საქართველოს გენერალურ პროკურატურაში ჩორჩანაში საგუშაგოს აღმართვაზე იყო კითხვები – მე განვუმარტე, რაც რეალობა იყო. ჩემთვის ეს მოვლენა უცნობი იყო, – ამის შესახებ საქართველოს ფინანსთა ყოფილმა მინისტრმა, ივანე მაჭავარიანმა ჟურნალისტებს პროკურატურაში გამოკითხვის შემდეგ განუცხადა, _ იუწყება ipn.ge.
„მე ამის შესახებ გავიგე ტელევიზიებით, რაც გააქტიურდა ეს საკითხი. მანამდე მე წარმოდგენა არ მქონდა“, – განაცხადა ივანე მაჭავარიანმა.
ჟურნალისტის კითხვაზე, თქვენ ეს ამბავი გაიგეთ მხოლოდ დადგმის შემდეგ? მაჭავარიანმა უპასუხა: „დადგმის შემდეგ არა, გავიგე რაც მედიაში გაჩნდა, ახლა, რამდენიმე კვირის წინ. მე წარმოდგენა არ მქონდა“.
კიდევ ერთ კითხვაზე, სწორი იყო თუ არა გახარიას ქმედება, მაჭავარიანმა უპასუხა, “შეფასებებს არ ვაკეთებ“. კითხვაზე, გახდება თუ არა მისი ჩვენება გიორგი გახარიას დაკავების მიზეზი, ივანე მაჭავარიანი პასუხობს: „წარმოდგენა არ მაქვს“.
როგორც ცნობილია, საქართველოს გენერალურ პროკურატურაში მიმდინარე გამოძიების ფარგლებში გამოკითხნენ: საქართველოს სახელმწიფო უსაფრთხოების სამსახურის ყოფილი უფროსი ვახტანგ გომელაური; სახელმწიფო უსაფრთხოების სამსახურის უფროსის ყოფილი მოადგილე ალექსანდრე ტაბატაძე; მთავრობის ადმინისტრაციის ყოფილი უფროსი კახა კახიშვილი; რეგიონული განვითარების და ინფრასტრუქტურის ყოფილი მინისტრი მაია ცქიტიშვილი; შიდა ქართლის ყოფილი გუბერნატორი გიორგი ხოჯევანიშვილი; წაღვლის ადმინისტრაციული ერთეულის (რომელშიც მათ შორის შედის სოფელი ჩორჩანა) გამგებელი ვაჟა ლომიძე.
ასევე, გენერალურ პროკურატურაში ჩორჩანას ეპიზოდთან დაკავშირებით მიმდინარე გამოძიების ფარგლებში გამოიკითხნენ სოფელ ჩორჩანას და წაღვლის მცხოვრებლები.
ინფორმაციისთვის, საქართველოს პროკურატურაში მიმდინარეობს გამოძიება საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე, საქართველოს სისხლის სამართლის კოდექსის 318-ე მუხლის პირველი ნაწილით, 19, 318-ე მუხლის მეორე ნაწილით, 319-ე და 321 პრიმა მუხლის მე-2 ნაწილის ,,ა“ ქვეპუნქტით.
როგორც პროკურატურაში განმარტავენ, მიმდინარე გამოძიების ფარგლებში სხვა საკითხებთან ერთად შესწავლის საგანს წარმოადგენს 2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ საქართველოს შინაგან საქმეთა ყოფილი მინისტრის, გიორგი გახარიასმიერ განხორციელებული ქმედება.
„საზოგადოებას შევახსენებთ, რომ ჩორჩანას საგუშაგოსთან დაკავშირებული საეჭვო გარემოებების შესწავლა ასევე მიმდინარეობს საქართველოს პარლამენტის დროებითი საგამოძიებო კომისიის ფორმატში, სადაც განმარტების მისაცემად იმყოფებოდა საქართველოს ყოფილი პრემიერ-მინისტრი გიორგი გახარია“, – აცხადებენ პროკურატურაში.
