ესტონეთის პრემიერ-მინისტრმა, კაია კალასმა რადიო თავისუფლებისთვის მიცემულ ინტერვიუში საქართველოს მთავრობის დამოკიდებულებაზე NATO-ში გაწევრიანებაზე და ევროინტეგრაციაზე საუბრისას განაცხადა, რომ საქართველოს ხელისუფლებას NATO-ში გაწევრიანების არ სჯერა და ამ დღის წესრიგს დიდად არც მიჰყვებიან.
მისი თქმით, დღეს საქართველო არის იქ, სადაც წლების წინ უკრაინა იყო, როცა ნარინჯისფერი რევოლუცია მოხდა.
მან აღნიშნა, რომ მთავრობასა და ქუჩაში გასულ ხალხს შორის რთული ურთიერთობაა, რომელსაც დასავლეთი ყურადღებით აკვირდება.
,,უკრაინასა და საქართველოს შორის განსხვავება არის ის, რომ, ჩემი აზრით, საქართველო არის იქ, სადაც უკრაინა წლების წინ იყო, როცა ნარინჯისფერი რევოლუცია მოხდა. ისინი ასევე ფართოდ მიიჩნევენ ევროპას საკუთარ მომავლად, მაგრამ ეს მათი მხრიდან რეფორმებსაც მოითხოვს. ჩემი აზრით, რთული ურთიერთობაა, მთავრობასა და ქუჩაში გამოსულ ხალხს შორის. ჩვენ ამას ყურადღებით ვადევნებთ თვალს”, – განაცხადა კალასმა.
ესტონეთის პრემიერმა, გაიხსენა საქართველოს მთავრობის მეთაურის, ირაკლი ღარიბაშვილის სიტყვები, თითქოს უკრაინაში ომის დაწყების მიზეზი ჩრდილოატლანტიკური ალიანსის გაფართოება იყო. ესტონეთის ლიდერმა აღნიშნა, რომ თვით კერძო სამხედრო კომპანია ვაგნერის ჯგუფის დამფუძნებელმა, ევგენი პრიგოჟინმაც კი აღიარა, რომ ეს ცრუ ნარატივი იყო.
,,უკრაინა და საქართველო NATO-ს მიმართებით სხვადასხვა გზებზე წავიდნენ, რადგან, ჩემი აზრით, საქართველოს ახლანდელ ხელისუფლებას ამის (NATO-ს წევრობის) არ სჯერა, ისინი ამ დღის წესრიგს დიდად არ მიჰყვებიან… Globsec-ის კონფერენციაზე საქართველოს პრემიერმინისტრი ამბობდა, რომ უკრაინის ომში დამნაშავე NATO-ა. ეს თავდაცვითი ალიანსია, NATO-ს არაფერი გაუკეთებია. უკრაინას რეალურად არაფერი გაუკეთებია რუსეთის პროვოცირებისთვის, რომ თავს დასხმოდნენ. პრიგოჟინმაც კი თქვა, რომ ეს ცრუ ნარატივი იყო”, – აღნიშნა კალასმა.
ავტორი
