ოზურგეთის მუნიციპალიტეტის საკრებულოს სხდომის დასასრულს საკრებულოს წევრმა „ერთიანი ნაციონალური მოძრაობიდან“ გიორგი შილაკაძემ კითხვით მიმართა თავმჯდომარეს დავით დარჩიას.
გიორგი შილაკაძე დაინტერესდა, რა ხდება ბჟუჟის ხეობაში და რამდენი ჰესის მშენებლობა იგეგმება.
გიორგი შილაკაძე: ეს საკითხი ჩვენი მოსახლეობისთვის მეტად საინტერესო და მნიშვნელოვანია. რა ინფორმაციას ფლობთ ბჟუჟის ხეობაში ჰესების მშენებლობასთან დაკავშირებით. რამდენ ლოკაციაზე იგეგმება ჰესის მშენებლობა.
დავით დარჩიამ თქვა, რომ ის დაწვრილებით ინფორმაციას ამ საკითხთან დაკავშირებით არ ფლობს.
“დაწვრილებით ასეთი ინფორმაცია ჩვენ არ გვაქვს რა და როგორ იგეგმება. ეს განხილვის საგანი იქნება აუცილებლად, “– აღნიშნა დავით დარჩიამ.
გიორგი შილაკაძემ ასევე საკრებულოს დარბაზში მყოფ ოზურგეთის მუნიციპალიტეტის მერის მოადგილეს ნათია გოლიაძეს ჰკითხა დაგეგმილი ჰესების მშენებლობის შესახებ.
ნათია გოლიაძე: არანაირი პროექტი, რომელსაც ხალხის მხრიდან არ ექნება მხარდაჭერა არ გახორციელდება დარწმუნებული იყავით.
გიორგი შილაკაძე: არ იფიქროთ, რომ მე წინაღმდეგი ვარ მშენებლობების. აუცილებელი არის მცირე ჰესების მშენებლობა, მაგრამ არ უნდა მოხდეს ისე, რომ ინფორმაციული ვაკუუმი იყოს.
დავით დარჩიას თქმით, ყველაფერი ცნობილი იქნება საზოგადოებისთვის. საუბრის დროს ოზურგეთის მუნიციპალიტეტის საკრებულოს თავმჯდომარის მოადგილე ლავრენტი ბიგვავა ჩაერთო:
„რადგან ეს საკითხი დააყენეთ (გიორგი შილაკაძეს მიმართა) შესაბამისი სამსახური შეისწავლის. აქედან გამომდინარე ყველა კითხვაზე იქნება პასუხი,“ – თქვა ლავრენტი ბიგვავამ.
ჩვენს მიერ მოპოვებული კომენტარით აღნიშნულ დაგეგმილ მშენებლობასთან დაკავშირებით გურიის სახელმწიფო რწმუნებულის ადმინისტრაცია ინფორმირებულია:
„ როგორც ჩვენთვის არის ცნობილი შპს „პარვუს ჯგუფს“ ჰქონდა და აგრძელებს შეხვედრებს მოქალაქეებთან, არასამთავრობო სექტორისა და მედიის წარმომადგენლებთან, “ – ასეთი პასუხი „გურია ნიუსმა“ გურიის სახელმწიფო რწმუნებულის ადმინისტრაციიდან მიიღო.
ერთ-ერთ შეხვედრაზე, რომელიც სოფელ გომში ჩატარდა „გურია ნიუსის“, „ალიონის“ და არასამთავრობო ორგანიზაციის „ეკოს“ წარმომადგენლები შემთხვევით აღმოჩდნენ.
„პარვუს ჯგუფის“ წარმომადგენლებმა დაგვპირდა, რომ ცალ-ცალკე შეხვედრებს გამართავდნენ მედიის და არასამთავრობო წარმომადგენლებთან, მაგრამ ამ დროისთვის არანაირი შეხვედრა არ ჩატარებულა.
ამ ეტაპზე ჩვენთვის ცნობილია, რომ ბჟუჟის ხეობაში „პარვუს ჯგუფი“ სამი მცირე ჰესის და უფრო ქვემოთ კი „ენერგი“ ერთი მცირე ჰესის მშენებლობას აპირებს.
ავტორი
