რუსეთმა დიდწილად ამოწურა ზუსტი მართვადი იარაღის სისტემების მარაგი და სავარაუდოდ, იძულებული იქნება შეანელოს თავისი დარტყმები უკრაინის კრიტიკულ ინფრასტრუქტურაზე, – ამის შესახებ ნათქვამია ამერიკის ომის შესწავლელი ინსტიტუტის (ISW) ექსპერტების ანგარიშში.
რუსეთმა ომის დაწყების შემდეგ უკრაინის კრიტიკულ ინფრასტრუქტურაზე სარაკეტო დარტყმების ყველაზე დიდი სერია დაიწყო. უკრაინის საჰაერო ძალების სარდლობის ოფიციალურმა წარმომადგენელმა, იური იგნატმა განაცხადა, რომ რუსმა სამხედროებმა დაახლოებით 100 Kh-101 და Kh-555 საკრუიზო რაკეტა გაუშვეს უკრაინულ სამიზნეებზე, პირველ რიგში უკრაინის კრიტიკულ ინფრასტრუქტურულ ობიექტებზე.
უკრაინულმა და რუსულმა წყაროებმა განაცხადეს, რომ რუსულმა ძალებმა დარტყმა მიაყენეს ობიექტებს კიევში, ასევე რივნის, ჟიტომირის, ლვოვის, ხმელნიცკის, დნეპროპეტროვსკის, პოლტავას, ვინიცას, ოდესას, კიროვოგრადის, ჩერკასის, ვოლინის და ხარკოვის რეგიონებში.
,,15 ნოემბერს, რუსულმა სამხედროებმა, სავარაუდოდ, გამოიყენეს მისი დარჩენილი ზუსტი მართვითი იარაღის სისტემების მნიშვნელოვანი ნაწილი კოორდინირებული სარაკეტო დარტყმების დროს“, – თქვა ISW-მ.
უკრაინის გენერალური შტაბის ცნობით, უკრაინის საჰაერო თავდაცვის სისტემამ ჩამოაგდო 73 რუსული საკრუიზო რაკეტა და ყველა დრონი. 10 ოქტომბერს უკრაინის საჰაერო თავდაცვამ ჩამოაგდო 84 საკრუიზო რაკეტიდან 43 (და 13 დრონი).
ჩამოგდებული რაკეტების პროცენტული მატება მეტყველებს გასული თვის განმავლობაში საჰაერო თავდაცვის მუშაობის გაუმჯობესებაზე. უკრაინის გენერალურმა შტაბმა ეს გაუმჯობესება დასავლური საჰაერო თავდაცვის სისტემების ეფექტურობას მიაწერა.
ISW თვლის, რომ რუსული ძალები მნიშვნელოვნად ამცირებენ ზუსტი მართვადი იარაღის მარაგს. რუსეთს შესაძლოა დასჭირდეს შეანელოს თავისი კამპანია უკრაინის კრიტიკული ინფრასტრუქტურის წინააღმდეგ.
,,ამავდროულად, რუსული სარაკეტო დარტყმები კვლავაც უქმნის საფრთხეს უკრაინის მშვიდობიანი მოსახლეობიას“ , – ამბობენ ექსპერტები.
ISW-ის ცნობით, უკრაინის ენერგეტიკული ინფრასტრუქტურის დაზიანებით ნაკლებად სავარაუდოა, რომ უკრაინელების სულისკვეთება დაარღვიოს.
ავტორი
