აქციები არაფერს შეცვლის, „ნაციონალურ მოძრაობას“ იმდენი მხარდამჭერი არ ჰყავს, რეალური ცვლილება გამოიწვიოს, – ამის შესახებ პარლამენტის ვიცე-სპიკერმა, ლევან იოსელიანმა განაცხადა.
მისი თქმით, ყველა პარტიას აქვს უფლება, აქციის მეშვეობით პროტესტი გამოხატოს, ოღონდ უნდა გვესმოდეს ნათლად რას აპროტესტებენ.
„თუ არჩევნები წალენჯიხაში არ არის არალეგიტიმური, რატომ არის სხვაგან და პირიქით. თბილისში, სადაც სხვაობა იმდენად დიდია, რომ ძალიან რთულია რაღაც სახის გაყალბებაზე საუბარი, რატომ არის არალეგიტიმური არჩევნები?! ეს ის კითხვებია, რომელსაც ჩემი აზრით, პასუხი უნდა გაეცეს. არ მიმაჩნია, რომ არსებულ პირობებში აქციებმა შეიძლება რაიმე სერიოზული ცვლილება გამოიწვიოს არჩევნების მიმართ. არჩევნებს 52 ათასი ხმით რომ აგებ, არ მგონია, თბილისში რამე აზრი ჰქონდეს არჩევნების შედეგების არაღიარებას. ვისურვებდი ისეთ არჩევნებს, სადაც კანდიდატები ერთმანეთს გამარჯვებას ულოცავენ და დამარცხებას აღიარებენ, აქამდეც უნდა მივიდეთ! საზოგადოება ძალიან დაიღალა არჩევნების გაყალბებასა და აქციებზე საუბრით. ეს აქციები არაფერს არ შეცვლის. „ნაციონალურ მოძრაობას“ იმდენი მხარდამჭერი არ ჰყავს, რომ რეალური ცვლილება გამოიწვიოს. ალბათ,7 ნოემბერს აქციის დაგეგმვა შეეშალათ, რადგან ჩემთვის წარმოუდგენელია, „ნაციონალურმა მოძრაობამ“ 7 ნოემბერს აქცია როგორ უნდა ჩაატაროს“, – განაცხადა ლევან იოსელიანმა.
ოპოზიციამ 7 ნოემბერს აქცია ჯერ დააანონსა, შემდეგ კი გადაიფიქრა. „ნაციონალური მოძრაობის“ თავმჯდომარე ნიკა მელიამ რუსთაველის გამზირზე გამართულ აქციაზე განაცხადა, რომ ოპოზიცია კვირას, 7 ნოემბერს საპროტესტო აქციას გამართავს. 7 ნოემბრის აქცია „ფეისბუქის“ პირად გვერდზე დააანონსა ექსპრეზიდენტმა და ამჟამად პატიმარმა მიხეილ სააკაშვილმაც, თუმცა მისი პოსტი ახლა აღარ იძებნება.
7 ნოემბრის აქციის ანონსს მალევე გამოეხმაურა ოპოზიციონერი, მოძრაობა „დროას“ ლიდერი ელენე ხოშტარია, რომელმაც განაცხადა, რომ „7 ნოემბერს აქცია არ იქნება, რადგან 7-ში არ უნდა იყოს“. ელენე ხოშტარიას კომენტარი გაავრცელა „ტაბულამაც“, სადაც ხოშტარია ამბობს: „აქცია 7 ნოემბერს არ იქნება, შეგვეშალა“.
