პოლონეთის უმაღლეს ლიგაში ყინულის ჰოკეის მოთამაშეს რუსეთის სასარგებლოდ ჯაშუშობაში წაუყენეს ბრალი. გავრცელებული ინფორმაციით, ის რუსეთის მოქალაქეა და 11 ივნისს, სილეზაში დააკავეს, როგორც რუსული ჯაშუშური რგოლის ნაწილი.
ინფორმაციისთვის, პოლონეთის შინაგანი უსაფრთხოების სააგენტომ (ABW) ამ დრომდე დააკავა 14 ადამიანი, რომლებიც ეჭვმიტანილია ჯგუფის წევრობაში.
ნათქვამია, რომ ყველა მათგანი პოლონეთის აღმოსავლეთით მდებარე ქვეყნების მოქალაქეები არიან და არა მხოლოდ რუსეთის.
ცნობისთვის, რუსეთსა და დასავლეთს შორის ათწლეულების განმავლობაში გაგრძელებული ჯაშუშური კონფლიქტი გაძლიერდა მას შემდეგ, რაც მოსკოვმა 2022 წლის თებერვალში უკრაინაში სრულმასშტაბიანი შეჭრა დაიწყო.
პოლონეთი უკრაინის ერთ-ერთი ყველაზე ძლიერი მოკავშირეა, რომელიც უზრუნველყოფს სამხედრო და ფინანსურ დახმარებას, ასევე მილიონობით უკრაინელ ლტოლვილისთვის.
პარასკევს გპოლონეთის იუსტიციის მინისტრმა ზბიგნევ ზიობრომ განაცხადა, რომ დაკავებული ყინულის ჰოკეის მოთამაშე ასპარეზობდა ქვეყნის ლიგა 1-ის კლუბში – სიდიდით მეორე დივიზიონიდან.
“ჯაშუში, რომელიც სპორტსმენის ნიღაბით მოქმედებდა, დაიჭირეს“, – განაცხადა პოლონეთის იუსტიციის მინისტრმა. თუმცა, დაკავებული სპორტსმენის ვინაობა არ დაასახელა.
ის ახლა წინასწარ პატიმრობაში იმყოფება. ბრალის დამტკიცების შემთხვევაში კი 10 წლამდე თავისუფლების აღკვეთა ემუქრება.
ყინულის ჰოკეის მოთამაშეს ამ დრომდე საჯარო კომენტარი არ გაუკეთებია.
რუსეთის საგარეო საქმეთა სამინისტრომ გააპროტესტა პოლონეთი სპორტსმენის დაკავების გამო. „ჩვენ მოვითხოვთ, რომ რუსულ მხარეს დაუყოვნებლივ მიეწოდოს ამომწურავი ახსნა-განმარტებები“, – განაცხადა მინისტრის პრესსპიკერმა მარია ზახაროვამ.
პარასკევს, პოლონეთის ხელისუფლებამ განაცხადა, რომ ეჭვმიტანილი ჯაშუშური რგოლი მოსკოვმა გამოიყენა სადაზვერვო საქმიანობის ჩასატარებლად, მათ შორის რკინიგზის მონიტორინგისთვის, ასევე პოლონეთისა და ნატოს სამხედრო ალიანსის წინააღმდეგ პროპაგანდის გასავრცელებლად.
პოლონეთის ხელისუფლება ასევე ამტკიცებდა, რომ რგოლმა მოამზადა დივერსიული მოქმედებები რუსეთის დაზვერვის დაკვეთით.
