გუშინ, იტალიაში ერთი გამოკითხის შედეგები გახდა ცნობილი. გამოცემამ „ITALPRESS“ „სერია ა-ში“ მონაწილე კლუბების მთავარი მწვრთნელები გამოკითხა. მათ უნდა ეპასუხათ კითხვებზე: მიმდინარე სეზონში ვინ გახდება იტალიის ჩემპიონი და რომელი ფეხბურთელია პირველობის აღმოჩენა.
გამოკითხვაში მონაწილეობა 17 გუნდის მთავარმა მწვრთნელმა მიიღო. პროგნოზების გაკეთებისგან თავი „ლაციოს“, „მონცასა“ და „რომას“ თავკაცებმა შეიკავეს.
სეზონის აღმოჩენა მოთამაშედ რასაკვირველია ხვიჩა კვარაცხელია დაასახელეს, რომელსაც პირველობა 17-დან 10-მა მწვრთნელმა მიაკუთვნა.
მიმდინარე სეზონში ნეაპოლელებს ჩემპიონის ტიტულის მოგება 17-იდან 14-მა მწვრთნელმა უწინასწარმეტყველა.
გუშინ, ცნობილი გახდა რომ „ნაპოლიმ“ მიმდინარე სატრანსფერო პერიოდში შესაძლოა ხორვატიის ნაკრების ფეხბურთელი იოსიპ ბრეკალო დაიმატოს, რომელიც ამჟამად გერმანულ „ვოლფსბურგში“ ასპარეზობს. 24 წლის ნახევარმცველით „უდინეზეც“ დაინტერესებულია, მაგრამ თავად ხორვატს „ნაპოლიში“ გადასვლა სურს. იოსიპ ბრეკალო მარცხენა გარემარბია, როგორც ხვიჩა კვარაცხელია და ნეაპოლში მას ქართველი ფეხბურთელის ალტერნატივად განიხილავენ. ლუჩანო სპალეტის სურს, რომ როდესაც ქართველი სათამაშოდ მზად არ იქნება, მისი შემცვლელი ჰყავდეს.
გიორგი მამარდაშვილის „ვალენსია“ კი ღრმა კრიზისშია და ესპანეთის სამეფო თასის მეოთხედფინალში ბილბაოს „ატლეტიკთან“ საშინაო მარცხის შემდეგ „მესტალიას“ სტადიონთან 1500-მდე გულშემატკივარი შეიკრიბა, რომლებმაც კლუბის ხელმძღვანელობის გადადგომა მოითხოვეს.
უკვე დიდი ხანია „ვალენსიას“ გულშემატკივრები გუნდის მფლობელის, პიტერ ლიმს კლუბის გაყიდვისკენ მოუწოდებენ, მაგრამ ის ჯერჯერობით, კლუბთან განშორებას არ აპირებს. ამჯერად, პრეზიდენტის გარდა, სამიზნე მთავარი მწვრთნელი ჯენარო გატუზო და ფეხბურთელებიც იყვნენ.
ისმოდა სხვადასხვა შეძახილები ლიმისა და გატუზოს მიმართ. გარდა ამისა, ფანებმა სტადიონის აივანზე მთელი გუნდის გამოსვლა მოითხოვეს, მაგრამ მათი ეს მოთხოვნაც არ შესრულებულა და ფეხბურთელები ქომაგების წინაშე არ გამოჩენილან.
„ვალენსიას“ მთავარმა მწვრთნელმა ჯენარო გატუზომ ესპანეთის თასზე მარცხის (1:3) შემდეგ შემდეგი კომენტარი გააკეთა.
„ბუნებრივია, რომ გულშემატკივარი გაბრაზებულია. ბოდიშს ვუხდი 45 000 ადამიანს, რომელიც სტადიონზე მოვიდა. როცა ასე ვთამაშობთ, ბოდიში უნდა მოვიხადო, როცა თასის მატჩს ასე ვთამაშობთ, პირველი პასუხისმგებელი მე ვარ. გუნდი წარმოუდგენლად შეშინებულია და ეს ძალიან რთულია. ძნელია ამ თამაშზე საუბარი, რადგან უნდა გავაანალიზოთ რა ხდება. მთელ გუნდს უნდა ვესაუბრო, მოვუსმინო მათ, გავიგო, რატომ გვეშინია და დიდი ხანია გვეშინია. დღევანდელი თამაშით, რა თქმა უნდა, ფსკერზე დავეშვით.
ჩემი მომავალი? პრიორიტეტი რინო გატუზო არაა, არ ვფიქრობ გამიშვებენ თუ არა, მთავარი მე არ ვარ, არამედ კლუბი და მისი ისტორია“, – განაცხადა ჯენარო გატუზომ.
ამასობაში, მილანის პროკურატურამ ელიოტის ფონდისგან „RedBird“-ისთვის „მილანის“ მიყიდვაზე სპეციალური გამოძიება დაიწყო. ამის საფუძველი კლუბის ყოფილი აქციონერების საჩივრები გახდა. კომპანიამ „Blue Sky“ და მისმა მფლობელმა კომპანიამ „Luxembourg Investment Company“ მილანის საქალაქო სასამართლოში კლუბის გაყიდვის დაბლოკვაზე საჩივარი შეიტანეს, მაგრამ უკანვე გატანა გადაწყვიტეს, რადგანაც კლუბის გაყიდვა აგვისტოს ბოლოს უკვე დასრულებული იყო.
„Blue Sky“-ს წარმომადგენლები აცხადებენ, რომ კლუბის გაყიდვის პროცესი გამჭვირვალე არ იყო. ამ კომპანიამ ლუქსემბურგში კიდევ ერთი საჩივარი შეიტანა, რათა მილანის გაყიდვაზე გაფორმებული კონტრაქტი გაუქმდეს.
ამერიკულმა საინვესტიციო კომპანიამ „RedBird“ „მილანი“ 1,2 მილიარდ ევროდ იყიდა ელიოტის ფონდისგან. ელიოტის ფონდმა კი „მილანი“ იტალიის პრემიერმინისტრ სილვიო ბერლუსკონისგან შეიძინა, რომელიც კლუბს 30 წლის განმავლობაში მართავდა.
გუშინ, ახლო წარსულში ცნობილმა არგენტინელმა ფეხბურთელმა სერხიო აგუერომ ზლატან იბრაჰიმოვიჩს უპასუხა და შვედი გააკრიტიკა.
თავიდანვე აღნიშნოთ, რომ მანამდე ზლატან არგენტინელი ფეხბურთელები გააკრიტიკა და თქვა, რომ ისინი ცუდად იქცეოდნენ, რის გამოც არგენტინა მსოფლიოს ჩემპიონატს ვეღარ მოიგებს.
„თუ ცუდ საქციელზე ვსაუბრობთ. იბრა ბოლო ადამიანია, რომელსაც პირის გაღება შეუძლია. სხვებზე ლაპარაკს სჯობს, საკუთარ თავზე იფიქროს. ასეთი რაღაცეების თქმას ჯობდა, პირდაპირ ეთქვა, რომ ფინალში საფრანგეთს ქომაგობდა. სანამ არგენტინაზე იდარდებს, უკეთესია საკუთარ თავზე, ქვეყანაზე და გუნდზე იფიქროს, რომელიც მსოფლიოს ჩემპიონატზე არც კი იყო.
მესიმ მოიგო მსოფლიოს ჩემპიონატი და ალბათ, ეს აწუხებს, მაგრამ უნდა აღიაროს, რომ მესი მსოფლიოში საუკეთესო ფეხბურთელია. ზლატან, ჩვენ მსოფლიოს ჩემპიონები ვართ, ფეხბურთელებმა, რომლებიც არასწორად იქცეოდნენ, თასი ასწიეს“. – განაცხადა სერხიო აგუერომ.
გუშინ, ამსტერდამის „აიაქსი“ უმწვრთნელოდ დარჩა. აუტსაიდერ „ვოლენდამთან“ საშინაო შეხვედრის ფრედ დასრულება კლუბის ხელმძღვანელობამ მთავარ მწვრთნელ ალფრედ შროდერს აღარ აპატია.
„მტკივნეული გადაწყვეტილებაა, მაგრამ ასევე აუცილებელი. კარგი სტარტის შემდეგ, ჩვენ დავკარგეთ ქულები. თამაში არასტაბილური იყო. ალფრედმა ვერ შეძლო სიტუაციის შეცვლა, ჩვენ მისი გვჯეროდა. მას ძლიერი შემადგენლობა ჰყავდა და ბოლო კვირებში უამრავი ქულა დაკარგა. სამწუხაროდ, პროგრესი ვერ დავინახეთ“, – ასეთია „აიაქსის“ ხელმძღვანელობის ოფიციალური განცხადება.
ავტორი
