რამდენიმე დღის წინ, ტურინის „იუვენტუსს“ ადრე ჩამორთმეული 15 ქულა დაუბრუნეს. კლუბის საქმის განხილვა ხელახლა დაიწყო და საბოლოო გადაწყვეტილებას დაახლოებით მიმდინარე წლის მაისში ვიხილავთ.
გუშინ გამოცემამ „Gazzetta Dello Sport“ ერთი შეხედვით სენსაციური ინფორმაცია გაავრცელა – უეფა არ აპირებს იტალიის ფეხბურთის ფედერაციისთვის ლოდინს. ამ ორგანიზაციას მომდევნო სეზონისთვის კალენდრის დაგეგმვა სურს, ამიტომ, დროში შეზღუდულია. თუ ტურინული კლუბის საქმეზე იტალიაში განაჩენი ივნისამდე გაჭიანურდება, უეფა გადაწყვეტილებას დამოუკიდებლად მიიღებს და „იუვენტუსს“ ევროთასებიდან მინიმუმ 1 წლით მოკვეთავს.
„იუვენტუსს“ 15 ქულა იტალიის ეროვნულმა ოლიმპიურმა კომიტეტმა დაუბრუნა, მაგრამ საქმის განხილვა გრძელდება. განაჩენი თავიდან უნდა გამოიტანონ. ვარაუდობენ, რომ ქულებს ისევ დააკლებენ, მაგრამ უფრო ნაკლები რაოდენობით.
ბოლო რამდენიმე დღის განმავლობაში, „ნაპოლის“ შემტევი ვიქტორ ოსიმენი რამდენიმე ევროპულ კლუბს დაუკავშირეს. „ჩელსი“, „მანჩესტერ იუნაიტედი“, „ბაიერნი“, „პსჟ“ – აი, იმ გუნდების ჩამონათვალი რომლებმაც ნიგერიელ თავდამსხმელზე ნამდვილი ნადირობა გამოაცხადეს. ნეაპოლური კლუბის პრეზიდენტმა ოსიმენის გამოსასყიდ თანხად 150 მილიონი ევრო დაასახელა.
გუშინ, ერთდროულად ორი ურთიერთგამომრიცხავი ინფორმაცია გავრცელდა. თავდაპირველად დაიწერა რომ ხვიჩა კვარაცხელიას თანაკლუბელი მომავალი სეზონიდან კარიერას „პსჟ“-ში გააგრძელებდა და ეს უკვე გადაწყვეტილი ამბავი გახლდათ.
გუშინვე, მოგვიანებით, გამოცემამ „Gazzetta Dello Sport“ დაწერა, რომ ოსიმენმა შეიძლება მომდევნო სეზონშიც „ნაპოლიში“ დარჩენა გადაწყვიტოს, იმის გათვალისწინებით, რომ ლუჩანო სპალეტი გუნდში დარჩება, თვითონ კი პროექტის სათავეშია.
ნეაპოლში კი იტალიის ჩემპიონობის აღსანიშნავად ემზადებიან და „სალერნიტანასთან“ მატჩისთვის ყველა ბილეთი უკვე გაყიდულია.
ნეაპოლელი გულშემატკივრები ითხოვენ, რომ ამ თამაშისთვის „სტადიო მარადონას“ სტუმართა სექტორიც გაიხსნას. სალერნოელ ფანებზე ბილეთების გაყიდვა ხსენებული მატჩისთვის აკრძალულია, შესაბამისად, სტუმართა სექტორი ცარიელი იქნება. ვინაიდან მატჩზე დასწრების მსურველი ძალიან ბევრია, ისინი ითხოვენ, რომ დაიშვას გამონაკლისი და სტუმართა სექტორში ბილეთები „ნაპოლის“ ფანებზე გაიყიდოს.
„ნაპოლი“ „სალერნიტანას“ 29 აპრილს უნდა დაუპირისპირდეს, მაგრამ არაა გამორიცხული თამაში მეორე დღეს, კვირას გადაიტანონ. სერია A-ს ხელმძღვანელობას ჯერ საბოლოო გადაწყვეტილება არ მიუღია და საკითხზე მსჯელობა მიმდინარეობს.
მომდევნო ტურში „ნაპოლი“ „სალერნიტანას“ თუ მოუგებს, ხოლო „ლაციო“ სტუმრად „ინტერთან“ ვერ გაიმარჯვებს, ჩემპიონი ოფიციალურად გახდება.
გუშინ, იტალიური ფეხბურთის ლეგენდამ, ფაბიო კანავარომ „ნაპოლის“ შესახებ ისაუბრა.
„ხვიჩა კვარაცხელიაც და ვიქტორ ოსიმენიც უდავოდ ძლიერი ფეხბურთელები არიან, თუმცა სკუდეტო მოიგო გუნდმა და არა ამ ორმა მოთამაშემ. მაგალითად, ქართველმა და ნიგერიელმა „იუვენტუსთან“ კარგი შეხვედრა ვერ ჩაატარეს, მატჩის ბედი კი რასპადორიმ და ელმასმა გადაწყვიტეს.
ლუჩანო სპალეტიმ შეძლო და შექმნა გუნდი, რომელიც არა მხოლოდ ეფექტურად თამაშობს, არამედ გამარჯვებულის მენტალიტეტიც აქვთ. რაც შეეხება „ნაპოლის“ ჩემპიონობას გასულ წლებში, ვფიქრობ, რომ ამაში მთავარი წვლილი დიეგო მარადონას მიუძღვის“, – განაცხადა ფაბიო კანავარომ.
გუშინ ცნობილი გახდა, რომ ჩემპიონთა ლიგის ფინალი 2026 წელს შესაძლოა ამერიკის შეერთებულ შტატებში გაიმართოს.
უეფას პრეზიდენტის განცხადებით, აშშ-ში ფეხბურთი ძალიან პოპულარულია და ფინალის იქ ჩატარება შესაძლებელია.
„ეს შესაძლებელია, მსჯელობა დავიწყეთ. ფეხბურთი შეერთებულ შტატებში ძალიან პოპულარულია. ეს არის მნიშვნელოვანი და პერსპექტიული ბაზარი მომავლისთვის. ჩვენი შემოსავალი დიდია, მაგრამ ვისურვებდი, რომ უფრო დიდი იყოს, ვიდრე ახლა არის. უნდა აღინიშნოს, რომ ჩვენი ფულის 97% გუნდებზე ნაწილდება. რამაც შოკში ჩამაგდო, ის არის, რომ ევრო 2020-ს ამერიკაში უფრო მეტი ადამიანი უყურებდა, ვიდრე NBA-ს ფინალებს“,– განაცხადა ალექსანდერ ჩეფერინმა.
უეფას 2026 წლამდე ჩემპიონთა ლიგის ფინალის მასპინძელი ქალაქები უკვე დასახელებული ჰყავს. მიმდინარე სეზონში ფინალი სტამბოლში გაიმართება, გაისად ლონდონში, ხოლო 2025 წელს – მიუნხენში.
ავტორი
