ, საწყენი და მტკივნეულია, მაგრამ დარწმუნებული ვარ, რომ მექნება დაბრუნების შანსი, რადგან ყველაფერს გავაკეთებ, რომ დავეხმარო ჩემს ქვეყანას, ჩემს თანაგუნდელებს და საკუთარ თავს. ელოდებით, რომ მტერი გამანადგურებს? არასოდეს! მე ღვთის შვილი ვარ, ჩემი რწმენა უსაზღვროა“, – დაწერა ნეიმარმა.
ნეიმარის თამაში ჯგუფურ ეტაპზე გამორიცხულია და ბრაზილიელები იმედოვნებენ, რომ პლეი-ოფისთვის გამოჯანმრთელებას მოასწრებს.
გუშინ, ბრაზილიის ეროვნული ნაკრების თავდამსხმელმა რაფინიამ, ბრაზილიელთა იმ ქომაგებს უპასუხა, რომლებსაც ნეიმარის ტრავმა „გაუხარდათ“:
„არგენტინის გულშემატკივრები მესის ისე ეპყრობიან, როგორც ღმერთს. პორტუგალიელი გულშემატკივრები რონალდუს ისე ეპყრობიან, როგორც მეფეს. ბრაზილიელ გულშემატკივრებს კი უხარიათ, რომ ნეიმარმა ფეხი დაიზიანა. სამწუხაროდ, ნეიმარის კარიერაში ერთადერთი შეცდომა ის არის, რომ ბრაზილიელად დაიბადა. ეს ქვეყანა მის ნიჭსა და ფეხბურთს არ იმსახურებს,“ – მოიყვანა რაფინიას სიტყვები გამოცემამ „Globo“.
საუდის არაბეთში კი საყოველთაო ზეიმი გრძელდება. ცნობილი გახდა, რომ ნაკრების თითოეული ფეხბურთელი არგენტინასთან ისტორიული გამარჯვების შემდეგ „Rolls-Royce“-ის მარკის ავტომობილით დაჯილდოვდა.
მოთამაშეებს ეს საჩუქარი საუდის არაბეთის პრინცმა მუჰამედ ბინ სალმანმა გაუკეთა. ამ მოდელის მანქანის ღირებულება დაახლოებით ნახევარი მილიონი ევროა. თუ გავითვალისწინებთ, რომ ნაკრების განაცხადში 26 ფეხბურთელია, პრინცმა დაახლოებით 13 მილიონი ევრო გაიღო.
ეს არ არის პირველი შემთხვევა, როცა საუდის არაბეთში ფეხბურთელი „Rolls-Royce“-ით დააჯილდოვეს. სამეფო ოჯახმა იგივე საჩუქარი ნაკრების მოთამაშეებს 1994 წელს გაუკეთა, როცა გუნდმა ჯგუფიდან გასვლა მოახერხა და მერვედფინალში ითამაშა.
მანამდე მუჰამედ ბინ სალმანმა არგენტინასთან გამარჯვების მეორე დღეს ქვეყანაში ეროვნული დღესასწაული გამოაცხადა.
გუსინ, „პარმას“ ლეგენდარული იტალიელი მეკარე ჯანლუიჯი ბუფონი მსოფლიოს ჩემპიონატზე ირანის ნაკრების გამარჯვებას გამოეხმაურა და ირანელი ფეხბურთელები გაამხნევა.
როგორც ბუფონმა განაცხადა, ისინი თავიანთი სიმამაცით ისტორიაში დარჩებიან და თავისუფლებისთვის მებრძოლი თანამემამულეებისთვის გმირები არიან.
„თქვენი სიმამაცით ისტორიაში დარჩებით. თქვენი გამარჯვება იმედისა და სიძლიერის ნიშანია მათთვის, ვინც თქვენს ქვეყანაში თავისუფლებისთვის იბრძვის. ბევრი ადამიანისთვის გმირები ხართ, ჩემთვის კი მაგალითი“, – დაწერა ბუფონმა სოციალურ ქსელში.
დღეს გერმანიის ნაკრები ესპანეთის ეროვნულ გუნდს დაუპირისპირდება. ამ მატჩის შედეგზე დამოკიდებული იქნება ბუნდესგუნდის სამუნდიალე ამბიციები და შეძლებს თუ არა ჯგუფიდან მომდევნო სტადიაზე გასვლას.
გუშინ, გერმანიის ნაკრების ყოფილმა ვარსკვლავმა, მოგვიანებით კი, მთავარმა მწვრთნელმა იურგენ კლინსმანმა კატარში მიმდინარე მსოფლიოს ჩემპიონატზე ბუნდესგუნდის გამოსვლა შეაფასა და აღნიშნა, რომ იაპონიასთან სენსაციური მარცხის შემდეგ, ჰანსი ფლიკსა და მის შეგირდებს მხოლოდ სასწაული თუ იხსნით.
„ნათელია, რომ ეს ჩვენთვის უდიდესი იმედგაცრუება იყო. საერთო ჯამში, კარგი თამაში არ გვქონია. ნამდვილად არ იყო ის მატჩი, რომელსაც წინა ჩაგდებული მსოფლიოს ჩემპიონატის შემდეგ ველოდით, როდესაც ჯგუფური ეტაპიც კი ვერ დავძლიეთ.
იმედი მქონდა, რომ გერმანელი ფეხბურთელებს სათანადო განწყობა, ტემპი და ენერგია ექნებოდათ, თუმცა, მაშინაც კი, როდესაც 1:0-ს იგებდნენ, არ მქონია შეგრძნება, რომ მომატებას აპირებდნენ. არადა, ინგლისმა სწორედ ეს გააკეთა. ირანს რომ გაუტანეს, კიდევ უფრო მეტად შეუტიეს და მეორე, მესამე, მეოთხეც შეაგდეს…
ჩვენები კი თითქოს ანგარიშის გახსნით დაკმაყოფილდნენ და უნდოდათ, რომ ძალების დაზოგვით მოეგოთ, იაპონია კი სხვაგვარად ფიქრობდა. მეტოქე პირველ ტაიმში ძალიან ცუდად გამოიყურებოდა, თუმცა, მას თამაშში დაბრუნების საშუალება მივეცით. ძალიან ენერგიულად გამოიყურებოდნენ, დაღლილობაც არ დატყობიათ და გამარჯვებაც დაისახურეს.
ახლა, გერმანიის ნაკრები კედელთანაა მიყენებული და თუკი ჩვენები სასწაულს არ მოახდენენ და ესპანეთს არ დაამარცხებენ, შეუძლიათ სახლში წავიდნენ“.
ავტორი
