მიწისქვეშა არხები და ზოგადად, სხვადასხვა სანიტარულ-ტექნიკურ ნაგებობათა სისტემა ოზურგეთში, ძირითადად, ჯერ კიდევ კომუნისტების დროინდელი და შესაცვლელია. ან განახლებული და შეცვლილი თუ არის, სხვადასხვა ადგილზე, საზოგადო თუ ცენტრალურ სივრცეში, მაინც ხდება სხვადასხვა სახის დაზიანება და ბუნებრივია, ყოველი მოქალაქე წყალმომარაგების კომპანიას მიმართავს დასახმარებლად.
ოზურგეთი გამონაკლისი არ არის, სადაც საკანალიზაციო სისტემის მოგვარებისთვის, მასშტაბური პროექტი უნდა გახორციელდეს.
საკმაოდ ძველი (თუნდაც ახალი) კანალიზაციის სისტემა : გარე (ბინების), შიდა (ქუჩის) თუ სადრენაჟო (სხვადასხვა გრუნტის წყლის გადამყვანი), ხშირად დეფორმირდება. კონკრეტული ადამიანების დაუდევრობით თუ სტიქიური მოლენების დროს, სასწრაფოდ შესაკეთებელი თუ გასაწმენდი ხდება მიწისქვეშა არხების, მილების თუ სანიტარული ნაგებობების სხვადასხვა ნაწილი.
ბუნებრივია, ამ დროს მოსახლეობის წარმომადგენლები შესაბამის სამსახურს მიმართავენ.
საქართველოს გაერთიანებული წყალმომარაგების გურიის რეგიონულ ფილიალში, შეტყობინებას ყოველთვის ეხმაურებიან, თუმცა არის შემთხვევები, როცა ადგილზე მოსული კომპანიის თანამშრომლები ერთმანეთისგან მიჯნავენ თავისი და კონკრეტული პირის საქმეს. „ეს ჩვენ არ გვეხება“, _ ამბობენ ისინი, როცა კონკრეტული დაზიანება კონკრეტულ ოჯახს და საცხოვრებელი კორპუსის თუ მიმდებარე ეზოში არსებულ სანიტარულ-ტექნიკურ გაყვანილობას ეხება.
ამ მომენტიდან იწყება ოზურგეთელთა „თავის ტკივილი“. ყველა დაეძებს „კატანკიან კაკოს“, რომელსაც ეს მეტსახელად შეარქვეს აქაურებმა და საკანალიზაციო სისტემის სხვადასხვა დაზიანებების დროს, ზოგჯერ მთელი დღის განმავლობაში დაეძებენ.
_ კაკოს დაეძებთ? _ „კ.კ.კ.“ ანუ კაკო კაპანაძე “კატანკით”, დილაადრიან გაუდგა გზას. ხშირად რიგი დგას მის ჭიშკართან. ისე წავიდა საქმე, მთელ ოზურგეთში ეს ერთი სპეციალისტია, 50 წელი იმუშავა ამ კაცმა ოზურგეთის წყალგაყვანილობის სისტემაში. როცა დაზიანებას ნახავს, უცებ ხვდება, რა არის მიზეზი, _ გვითხრეს მის სახლთან მდგომმა პირებმა, რომლებიც ამაოდ ელოდნენ სამუშაოდ წასულ კაკო კაპანაძეს.
რიგში მდგომები ამაოდ კითხულობენ კაკო კაპანაძის ტელეფონის ნომერს:
_ არ აქვს და რომც აჩუქოთ, გადააგდებს, ალბათ. იმდენი ხალხი აწუხებს, ლაპარაკს ვერ აუვა და ეტყობა, ამიტომ არ ატარებს, _ თქვა ერთმა მომლოდინემ.
როგორც იქნა, გამოჩნდა ბატონი კაკო, მკლავზე გადაკიდული „კატანკით“. მომლოდინეებს კეთილად მიესალმა და როცა ვკითხეთ, ასეთ რთულ სამუშაოს როგორ ასრულებს, ლამის, საუკუნის წინანდელი, პრიმიტიული სამუშაო ხელსაწყოებით, გაეცინა და გვითხრა, უკეთესი სადაა ან ვინმეს ადარდებს ჩემი პროფესიის ხალხი და მისი იარაღებიო?
ვის რა ადარდებს, სხვა საქმეა, ვის რა სჭირდება, ესაა მთავარი. ფაქტია, სანტექნიკოსები, მლესავები თუ ელექტრიკოსები, ასევე, ბევრი სხვა პროფესიის ადამიანთა ნაკლებობა, იმდენად თვალშისაცემია ყოველდღიურად, მალე სერიოზული პრობლემის წინაშე აღმოჩნდება საზოგადოება.
თავად კაკო კაპანაძე გვეუბნება, რომ საცაა 80 წელს მიაღწევს და 50 წელი წყალკანალის სისტემაში მუშაობდა. პარალელურად, დიდ სამეურნეო საქიანობას ეწეოდა. სოფელ გურიანთაში ჰქონდა დიდი საყანე ფართობები, ჰყავდა შინაური ფრინველი და პირუტყვი და ამ საქმეს ყველას ერთად ასწრებდა. ახლა, როცა სოფლის მეურნეობის სამუშაოებს აღარ ეძალება და ძველებურად არც შეუძლია, თავის ძველ პროფესიას დაუბრუნდა. დიდი ხანია, მხოლოდ ამ საქმეზე მუშაობს. თუმცა, ყველა სამუშაოს პრიმიტიული იარაღებით ასრულებს. ძველისძველი მსხვილი არმატურის მავთული (რის გამოც, ადგილობრივებმა „კატანკიანი კაკო“ შეარქვეს), ჩაქუჩი, ბრტყელტუჩა და კიდევ რამდენიმე ნივთია მისი ავლადიდება.
დღე არ არის, თუ კვირა, „კატანკიანი კაკო“ არ დასჭირდეთ ოზურგეთელებს.
_ თუმცა, ასე პრიმიტიული მეთოდებით მომუშავე ასაკოვან კაცს რომ თანადგომა, კარგი იარაRებიტ მომარაგება სჭირდება, არავინ ფიქრობს. მას არ ეზარება ნებისმიერ ადამიანს გაჰყვეს და პროფესიულ დონეზე შეასრულოს თავისი სამუშაო. ღმერთმა დიდხანს აცოცხლოს და შორეულ მომავალში ვინ შეასრულებს ამ საქმეს? ამ ეტაპზე კი მას რომ შეუწყონ ხელი, ხომ შეიძლება? ახალგაზდები არ მიდიან ასეთი ხელობის შესასწავლად, რადგან მიიჩნევენ, რომ არაა სასიამოვნო სამუშაო და ანაზრაურება დაბალია.
_ არავის სიამოვნებს საკანალიზაციო არხებში და მილებში მავთულებით სირბილი. ასეთი პროფესიული კადრების მომზადებაზე, სერიოზულად უნდა იფიქროს ხელისუფლებამ და რაც მთავარია, ასეთ საქმეზე მომუშავე ტექნიკოსებს, უნდა დაენიშნოთ მაღალი ხელფასი. მაგალითისთვის თუ ავიღებთ, ესპანეთში წელიწადში 90 ათსი ევრო აქვს ხელფასი ვეტექიმს. მოთხოვნად პროფესიებს, სხვადასხვა ხელობას, რომელიც ძალიან საჭიროა ყოვედღიურ ყოფაცხოვრებაში, საგანგებო ყურადღება უნდა მიექცეს, _ გვეუბნებიან პროფესიულ საქმიანობაში გამოცდილი ადამიანები: აკაკი ღლონტი, ტიფო მიქატაძე, გრამიტო მამინაშვილი. ასევე, ახალგაზრდა სპეციალისტები: ჯაბა შავიშვილი, ნიკა ლომჯარია და სხვები.
მოქალაქეთა ნაწილის აზრით, ამ საკითხის მოგვარებაზე მუნიციპალიტეტის მერიამ უნდა იფიქროს. ზედამხედველობის სამსახურმა შეისწავლოს საკითხი და საკრებულოს სხოდომაზე განიხილონ, რომელ პროფესიებზეა განსაკუთრებული მოთხოვნა ქალაქის საყოფაცხოვრებო სივრცეში. იმსჯელონ, როგორ უნდა იქნეს უზრუნველყოფილი, როგორც კარგი კადრების მომზადება, ისე მათთვის კარგი სახელფასო ანაზღაურების დანიშვნა.
თავად გამოცდილი სპეციალისტი კაკო კაპანაძეც ამბობს, რომ სახელმწიფომ უნდა უზრუნველყოს ყველანაირი საქმით და პროფესიით დაინტერესება.
_ როგორ ახერხებდნენ კომუნისტები? იმ დროში საათივით იყო აწყობილი წყალსადენის საქმე. ყოველდღე ვცხადდებოდი სამსახურში და ნახევარი საუკუნე პასუხიმგებლობით ვიმუშავე. აჯობონ და გააკეთონ უკეთესად, _ გვითხრა მან.
დაგორგლილი „კატანკა-მაშველი რგოლი“ ზურგზე მოიგდო და მორიგი სამუშაოსკენ გასწია.
[sexy_author_bio]
