იტალიის სამხრეთით მდებარე სოფელ ფალჩანო დელ მასიკოს მოსახლეობას მერმა სიკვდილი აუკრძალა.
,,ადგილობრივ მაცხოვრებლებს და სოფლის სტუმრებს ეკრძალებათ მიწიერი ცხოვრების დატოვება’’, – ნათქვამია სოფლის მერი ჯულიო სეზარე ფავას ბრძანებაში, რომელიც ძალაში მიმდინარე წლის 5 მარტს შევიდა.
ასეთი გადაწყვეტილების მიზეზი გახდა ის, რომ ფალჩანო დელ მასიკოში სასაფლაო არ არის. აქამდე სოფლის მაცხოვრებლები მეზობელი ქალაქი კარინოლას სასაფლაოთი სარგებლობდნენ. წლების მანძილზე სასაფლაოს გაფართოება იგეგმებოდა, რაც არ მოხდა. ამიტომ ფალჩანოს მერმა პრობლემის მოგვარების გზად სიკვდილის აკრძალვა აირჩია.
ფავას თქმით, სოფლის წინა ადმინისტრაციამ სასაფლაოს პროექტი შექმნა, თუმცა იგი ძალიან ძვირი ჯდებოდა და საკმარისი ფინანსების არარსებობის გამო ვერ განხორციელდა.
ადგილობრივი მოსახლეობა უკმაყოფილებით შეხვდა მერის ბრძანებას. მათ უკვე შეაგროვეს ათასზე მეტი ხელმოწერა. სოფლის ზოგიერთმა მიწათმფლობელმა კი, ბრძანების გაუქმების სანაცვლოდ მერს სასაფლაოსთვის საკუთარი მიწები შესთავაზა.
ბრძანების ძალაში შესვლის დღიდან მიღებული წესი სოფლის ორმა მაცხოვრებელმა დაარღვია და გარდაიცვალა.
მერი თავისი ბრძანების აბსურდულობას მიხვდა და უახლოეს მომავალში ინჟინრებთან ერთად სასაფლაოსთვის შესაფერისი მიწის მოძებნას გეგმავს.
