31 მარტს საქართველოს პირველ პრეზიდენტს, ზვიად გამსახურდიას 80 წელი შეუსრულდებოდა. „გურია ნიუსთან“ პირველი პრეზიდენტის ვაჟი, ცოტნე გამსახურდია მამის ბურუსით მოცული გარდაცვალების დეტალების შესახებ საუბრობს. მისი თქმით, მმართველ პარტიას არ სურს, აღნიშნულ საქმეში დამნაშავე პირების, უშიშროების მაღალჩინოსნებისა თუ თანამშრომლების პასუხისგებაში მიცემა.
გამსახურდია სოფელ ხიბულაში „ქართული ოცნება – დემოკრატიული საქართველოს“ თავმჯდომარის ვიზიტსაც აფასებს და წინასაარჩევნო კამპანიას უკავშირებს.
_ ბატონო ცოტნე, „ქართული ოცნების“ ხელისუფლებაში მოსვლიდან მეშვიდე წლისთავზე პარტიის თავმჯდომარე ბიძინა ივანიშვილი ზვიად გამსახურდიას 80 წლის იუბილესთან დაკავშირებით ხობის მუნიციპალიტეტის სოფელ ხიბულაში ჩავიდა, საიდანაც საზოგადოებას გამსახურდიას მუზეუმის გახსნასა და სოფელში არსებული ინფრასტრუქტურის მოწესრიგებას დაჰპირდა. როგორ ფიქრობთ, ხიბულაში ივანიშვილის ვიზიტი სამეგრელოში ჩასატარებელ არჩევნებს უკავშირდებოდა თუ ჩასვლის თარიღი აღნიშნულთან დამთხვევა იყო?
_ბიძინა ივანიშვილი, რომელიც მეშვიდე წელია ხელისუფლებაშია, ფაქტობრივად, ამ ხელისუფლების უპირობო მმართველი და ბატონ-პატრონი გახლავთ. მას რომ მოსურვებოდა, აქამდე შეეძლო მითითება თუ ბრძანების გაცემა, ისევე, როგორც სხვა შემთხვევებში, მის მიერ კონტროლირებადი სამართალდამცავი ორგანოებისთვის რომ ზვიად გამსახურდიას მკვლელობის საკითხისადმი მეტი აქტიურობა და ბეჯითობა გამოეჩინათ. რაც შეეხება მუზეუმისა და ზვიად გამსახურდიას სახელის დაფასებას, პირველი პრეზიდენტის სახელს მომავალი თაობები ბიძინა ივანიშვილთან ერთად თუ მის გარეშე, ნებისმიერ შემთხვევაში დააფასებენ და ივანიშვილი ამ ყველაფერს რატომღაც აკეთებს მაშინ, როცა სამეგრელოში პრინციპული არჩევნებია და 2020 წლის გენერალური ბრძოლისთვის იწყება მზადება. ეს ყველაფერი წინასაარჩევნო პერიოდში ხდება. ასე იყო აქამდეც და ასეა ახლაც. არავითარი საფუძველი არ მაქვს, რომ ბიძინა ივანიშვილის სიტყვებს დავუჯერო. ჩეკების ფრიალი და ბუღალტერიის დაკავშირება ზვიად გამსახურდიას სახელთან არ არის საჭირო. სამეგრელოში მუზეუმის გაკეთებითა და ჩეკების ფრიალით ვერავის მოატყუებ.
_ 2016 წლის საპარლამენტო არჩევნების წინ ბიძინა ივანიშვილმა საქართველოს პირველ პრეზიდენტს მმართველობითი სტილი დაუწუნა და განაცხადა, ციტირება: დიდ პატივს ვცემ ზვიად გამსახურდიას, მაგრამ მართვას უნდა ცოდნა.ისე არ არის მარტო, რომ ქვეყანა გიყვარდეს და გული გეწვოდეს, ამავდროულად გამოცდილება და შესატყვისი მანერები უნდა გქონდეს“,_ აღნიშნა ივანიშვილმა. ზვიად გამსახურდიას მიმართ პარტიის ლიდერის ბოლო განცხადებებში აღნიშნული სახის სულისკვეთება აღარ იკითხება. როგორ ფიქრობთ, ივანიშვილმა გამსახურდიას მიმართ კრიტიკული დამოკიდებულება რატომ შეიცვალა?
_ ეს სასაცილოც აღარ არის, ყოველგვარი სერიოზული კრიტიკის მიღმაა, მითუმეტეს, ბიძინა ივანიშვილისგან, რომლის პარტიის წარმატებებს ჩვენი ქვეყანა ხედავს.
ადამიანები იცვლიან აზრს პერიოდულად, მაგრამ მთავარია, რამდენად გულწრფელია ეს და რამდენად უკავშირდება აზრის შეცვლა პირად სარგებელს. შეიძლება, მეც შევიცვალო აზრი, მაგრამ შევიცვალო მაშინ, როდესაც აღნიშნული ჩემთვის არავითარ მატერიალურ თუ პოლიტიკურ სარგებელს არ უკავშირდება. როდესაც ეს გადაფასება ხდება შენი ჩაფლავებული პოლიტიკისა და ჩაფლავებული მართვის კორუფციული სისტემის შექმნისას დამდგარი შედეგების გამო, ეს უკვე სხვა საკითხია.
_ზვიად გამსახურდიას გარდაცვალების საქმეზე გამოძიება 1994 წლიდან ამაოდ მიმდინარეობს და როგორც თქვენი ძმა, კონსტანტინე გამსახურდია აცხადებს, საქმე ხან თაროზე იყო შემოდებული, ხან საგამოძიებო უწყების მხრიდან გამოძიების იმიტაცია მიმდინარეობდა. როგორ ფიქრობთ, რატომ არ არსებობდა და არ არსებობს „ქართული ოცნების“ პირობებში გამოძიებისთვის საჭირო პოლიტიკური ნება?
_ მთელი რიგი ფაქტორები არსებობს, ხელისუფლებას არ სურთ ისეთი ვიღაცების შეწუხება, ვინც დაკავშირებულია ამ საქმესთან. არ უნდათ უშიშროების მაღალჩინოსნებისა თუ თანამშრომლების შეწუხება და მათი პასუხისგებაში მიცემა. ბიძინა ივანიშვილის ხელისუფლებაში ძალიან ბევრი შევარდნაძის დროინდელი მაღალჩინოსანი მშვენივრად გრძნობს თავს. შეიძლება ითქვას, რომ ბიძინა ივანიშვილის ხელისუფლება დიდწილად იდეოლოგიურად იმდროინდელ ელიტებსა და ინტელიგენციას ეყრდნობა, რომელთა პოლიტიკური გავლენები დიდწილად სწორედ ამ ხალხის იდეოლოგიაზე და მოსაზრებებზე არის დაფუძნებული. აქ არის კიდევ რუსეთისა და სხვათა ფაქტორი. თუ ასე არ არის და ვცდები. ჯერ კიდევ არის საკმარისი დრო იმისთვის, რომ ხელისუფლებამ საწინააღმდეგო დაამტკიცოს .
_მას შემდეგ, რაც ბიძინა ივანიშვილმა საქმის გამოუძიებლობას სამარცხვინო ფაქტი უწოდა, გაგიჩნდათ იმედი იმისა, რომ პირველი პრეზიდენტის გარდაცავლების საქმე „ქართული ოცნების“ მმართველობის პირობებში გამოძიებული იქნება?
_ მჯერა საკუთარი თვალების და არა დაპირებების. ძალიან ბევრი დაპირება გვაქვს მოსმენილი და კიდევ ბევრს მოვისმენთ. შეიძლება ითქვას, რომ აღნიშნულის წინააღმდეგ იმუნიტეტი გამოგვიმუშავდა. „ქართული ოცნების“ ხელშია ბურთიც და მოედანიც, თუ რამის გაკეთება უნდათ, გააკეთონ, ამაში ხელს ვერავინ შეუშლით.
