“მე მინდა, რომ საერთოდ გავიგო, რას აპირებს გახარია; მინდა, რომ გავიგო მისი შეფასებები, მისი გეგმების შესახებ მოვისმინო“, _ ასე უპასუხა პრემიერ-მინისტრმა ირაკლი ღარიბაშვილმა ჟურნალისტების მიერ დასმულ კითხვას გიორგი გახარიასთან დაკავშირებით.
ჟურნალისტის კითხვაზე, ეთანხმება თუ არა პრემიერი „ქართული ოცნების“ თავმჯდომარის, ირაკლი კობახიძის განცხადებას, რომ გიორგი გახარია „მატყუარა არის“ და პარტიას „ზურგში დანა ჩაარტყა“, ღარიბაშვილი აცხადებს, რომ „ყველა ადამიანის ქმედებას შესაბამისი შეფასება მიეცემა“.
„მე მინდა, რომ საერთოდ გავიგო რას აპირებს გახარია, მინდა, რომ გავიგო მისი შეფასებები, მისი გეგმების შესახებ მოვისმინო. იცოდეს ყველა ადამიანმა, მათ შორის, პოლიტიკოსებმა, რომ ყველა ადამიანის ქმედებას მიეცემა შესაბამისი განმარტება და შეფასება, ყველას და ყველაფერს დაერქმევა თავისი სახელი“, _ განაცხადა ღარიბაშვილმა.
პრემიერმა გუნდში დაძაბული ვითარება გამორიცხა და აღნიშნა, რომ ,,ქართული ოცნება“ არის ყველაზე მეტად შეკრული გუნდი.
„ნაცმოძრაობის“ შიგნით არის აბსოლუტური ქაოსი, ნახეთ რაც მოხდა, დაიბარეს მელია, სააკაშვილის ძალიან მკაცრი ლექციები წაუკითხეს და გამოუშვეს უკან. დღეს, ყველაზე მეტად შეკრული გუნდია „ქართული ოცნება“, ყველა ლიდერს, ყველას გვაქვს ნათლად გამიჯნული, განსაზღვრული ჩვენი უფლებები, ჩვენი ფუნქციები და გვაქვს სრული ერთსულოვნება, ძალიან შეკრული გუნდი ვართ, ისეთი, როგორიც არასდროს არ ყოფილა“, _ აღნიშნა ღარიბაშვილმა.
