ამ წუთებში საქართველოს პარლამენტში საგარეო ურთიერთობათა და ევროპასთან ინტეგრაციის კომიტეტების გაერთიანებული სხდომა მიმდინარეობს, სადაც კომიტეტის წევრები საგარეო საქმეთა მინისტრის მოადგილის ვახტანგ მახარობლიშვილის და შინაგან საქმეთა მინისტრის მოადგილეს ნინო ჯავახაძეს უსმენენ ვიზალიბერალიზაციის თემასთან დაკავშირებით.
მმართველი გუნდის ერთ-ერთი ლიდერის არჩილ თალაკვაძის განცხადებით, ოპოზიცია ცდილობს, ვიზალიბერალიზაციის პროცესს ჩირქი მოსცხოს. მისი განცხადებით, ,,ევროპული საქართველოს“ წევრები ხალხს თვალში ნაცარს აყრიან.
,,მინდა, კოლეგებს მოვუწოდო, ელემენტარული ლოგიკით შეხედონ პროცესებს, ისინი ამბობდნენ, რომ ვითომ პოლიტიკური პატიმრები, ვითომ ინტერპოლის მიერ ძებნილები ხომ არ აზიანებს ვიზალიბერალიზაციის საკითხსო. მინდა გიპასუხოთ, როცა მივიღეთ ვიზალიბერალიზაცია, ეგ მაღალი თანამდებობის პირები პასუხისმგებლობაში იყვნენ მიცემულნი და ის მაღალი თანამდებობის პირები, თქვენ რომ ახსენეთ და თქვენ რომ იცავდით, ბატონო ოთარ (კახიძე), ისინიც იძებნებოდნენ და ამ პირობებში მივიღეთ ვიზალიბერალიზაცია. თქვენ ისე აღწერეთ, თითქოს ჯერ ვიზალიბერალიზაცია მივიღეთ და მერე ევროპა დაფიქრდა, ეს ხალხი როგორ მისცეს პასუხისმგებლობაში და რატომ გადასცეს ძებნაში. ხალხს თვალში ნაცარს ნუ აყრით. სტრასბურგის არც ერთ გადაწყვეტილებაში არ წერია, რომ საქართველოში ხელისუფლებას ჰყავს პოლიტპატიმარი ‘’, _ განაცხადა თალაკვაძემ.
,,ევროპული საქართველოს“ წევრმა გიგა ბოკერიამ არჩილ თალაკვაძეს მიმართა და განაცხადა, რომ მმართველ გუნდს ილუზია აქვს, რომ ქვეყანაში და მის ფარგლებს გარეთ ყველაფერი კარგად არის.
,,ბატონი არჩილი სწორად მიხვდა, რომ დისკუსია ცუდად მიდის, არ დააკმაყოფილა მინისტრის მოადგილეების პასუხებმა და ჩათვალა, რომ უნდა გამოასწოროს ეს. მესმის, ბატონო არჩილ. შთაბეჭდილება გაქვთ, რომ ქვეყნის შიგნით ყველაფერი კარგად არის და რატომღაც უმარავი ადამიანი მიაწყდა და გარბის ამ ქვეყნიდან თავშესაფრისთვის. ქვეყნის გარეთაც ყველაფერი კარგად არის, ოღონდ რატომღაც საქართველოს აგებს სასამართლოს ევროკავშირის ქვეყნებში, მაშინ საერთოდ რაზე ღელავთ? ხალხი შეგაფასებთ“, _ განაცხადა ბოკერიამ.
