,,ჩვენს მოკავშირეებთან ერთად, ჩვენ შევთანხმდებით ეკონომიკური სანქციების მასიურ პაკეტზე“, – განაცხადა ბრიტანეთის პრემიერ-მინისტრმა ბორის ჯონსონმა საგანგებო მიმართვაში.
მისი თქმით, უკრაინის პრეზიდენტს ესაუბრა და შესთავაზა გაერთიანებული სამეფოს მხარდაჭერა.
ბორის ჯონსონი აღნიშნავს, რომ ყველაზე საშინელი შიშები ახდა და ყველა გაფრთხილება რუსეთის შეჭრის შესახებ ტრაგიკულად ზუსტი აღმოჩნდა. ჯონსონმა აღნიშნა, რომ დიდი ბრიტანეთი ერთ-ერთი პირველი ქვეყანა იყო ევროპაში, რომელმაც უკრაინის დასახმარებლად თავდაცვითი იარაღი გაგზავნა და ისინი კიდევ უფრო მეტს გააკეთებენ მომდევნო დღეებში.
“დღეს, ჩვენს მოკავშირეებთან ერთად, ჩვენ შევთანხმდებით ეკონომიკური სანქციების მასიურ პაკეტზე, რომელიც დროულადაა დაგეგმილი რუსეთის ეკონომიკის შესაფერხებლად. ევროპამ ასევე უნდა შეწყვიტოს ნავთობზე და გაზზე დამოკიდებულება, რამაც პუტინს ხელი შეუწყო ზემოქმედება მოეხდინა მასზე.“ – განაცხადა ჯონსონმა
ასევე მან აღნიშნა, რომ ეს არის თავდასხმა დემოკრატიაზე მთელ მსოფლიოში
,,თუ მომდევნო თვეების განმავლობაში, თავისუფლების ცეცხლი ჩაქრება, ვიცი, რომ ის კვლავ აალდება უკრაინაში, რადგან ყველა მისი ბომბებით, ტანკებითა და რაკეტებით არ მჯერა, რომ რუსი დიქტატორი ოდესმე ჩაახშობს უკრაინელების ეროვნულ შემართებას და ვნებიან რწმენას, რომ უკრაინა უნდა იყოს თავისუფალი.“ – აღნიშნა ბრიტანეთის პრემიერმა
ცნობისთვის, რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა.
