გუშინ ცნობილი გახდა, რომ მიმდინარე წლის ზაფხულში ტურინის „იუვენტუსი“ საქართველოს ეროვნული გუნდისა და ესპანური „ვალენსიას“ კარის დარაჯი გიორგი მამარდაშვილის შეძენას შეეცდება.
გამოცემა „Elgoldigital“-ის მტკიცებით, იტალიურ კლუბს მამარდაშვილი პოლონელი ვოიცეხ შჩესნის შემცვლელად სურს და მზადაა, ქართველის სანაცვლოდ 35 მილიონ ევრომდე გადაიხადოს.
„მიღებულია აზრი, რომ „ვალენსიაში“ სინგაპურელი პიტერ ლიმის გამოჩენა კატასტროფული გამოდგა, თუმცა, კარგი ამბებიც მოხდა. გუნდის სკაუტებმა რამდენიმე ფეხბურთელის აღმოჩენა მოახერხეს, რომელმაც ფასი რამდენიმე თვეში შეიძინეს. მათ შორის ყველაზე მეტად გიორგი მამარდაშვილი გამოირჩევა, რომელიც გუნდში 2021 წელს მივიდა, როდესაც მას არავინ იცნობდა, თუმცა, სულ მცირე დრო დასჭირდა იმისთვის, რომ რეალური ძალა ეჩვენებინა. „ვალენსიაში“ გადასვლის დროს მამარდაშვილის სატრანსფერო ფასი 800 ათასი ევრო იყო, სულ რაღაც წელიწადნახევრის შემდეგ კი, ის 25 მილიონი ღირს.
ამჟამად, „ვალენსიაში“ ღრმა ფინანსური კრიზისია. ამდენად, გადაწყვეტილია, რომ კლუბი ზაფხულში რამდენიმე წამყვან ფეხბურთელს დაემშვიდობება. საუკეთესო აქტივი უდავოდ მამარდაშვილია, როგორც ასაკის, ასევე სატრანსფერო ღირებულების მხრივ.
ვარაუდობენ, რომ ტურინელებს ქართველი მეკარის სანაცვლოდ 35 მილიონი ევროს გადახდა მოუწევთ.
ეს კარგად ესმით ვალენსიაში, სადაც საზაფხულო გეგმებს უკვე აწყობენ. ცხადია, რომ ქართველი მეკარის წასვლა გუნდს სირთულეებს შეუქმნის, თუმცა, სამაგიეროდ, ხაზინაში მატება იქნება. საუბარია დაახლოებით 35 მილიონ ევროზე, რომელიც „ვალენსიას“ ამოსუნთქვის საშუალება მისცემს.
იტალიური კლუბი ზაფხულში ეცდება იპოვოს ვოიცეხ შჩესნის შემცვლელი, რომლის სათამაშო დონეც სულ უფრო ეცემა.
„იუვენტუსში“ მამარდაშვილს ძალიან სერიოზულად უყურებენ, რადგანაც მასში როგორც – აწმყოს, ასევე მომავლის მეკარეს ხედავენ, თუმცა, ამავდროულად იციან, რომ „ვალენსია“ მის სანაცვლოდ სოლიდურ თანხას მოითხოვს,” – დაწერა ვებგვერდმა.
ტელეკომპანია „Sky Sport“-ის ყოველკვირეულ გადაცემა „Sky Calcio Club“-ში ხვიჩა კვარაცხელიას მიერ „ატალანტას“ კარში გატანილ გოლს დიდი დრო დაუთმეს.
ჯუზეპე ბერგომი (ვეტერანი ფეხბურთელი): „ატალანტასთან“ კვარაცხელიას მიერ გატანილი გოლი ულამაზესი იყო – ერთ-ერთი ულამაზესი, რაც კი ბოლო წლებში მინახავს. მისი შეჩერება რომ მეცადა, მეც მიწაზე დავეცემოდი. როდესაც კვარა გეთამაშება, დროს გპარავს. ის ძალიან კარგი იყო. თუ გვინდა, რომ ამ ეპიზოდში აუცილებლად მცველების ხარვეზები დავინახოთ, მაშინ ერთ-ერთი ჩემი ყოფილი მწვრთნელის სიტყვები უნდა გავიხსენო, რომელიც ამბობდა, რომ მცველმა მეტოქეს მაისურის ნომერი არ უნდა დაანახოს, შესაბამისად, არ უნდა შემობრუნდეს. ხვიჩა დრიბლინგებში კაკას მსგავსად სწრაფია? ასეთი შედარება თუ უნდა გავაკეთოთ, მაშინ ვიტყვი, რომ მსგავს რაღაცებს ფენომენი რონალდო აკეთებდა“.
პაოლო დი კანიო (ვეტერანი ფეხბურთელი): „ბრწყინვალე გოლი იყო, რომელიც მინდა კარგად გავაანალიზო: ამიტომ, საჭიროა, კიდევ ერთხელ ვნახოთ ეს გოლი, რომელშიც შესანიშნავად იმოქმედა. შეხედეთ, ის მხოლოდ რამდენიმე წამში ხედავს, ამუშავებს ბურთს და აკეთებს ცრუ მოძრაობას, რომ წავიდეს კარისკენ და მეტოქეებიც მიიზიდოს. ბურთს რბილი შეხებით ამოძრავებს და მერე ტოლოის შორდება. ამაზე ფიქრიც კი ძნელია, მითუმეტეს ამის გაკეთება – ის გენიოსია, ფანტასტიკური! ბურთს არ უყურებს, უბრალოდ იცის ყველაფერი, რაც უნდა გააკეთოს და ამას წარმოუდგენელი სისწრაფით აკეთებს. ფინტების დაწყებიდან დარტყმამდე მხოლოდ წამის მეასედები გადის. ფეხის ასეთ მოძრაობას, როგორც წესი, მეტი დრო სჭირდება. რასაც ეს ბიჭი აკეთებს, გეტყვით, რომ გველის ახალ სახეობას ეკუთვნის: ის უბრალოდ არ გშხამავს, არამედ თან გკბენს და გჭამს. გოლის მომენტის ამ წამებში ის არის არა ახალი თაობის, არამედ მომავალი თაობის კომპიუტერი. სიჩქარეში მესიც არამიწიერია, მაგრამ კვარა დრიბლინგებს ძალიან სწრაფად აკეთებს, მიუხედავად მისი დიდი გაბარიტებისა. კვარაცხელია ამას ზებგერითი სიჩქარით აკეთებს“.
ესპანურმა გამოცემამ „Okdario“ გაავრცელა ცნობა, რომ „ბარსელონას“ მთავარი მწვრთნელი ხავი ხვიჩა კვარაცხელიას შეძენას კატეგორიულად მოითხოვს.
„ხავი უკვე მომავალს გეგმავს და მისთვის პრიორიტეტული მსოფლიო ფეხბურთის ერთ-ერთ სენსაციასთან, „ნაპოლის“ ქართველ ლეგიონერ ხვიჩა კვარაცხელიასთან კონტრაქტის გაფორმებაა, რომელმაც შთამბეჭდავი თამაშით ყველა ევროპული გრანდის ყურადღება მიიპყრო. გარემარბი თავისი გუნდის სერია A-ში გალიდერებით საყოველთაო ყურადღების ცენტრში მოექცა.
„ბარსასთვის“ ევროპის ერთ-ერთი საუკეთესო ფეხბურთელის შეძენისას, კონკურენტების გარდა, დიდი პრობლემა ის იქნება, რომ ნეაპოლური კლუბის პრეზიდენტ აურელიო დე ლაურენტისს ვიქტორ ოსიმენთან ერთად გუნდის მარგალიტის გასხვისების სურვილი არ აქვს. ნიგერიელის ხელში ჩაგდება ნახევარ ევროპას უნდა. „ნაპოლიმ“ ჩემპიონის ტიტული, პრაქტიკულად, გაინაღდა და დე ლაურენტისი სახალხოდ აცხადებს, რომ თავის ვარსკვლავებს ვერ შეელევა და მათი სამსახურით დაინტერესებულ კლუბებს არანაირი თანხის სანაცვლოდ არ დაუთმობს.
თუმცა ხავი დანებებას არ აპირებს, რამეთუ თვლის, რომ კვარაცხელიას შეუძლია ის ვარსკვლავი გახდეს, რომელიც „ბარსელონას“ ჩემპიონთა ლიგაზე ბრძოლისთვის საჭირო მუხტს შესძენს. კატალონიელებს ლა ლიგის მოგება თითქმის გარანტირებული აქვთ და ხავის აზრით, არაუხო-პედრი-დემბელე-ლევანდოვსკის კვარტეტის შენარჩუნება ევროპაში კონკურენციისათვის საკმარისი არ იქნება. სპეციალისტი ირწმუნება, რომ ისეთ არაორდინარულ მოთამაშეს, როგორიც კვარაცხელიაა, შეუძლია კატალონიურ გუნდს ჩემპიონთა ლიგაზე კვლავ გასაბრწყინებლად ბიძგი მისცეს“.
ავტორი
