,,რა ნიშნით ინიშნებიან, რის გამო თავისუფლდებიან? – ასე ხდება მხოლოდ ისეთ ქვეყანაში, რომელშიც თავისუფლების გემო დავიწყებულია“ – ამის შესახებ “ლელოს” ერთ-ერთი ლიდერი მამუკა ხაზარაძე სოციალურ ქსელ ,,FACEBOOK”-ში წერს, რომლითაც კახა კუჭავას მიერ პარლამენტის თავმჯდომარის თანამდებობის დატოვებას გამოეხმაურა.
მისი თქმით, “მარაზმის დასამთავრებლად და ნამდვილი ქართული დემოკრატიული სახელმწიფოს ასაშენებლად” ბრძოლა გრძელდება.
“5 პრემიერი, 5 პარლამენტის თავჯდომარე 9 წელიწადში. რა სტაბილურობაზეა საუბარი, რა საგარეო ურთიერთობაზე, რა ეკონომიკურ პროგრამებზე, რა ინვესტიციაზე და რა სამუშაო ადგილებზე? რა ნიშნით ინიშნებიან, რის გამო თავისუფლდებიან? სად არის პროგრამა, სად არის ანგარიში? სად არის პასუხისმგებლობა?არაფერი ასეთი!
ასე ხდება მხოლოდ ისეთ ქვეყანაში, რომელშიც თავისუფლების გემო დავიწყებულია, რომელშიც ხმები იყიდება, რომელშიც სამართლიანი მართლმსაჯულება არ არსებობს, რომელშიც სამოქალაქო საზოგადოება დუმს, რომელშიც ქვეყნის თითქმის ყველა ინსტიტუცია მიტაცებულია ერთი კაცის მიერ…
ბრძოლა გრძელდება!
ბრძოლა ამ მარაზმის დასამთავრებლად და ნამდვილი ქართული დემოკრატიული სახელმწიფოს ასაშენებლად”,_წერს ხაზარაძე.
შეგახსენებთ, რომ პარლამენტის თავმჯდომარის პოსტიდან კახა კუჭავა 24 დეკემებრს გადადგა. რომლის შემცვლელად ,,ქართულმა ოცნებამ“ უმრავლესობის დეპუტატი შალვა პაპუაშვილი წარადგინა. ამის შესახებ პარტიის თავმჯდომარემ, ირაკლი კობახიძემ 24 დეკემბერს გამართულ სპეციალურ ბრიფინგზე განაცხადა.
მისი თქმით, კუჭავას ეს გადაწყვეტილება პარტიისთვის “გულდასაწყვეტი” იყო, თუმცა ცნობად მიიღეს.
ცნობისთვის, კახა კუჭავა, ასევე ტოვებს საპარლამენტო მანდატსაც.
