მარიკა მეგრელიშვილი ჩოხატაურის #1 საჯარო სკოლის მე-11 კლასის წარჩინებული მოსწავლეა. მარიკამ თავის თანატოლებს, მეგობრებს გაუზიარა საკუთარი წარმატების ფორმულა, ამისთვის კი მან გამართა პრეზენტაცია სახელწოდებით _ „როგორ გავხდეთ წარმატებული“.
როგორც მარიკა ჩვენს ახალგაზრდულ გაზეთთან საუბრისას ამბობს, უყვარს ტექნიკური საგნები, იტაცებს სპორტი და იღებს არაფორმალურ განათლებას სხვადასხვა პროექტში მონაწილეობის სახით.
„ვესწრები გაკვეთილებს და ვიღებ ჩემთვის საინტერესო ინფორმაციას მასწავლებლისთვის კითხვების დასმით. როცა სახლში მივდივარ, გაკვეთილები, ფაქტობრივად, მომზადებული მაქვს. ცოდნას კი ყოველდღიური სისტემატური მეცადინეობით ვიღრმავებ. დამხმარე რესურსებად სწავლის პროცესში გარდა წიგნებისა ვიყენებ ინტერნეტს, ვაკეთებ ტესტებს, სავარჯიშოებს და ვუყურებ შემეცნებით ვიდეოებს, ამ გზით მოპოვებულ თეორიულ ცოდნას კი პრაქტიკაში ვიყენებ“, _ ამბობს მარიკა.
მარიკა დასახელდა „წლის საუკეთესო მოსწავლედ“, ამ წარმატების მიღწევაში მას, როგორც თითონ გვეუბნება, დაეხმარა თავისი ოჯახი, მასწავლებლები და მეგობრები.
მოკლედ მარიკას მიღწევების შესახებ _ ყოველწლიურად მონაწილეობს პროექტ „ეტალონში“, სადაც პირველ ათეულში ხვდება. 2021 წლის 25 ნოემბერს პროექტ „ეტალონში“ მონაწილეობისთვის მიენიჭა „ოქროს სიგელი“; იგი აქტიურად იყო ჩაბმული TSU-ს სამართლის, CENN-ის სოციალური და მწვანე მეწარმოების, კულტურულ-ჰუმანიტარული ფონდ „სოხუმის“ ტრენინგებში და გადაეცა სერტიფიკატი.
თამაშობდა (2021 წ.) სასკოლო ფეხბურთის გოგონათა ნაკრებში (მოიპოვეს რეგიონული გამარჯვება Coca-Cola-ს თასის გათამაშებაში). ასევე, მონაწილეობდა სასკოლო პროექტ „ოლიმპიზმი სკოლებში“ და სპორტულ ვიქტორინაში.
მარიკა იყო ონლაინ სკოლა _“ზურგჩანთის“ მოსწავლე, სადაც ტარდებოდა ქიმიის გაკვეთილები და 2022 წლის 10 ივნისს წარმატებით დაამთავრა „ზურგჩანთის“ მე-10 კლასის პროგრამა.
2022 წლის აგვისტოში მან ბაკურიანში, საზაფხულო ბანაკში, სკოლის მოსწავლეებთან ერთად გაიარა ტრენინგ კურსი „თანამშრომლობა მშვიდობის განვითარებისთვის“, სადაც წარმატებული მონაწილეობისთვის გადაეცა სერტიფიკატი.
მარიკა, როგორც უკვე აღვნიშნეთ, დღეს ჩვენი ახალგაზრდული გაზეთის სტუმარია და თანატოლებს, ყველას ვისაც წარმატების მიღწევა სურს თავად გაუზიარებს გამოცდილებას _ „როგორ გავხდეთ წარმატებული მოსწავლე“.
_ მარიკა, ელოდებოდი თუ არა, რომ დასახელდებოდი „წლის საუკეთესო მოსწავლედ“?
_ სიმართლე გითხრათ, არ ველოდებოდი, რადგან ჩვენს სკოლაში ძალიან ბევრი გამორჩეული ბავშვია, რომლებიც კარგად სწავლობენ და ამ ტიტულს იმსახურებენ.
_ ვინ არის შენი ყველაზე დიდი გულშემატკივარი?
_ ჩემი ყველაზე დიდი გულშემატკივარი, ვფიქრობ, არის ჩემი მასწავლებელი.
_ როგორ ფიქრობ, რა არის საჭირო იმისთვის, რომ წარმატებას მიაღწიო?
_ ალბათ, ძირითადად, მონდომება, რადგან ამის გარეშე არაფერი გამოვა და შეუპოვრობა.
_ სკოლის დასრულების შემდეგ რა პროფესიას აირჩევ?
_ ჯერ ზუსტად არ გადამიწყვეტია, მაგრამ, ალბათ, ტექნიკური საგნების განხრით ავირჩევ პროფესიასაც, მაგრამ არ გამოვრიცხავ, რაიმე სხვა პროფესიას დავეუფლო.
_ გაქვს რაიმე დევიზი?
_ კი, ჩემი ცხოვრების დევიზია “Do your best” _ „იყავი შენი თავის საუკეთესო ვერსია“.
_ თავისუფალ დროს რას აკეთებ?
_ მიყვარს ისეთი სატელევიზიო გადაცემების ყურება, როგორებიცაა: „რა, სად, როდის?“ და „წიგნების თარო“. თავისუფალ დროს ვუსმენ მუსიკას, ვუყურებ ფილმებს, ვკითხულობ და აქტიურად ვკავდები სპორტით.
_ რას ეტყოდი შენზე პატარებს, თანატოლებს, ზოგადად, მომავალ თაობას?
_ ვურჩევდი, რომ დაისახონ მიზანი, უმიზნოდ ცხოვრება, მართლაც რომ, უაზრობაა და ყველაფერი გააკეთონ ამ მიზნის მისაღწევად, რადგან 21-ე საუკუნეა. ყველაფერი არის შესაძლებელი და დასწავლადი.
მარიკა სკოლის თვალია, _ ამბობენ ჩოხატაურის #1 საჯარო სკოლაში.
„მარიკა არის ძალიან მეგობრული, კომუნიკაბელური, თავაზიანი და კარგად აღზრდილი გოგონა. მას აქვს უმაღლესი პასუხისმგებლობა თავის თავზე აღებული, არის დამოუკიდებელი. დამოუკიდებლად სწავლობს, რაც დაადასტურა ინტელექტუალურ ვიქტორინაში, რომელშიც ვირუსის გამო რამდენიმე მოსწავლემ მონაწილეობა ვერ მიიღო და თავად მარიკამ მარტომ, ჯგუფის სახელით მიიღო მონაწილეობა და გაიმარჯვა კიდეც“, _ გვითხრა მარიკას მასწავლებელმა ქეთევან კუბლაშვილმა.
მოსწავლეები კი ამბობენ, რომ ყველგან და ყველაფერში აქვთ მარიკას იმედი.
„მარიკა ძალიან მეგობრული და თბილი გოგოა. უღალატო მეგობარია, ყველაფერში რომ შეიძლება ენდო და დაეყრდნო ისეთი. კლასში თუ რაიმეს ვერ გავიგებთ, გვეხმარება ხოლმე და ცდილობს, თავისი ცოდნა ჩვენც გაგვიზიაროს“, _ ამბობენ მარიკას კლასელები.
ჩვენი ახალგაზრდული გაზეთი ულოცავს მარიკა მეგრელიშვილს მიღწეულ წარმატებებს და ახალი მწვერვალების დაპყრობას უსურვებს მას.
ავტორი: მარიამ ცენტერაძე
