იმ 14 კოვიდკლინიკის ჩამონათვალში, რომელიც დარღვევებით საქმიანობდა, ოზურგეთის, ჩოხატაურისა და ლანჩხუთის „მედალფას“ კლინიკებიც მოხვდნენ, _ ამის შესახებ ინფორმაცია ტელეკომპანია „იმედმა“ რამდენიმე დღის წინ გაავრცელა. „იმედის“ ინფორმაციით, საუბარია სახელმწიფოს მიერ გაცემულ დანამატზე, რომელიც პერსონალს არ აუღიათ, რისთვისაც კანონდამრღვევ კლინიკებს ჯარიმის სახით სოლიდური თანხის, ათობით ათასი ლარის გადახდა მოუწევთ.
„გურია ნიუსი“ საკითხთან დაკავშირებით პოზიციების მოსმენას უშუალოდ კლინიკის ხელმძღვანელებისგან შეეცადა.
გაჟღერებულ ინფორმაციას შპს „მედალფას“ ოზურგეთის ხელმძღვანელმა დავით მდინარაძემ ჩვენთან სატელეფონო საუბარში არასწორი უწოდა. მისი თქმით, ამ ჩამონათვალში მათი კლინიკა არ უნდა იყოს და ეს სირცხვილია.
„არასწორი ინფორმაცია გავრცელდა. ჩვენი კლინიკა კი არის იმ 14 კოვიდკლინიკას შორის, რომელიც კანონდარღვევით საქმიანობდა, თუმცა, არ უნდა იყოს, სირცხვილია. ეს ინფორმაციაა ისევეა არასწორი, როგორც თქვენ ხართ სოფო და მე ვარ დათო. თუ რაიმე დეტალურად გაინტერესებთ, მობრძანდით და გეტყვით, ოღონდ არა ტელეფონით. ჩვენ ანაზღაურება ყველა თანამშრომელს მივეცით სწორად, ამაზე შეტანილია საჩივარი“, _ გვითხრა სატელეფონო საუბრისას დავით მდინარაძემ.
„გურია ნიუსმა“ კიდევ ერთ კანონდამრღვევ კოვიდკლინიკად მიჩნეული ჩოხატაურის „მედალფას“ ხელმძღვანელის, ანტონ ხუნდაძის პოზიციაც მოისმინა.
„ჩვენ არ ვიძლევით არც დანამატებს და არც ხელფასს, ჩვენ ვართ ქსელური ორგანიზაცია და ჩვენი ბუღალტერია თბილისშია, ადგილზე ბუღალტერიასთან შეხება არ გვაქვს. მეორეც, სახელმწიფოსგან რაც იყო გამოყოფილი დანამატი, იმაზე მეტი ეძლეოდათ ჩვენთან. ჩვენ ჰიბრიდული კლინიკა ვიყავით. იყო ორი კოვიდსაწოლი და იმ ორ საწოლზე რაც იყო დანამატი, ჯამში 130 ლარამდე, ჩვენთან, ფაქტობრივად, ორი მაგდენი, 300 ლარამდე თანხა გაიცემოდა თანამშრომლებზე. ამ საკითხზე ჩვენი კომპანიის მიერ ადმინისტრაციული სარჩელი შეტანილია და განხილვის სტადიაშია“, _ ამბობს ჩოხატაურის კლინიკის ხელმძღვანელი.
რაც შეეხება ლანჩხუთის „მედალფას“ კლინიკის ხელმძღვანელს რევაზ კვერენჩხილაძეს, მან ჩვენს სატელეფონო ზარს არ უპასუხა.
ავტორი
