ვერძი. ეს ნიშანი დამოუკიდებლობისკენ სწრაფვით არის გამორჩეული. ვერძი, როგორც წესი, ძლიერი და ჯიუტია ბუნებით. მას არ იზიდავს ოჯახური სიმყუდროვე, თუმცა ის – არაჩვეულებრივი დიასახლისია. ვერძი კეთილშობილი ნიშანია და სხვისგანაც იგივეს მოითხოვს. მისი მტერი – ერთფეროვნებაა. ამიტომაც აქვე უნდა დაივიწყონ სტანდარტული ფერის ფრჩხილის ლაქი. ვერძი – ექსპერიმენტატორია, რომელიც გარშემომყოფებს ფრჩხილის ”საბრძოლო შეფერილობის” ახალი და ახალი ვარიანტებით აოცებს. მათთვის უპრიანია მკვეთრი, ცეცხლოვანი ფერები: წითელი, ოქროსფერი, ჟოლოსფერი, ხოლო მისთვის მანიკიურის გასაკეთებლად საუკეთესო დღე სამშაბათია.
კურო სინაზითა და გრაციოზულობით გამოირჩევა. ის საკუთარ თავში დარწმუნებული ნიშანია და ძალიან მომთხოვნია საკუთარი გარეგნობის მიმართ. მას არ სჭირდება იმის კარნახი, რომ სისტემატურად უნდა ეწვიოს სილამაზის სალონს. კუროს ეს სისხლში აქვს გამჯდარი! ამასთან, კურო ძალიან რომანტიკულია და უპირატესობას ძვირფასსა და ხარისხიან ნივთებს ანიჭებს. მანიკიურისთვის უმჯობესი იქნება, თუ შეარჩევს ღია პასტელურ ფერებს, ასევე – ცისფერს, იისფერს, ლიმონისფერს, ღია ყვითელსა და მწვანეს. უძვირფასეს ფრჩხილებზე კი რეკომენდებულია, პარასკევს იზრუნონ.
ტყუპს არ შეუძლია ერთ ადგილას გაჩერება. ის ვერ იტანს ყველაფრის განსჯა-გაზომვას. თავგადასავლებისთვის ტყუპი ყველაფერზე წავა. ის მაღალი ინტელექტით გამოირჩევა და ირგვლივ ყველაფერი აინტერესებს. გარდა ამისა, მას საუკეთესო წარმოსახვის უნარი აქვს, რაც ფრჩხილის დიზაინის კეთებისას კარგად ადგება. ტყუპის მიერ ოთხშაბათს გაკეთებული მანიკიური უნდა იყოს რუხი, იისფერი, ნარინჯისფერი ან ღია ყვითელი ფერის.
კირჩხიბს შეუძლია გაიზიაროს სხვისი ტკივილი და დაეხმაროს ყველა გაჭირვებულს. ის იშვიათად სტუმრობს სილამაზის სალონებს და ურჩევნია, თავად იზრუნოს საკუთარ სილამაზეზე. მისი ფერებია – ვერცხლისფერი, ღია ნარინჯისფერი, თეთრი. სწორედ ამ ფერებს იყენებს კირჩხიბი მანიკიურის კეთებისას, უმეტესწილად, ორშაბათს.
ლომის ნიშნის ქვეშ დაბადებულები სიცოცხლით სავსენი და ამაყები არიან. მათ უყვართ ყურადღების ცენტრში ყოფნა. ყველაზე მეტად კი ძვირფას ნივთებსა და სიმდიდრეს აფასებენ. ვერ იტანენ მათ მიმართ გამოთქმულ კრიტიკას. ყოველთვის უზადოდ გამოიყურებიან, რადგან დიდ ყურადღებას უთმობენ საკუთარ გარეგნობას. არანაკლებ მნიშვნელობას ანიჭებენ ლომები მანიკიურს, რომელსაც კარგი იქნება, თუ კვირას გაიკეთებენ და შეარჩევენ ალისფერს, ნარინჯისფერსა და ყველა ტონის ყვითელ ფრჩხილის ლაქს.
ქალწულებს არ უყვართ, როცა ზედმეტ ყურადღებას იპყრობენ. მათთვის უცხოა ვნებისა და ემოციების ქარცეცხლი, თუმცა მზად არიან, ძვირფასი ადამიანისთვის მსხვერპლი გაიღონ. ქალწულის ნიშნის ქვეშ დაბადებულები უპირატესობას ”პერლამუტრ” ლაქს ანიჭებენ. ასევე, მოსწონთ თეთრი, მწვანე და ღია ცისფერი მანიკიური, რომელსაც კარგი იქნება, თუ ოთხშაბათს გაიკეთებენ.
სასწორი ყველას აოცებს თავისი ლოგიკით. ამ ნიშნის ქვეშ დაბადებულები ხშირად ღრუბლებში დაფრინავენ. ძალიან რომანტიკულები არიან და კარგად განვითარებული წარმოსახვის უნარი აქვთ, რომელსაც უმჯობესია, თუ პარასკევ დღეს მანიკიურის გასაკეთებლად გამოიყენებენ. უპიირატესობა კი უნდა მიანიჭონ ცისფერს, ლურჯს და ყველა პასტელურ ფერს.
მორიელი თავისი ტემპერამენტით გამოირჩევა. ის წინააღმდეგობებით სავსე ნატურაა, რაც, პირველ რიგში, ადამიანებთან მიმართებაში გამოიხატება. მორიელს შეუძლია ერთნი გაანადგუროს, მეორენი კი ცამდე აიყვანოს. ძირითადად, ეს დამოკიდებულია ადამიანების მათთან მიმართებაზე. ასტროლოგიის თანახმად, მორიელმა მანიკიურს სამშაბათი დღე უნდა მიუძღვნას. მისთვის იდეალური იქნება სისხლისფერი წითელი და მუქი შინდისფერი ფრჩხილის ლაქი.
მშვილდოსანი გიჟდება მხიარულ, ხმაურიან კომპანიებზე და ამის მერე არეული სახლი სულაც არ აღიზიანებს. მის გარეგნობაშიც შეიმჩნევა მოუწესრიგებლობის კვალი. თუ ეს ნიშანი ფრჩხილის მოვლას წესად გაიხდის, კარგი იქნება, თუ ამისათვის ხუთშაბათს გამოჰყოფს, ლაქის ფერად კი აირჩევს: ლურჯსა და მწვანეს (მის ყველა ტონს), შინდისფერსა და იისფერს.
თხის რქა გაწონასწორებული და მშვიდი ნიშანია, თუმცა ერთი შეხედვით. ამის მიღმა ვნება და ცეცხლოვანი ტემპერამენტი ჩქეფს, რასაც რატომღაც საგულდაგულოდ ფარავს. თხის რქა ძალიან ერთგულია, კონსერვატორია, რაც მისი ფრჩხილის ლაქის ფერების შერჩევისასაც აისახება: უპირატესობას ანიჭებს მუქ ფერებს, ისეთებს, როგორებიცაა, შავი, ლურჯი და ფერფლისფერი. ფრჩხილის მოვლის პროცედურისთვის იდეალურია შაბათი დღე.
მერწყული სწორხაზოვანია და სავსეა წინააღმდეგობებით. მას შეუძლია მთელი მონდომებით შეისწავლოს რაღაც ახალი, შემდეგ კი უცებ ყველაფერი მიატოვოს და სხვა რამეზე გადაერთოს. ეს საქციელი შეიძლება აიხსნას მხოლოდ და მხოლოდ ინტერესის დაკარგვით. ალბათ ამიტომაც არის, რომ მერწყული – ზოდიაქოს ერთადერთი ნიშანია, რომელსაც კვირაში ერთდროულად ორი დღე აქვს მანიკიურის გასაკეთებლად: ოთხშაბათი და შაბათი. ლაქის ფერები წყლის ტონშია გადაწყვეტილი: ულტრამარინი, ლურჯი და მასზე გაკეთებული მსგავსი ფერების ზოლები.
თევზები დიდ პატივს სცემენ ძვირფას ნივთებს. ეს ადამიანები სათუთები და მგრძნობიარეები არიან, თუმცა ეს არ არის მათი მთავარი იარაღი. თუ თევზების ნიშნის ქვეშ დაბადებულები მანიკიურს გაიკეთებენ ხუთშაბათს და გამოიყენებენ ზღვის ტალღის ფერს, ლილისფერსა და იისფერ ლაქებს, მომაჯადოებლები იქნებიან გარშემომყოფების თვალში.
