ადგილობრივი ხელისუფლების ცვლილების შემდეგ ლანჩხუთის მუნიციპალიტეტი საკადრო ცვლილებების მოლოდინშია. რიგ სამსახურებში რეორგანიზაციის გახორციელებაზე მერიას თანხმობა საკრებულომ, დაახლოებით, ერთი თვის წინ მისცა და ახლა აქტიურად საუბრობენ, თუ ვინ დაინიშნება და რომელ ა(ა)იპ-ში მოხდება ხელმძღვანელი პირის ცვლილება.
გავრცელებული ინფორმაციით, ერთ-ერთი, ვისაც ხელმძღვანელის პოსტთან გამომშვიდობება მოუწევს, კულტურის დაწესებულებათა გაერთიანების დირექტორი ადელინა კილაძე იქნება, რომელიც, ამავდროულად, ლანჩხუთის პირველ საჯარო სკოლაში ქართულ ენასა და ლიტერატურას ასწავლის.
კილაძე აღნიშნულ თანამდებობაზე ექსგამგებლის, ზაზა ურუშაძის გადაწყვეტილებით 2015 წლის სექტემბერში დაინიშნა. მაშინ გამგებლის ამ არჩევანს ბევრი ურუშაძე-კილაძის ახლო ნათესაური კავშირით ხსნიდა, თუმცა, თავად პირველი პირი, ადელინა კილაძესთან ყოველგვარ ნათესაურ კავშირს კატეგორიულად უარყოფდა და აქცენტს მის პროფესიონალიზმზე აკეთებდა.
„მას ყველა იცნობს. ბევრისთვის სასურველი და მისაღები კადრია. დიდხანს ვფიქრობდით, ვინ შეიძლებოდა ყოფილიყო გაერთიანების ხელმძღვანელი და ბოლოს ქალბატონ ადელინაზე შევჩერდით. სადაც ვიკითხე, ყველგან დადებითად დამიხასიათეს. მჯერა, რომ თქვენთან ერთად აქ კიდევ ბევრი კარგი საქმის გაკეთებას შეძლებს“, _ აღნიშნავდა ურუშაძე.
თუ ვინ შეცვლის კილაძეს ხელმძღვანელის პოსტზე, ამის შესახებ სხვადასხვა ვერსია ვრცელდება. ნაწილი მიიჩნევს, რომ ეს პოსტი, ადვილი შესაძლებელია, წინა მოწვევის საკრებულოს წევრსა და სოციალური კომისიის მაშინდელ ხელმძღვანელს ია ჩხაიძეს ჩააბარონ, რომელიც, მიუხედავად იმისა, რომ „ქართული ოცნების“ აქტიური წევრია, ბოლო თვითმმართველობის არჩევნებში პარტიული სიის მიღმა დარჩა.
გარდა ამისა, ვრცელდება ინფორმაცია, რომ კულტურის დაწესებულებათა გაერთიანების უფროსის თანამდებობაზე ირმა მგელაძის კანდიდატურა განიხილება. იგი ია ჩხაიძის მსგავსად სოციალურ კომისიას ხელმძღვანელობდა 2006-2010 წლის მოწვევის საკრებულოში, სადაც „ერთიანი ნაციონალური მოძრაობის“ კვოტით მოხვდა. 2010 წლიდან კი 2013 წლამდე გამგეობის კულტურის სამსახურის უფროსი იყო. ირმა მგელაძე დღემდე ყოფილი გამგებლის, გია გოგუაძის გუნდის წევრად მოიაზრება.
ინფორმაციის გადამოწმების მიზნით, „გურია ნიუსი“ კომენტარისთვის თავად ირმა მგელაძეს დაუკავშირდა, რომელმაც არ ისურვა აღნიშნულ თემაზე კომენტარი გაეკეთებინა.
