გუშინ, რუსული გამოცემა “tnv.ru” ცნობილ არბიტრ სერგეი ჰუსეინოვს გაესაუბრა. ინტერვიუს ერთი ნაწილი საქართველოს ნაკრებისა და ყაზანის “რუბინის” თავდამსხმელ ხვიჩა კვარაცხელიას შეეხებოდა.
“წინა სეზონში ყველა კუთხიდან ისმოდა _ ხვიჩა, ხვიჩა… სულ იყო საუბრები, სად წავა ის, სად? მანჩესტერში? და ადამიანი ძალაუნებურად უმცირებს საკუთარ თავს მოთხოვნებს.
ეს დამახასიათებელია კავკასიური წარმოშობის ფეხბურთელებისთვის. შედეგად რას იღებ? სათამაშო ფორმის დაკარგვას. შედეგად “რუბინის” შემადგენლობა სახელების მიხედვით კარგია, მაგრამ თამაშის მიხედვით არა და ამას დიდი მნიშვნელობა აქვს. წინა დღეს შენ “ზენიტთან” შეიძლება ძალიან მაგრად ითამაშო, მაგრამ ხვალ ყოველთვის ახალი ისტორია და თამაშია. საჭიროა ამის დადასტურება ნულიდან, მაგრამ რუსეთის ჩემპიონატის მოთამაშეების მენტალიტეტი, სამწუხაროდ, ასეთი არ არის, როგორიც ევროპის წამყვან ჩემპიონატებში”, _ განაცხადა სერგეი ჰუსეინოვმა.
შეიძლება დაეთანხმო ჰუსეინოვს, შეიძლება მისი მოსაზრება არ გაიზიარო. უმთავრესი კი მაინც ერთია _ ხვიჩა კვარაცხელიას თუ განვითარება და სერიოზული ფეხბურთის თამაში სურს, ყაზანის “რუბინს” მალე უნდა დაემშვიდობოს. გავიხსენოთ იგივე ჯანო ანანიძის მაგალითი, ან თუნდაც საბა კვირკველიასი, რომ არა რუსეთი, მათი საფეხბურთო კარიერა გაცილებით უკეთესად წარიმართებოდა.
გუშინ ცნობილი გახდა რომ “მილუოკი ბაქსის” კალათბურთელი სანდრო მამუკელაშვილი ასპარეზობას G ლიგის გუნდ “ვისკონსინ ჰერდში” განაგრძობს. მამუკელაშვილზე სარეზერვო გუნდში გამოსვლა შესაძლოა უკეთესადაც აისახოს, რადგან კლუბის ძირითადი შემადგენლობის კალათბურთელებთან კონკურენციის გაწევა ძნელი იქნება. ამიტომ “მილუოკის” სამწვრთნელო შტაბმა სწორი გადაწყვეტილება მიიღო. გარკვეული პერიოდის განმავლობაში სანდრო სათამაშო გამოცდილებას სარეზერვო გუნდთან მიიღებს, შემდეგ კი კვლავ ძირითად ნაკადს შეუერთდება.
ცოტა ხნის წინ ინგლისური “უოტფორდის” მთავარი მწვრთნელის თანამდებობაზე ქართველი გულშემატკივრისთვის კარგად ნაცობი ჩისკო მუნიოსი კლაუდიო რანიერიმ შეცვალა.
41 წლის ჩისკო უმუშევარი დიდი ხანი არ დარჩენილა. გუშინ თბილისის “დინამოს” ყოფილი მთავარი მწვრთნელი ესპანეთში დასაქმდა და მუშაობას “ლა ლიგა 2”-ში მოასპარეზე “უესკაში” გააგრძელებს. “უეასკაში” ჩისკოს დებიუტი უკვე შაბათს, 30 ოქტომბერს, “ამორებიეტას” წინააღმდეგ მატჩში შედგება.
“უესკას” ესპანეთის “ლა ლიგა 2”-ში 12 ტურის შემდეგ 15 ქულა აქვს და სატურნირო ცხრილის მე-12 პოზიციას იკავებს.
იტალიაში კი შეიძლება ახალმა საფეხბურთო სკანდალმა იფეთქოს _ საბჭომ, რომელიც იტალიური კლუბების ფინანსურ საქმიანობას აკონტროლებს, ფედერალურ პროკურატურას გადასცა მასალები 62 საეჭვო სატრანსფერო ოპერაციაზე.
იტალიური მედია რამდენიმე საყურადღებო დეტალზე ამახვილებს ყურადღებას. მაგალითად, “ნაპოლიში” ვიქტორ ოსიმენის ტრანსფერს მოჰყვა 4 ფეხბურთელის გადასვლა ფრანგულ “ლილში” სულ 20 მილიონ ევროდ. მაგრამ ოთხი ფეხბურთელიდან 2 ახლა… სერია D-შია, ერთი – სერია C-ში, ხოლო ერთიც საფრანგეთში დარჩა, ოღონდ, არ თამაშობს. ტურინის “იუვენტუსი” კი 42 სატრანსფერო ოპერაციაში ფიგურირებს. აქედან, 21 ფეხბურთელის წასვლა-წამოსვლა, რეალურად, ჯამში 90 მილიონი ევრო დაჯდა, თუმცა დოკუმენტებში 3 მილიონზე ცოტა მეტია დაფიქსირებული.
ესპანური სპორტული მასმედიის მტკიცებით, “ბარსელონაში” მომავალი სეზონისთვის მთავარი მწვრთნელის შეცვლის შესაძლებლობაზე უკვე ფიქრობენ და უმთავრეს კანდიდატად “ლივერპულის” ამჟამინდელ თავკაცს, იურგენ კლოპს განიხილავენ.
გუნდის ამჟამინდელი მთავარი მწვრთნელი რონალდ კუმანი ხელმძღვანელობის ნდობას შეინარჩუნებს, თუმცა, კლუბისა და მისი თანამშრომლობა 2022 წლის ზაფხულიდან აღარ გაგრძელდება. კატალონიური გუნდი სეზონის დასრულებამდე დაიცდის, რათა ჩამოყალიბდეს, რა შესთავაზოს 54 წლის გერმანელ სპეციალისტს, რათა ეს უკანასკნელი სამუშაოდ ესპანეთში გადაბარგებას დათანხმდეს. ამასთან, ძნელი სათქმელია, რამდენად მოინდომებს იურგენ კლოპი “ლივერპულთან” განშორებას, რომელთანაც ხელშეკრულება 2024 წლის ზაფხულამდე აკავშირებს.
საუბარი არის სხვა კანდიდატებზეც _ კატალონიური კლუბისთვის მნიშვნელოვანი ფიგურა ყოველთვის იყო და ასეთად რჩება ჩავი ერნანდესი, რომელიც ყატარულ “ალ სადს” წვრთნის. ასევე, განიხილება “ჩელსის” ამჟამინდელი მთავარი მწვრთნელის, თომას ტუხელის კანდიდატურაც, რომელსაც ლონდონურ კლუბთან ხანგრძლივი კონტრაქტი აკავშირებს.
[sexy_author_bio]
