ხელოვანები მსოფლიოდან ქართველი ხალხისა და ხელოვანების მხარდასაჭერ განცხადებას ავრცელებენ.
500-ზე მეტი ხელოვანი მსოფლიოდან საქართველოს სოლიდარობის განცხადებას ავრცელებს ქართველი ხელოვანებისა და ქართველი ხალხის მიმართ პოლიციის მხრიდან უკანასკნელი კვირის განმავლობაში განხორციელებული სისასტიკის საპასუხოდ. ხელმომწერებს შორის არიან – კინორეჟისორები, თეატრის წარმომადგენლები, მუსიკოსები, მწერლები, აკადემიური სფეროს წევრები, მსახიობები და კულტურული მუშაკები სხვადასხვა ქვეყნიდან. ისინი მოუწოდებენ ხელოვანებს მთელი მსოფლიოდან შეუერთდნენ განცხადებას და თავიანთი სოლიდარობის გზავნილით დაეხმარონ ქართველ ხალხს ბრძოლაში.
„ჩვენ, ხელოვანები, კურატორები და კულტურის მუშაკები მთელი მსოფლიოდან ვართ სოლიდარულები ქართველი ხალხისა და ხელოვანების მიმართ, რომლებიც იბრძვიან რუსული იმპერიული პოლიტიკის წინააღმდეგ.
ქართველი ხალხის წინააღმდეგობა რუსული იმპერიალიზმის მიმართ არასაკმარისად არის აღიარებული. ეს განცხადება არის მცდელობა ყურადღება მივაქციოთ ქართველი ხალხის მუდმივ ჩაგვრასა და მათ ბრძოლას ტოტალიტარული რეჟიმის წინააღმდეგ.
ახლა საქართველოში ხელოვანები, აქტივისტები და კულტურული მუშაკები არიან მჩაგვრელი და სასტიკი რეჟიმის წინააღმდეგ მიმართული აჯანყების წინა ხაზზე.
ბოლო წლებში ისინი პოლიტიკური რეპრესიების სამიზნეები იყვნენ. ისინი გარიყული იყვნენ მთავარი კულტურული სივრცეებიდან, როგორიცაა – მუზეუმები, კინოცენტრები, მწერალთა სახლები და აკადემიური დაწესებულებები. სხვა მომიტინგეებთან ერთად ისინი მხარდამხარ დგანან და უპირისპირდებიან პოლიციის ძალადობას, დაკავებებს და სასტიკ ცემას.
ახალმა “ანტი-ლგბტ პროპაგანდისტულმა კანონმა” აღადგინა ცენზურა, კრიმინალიზებული გახადა ქვიარ თემი, ქვიარ ხელოვნება და ქვიარ კულტურა საქართველოში. ეს საფრთხეს უქმნის ქვიარ საზოგადოებას და ჩვენ მტკიცედ ვდგავართ მათ გვერდით.
ჩვენ აღგვაფრთოვანებს ქართველი ხალხის სიმამაცე და გამძლეობა მათ ბრძოლაში ავტოკრატიისა და ტოტალიტარული ძალადობის წინააღმდეგ. მათი წინააღმდეგობა და მონდომება შთაგვაგონებს და ჩვენ მათ გვერდით ვდგავართ ამ ბრძოლაში თავისუფლებისა და სამართლიანობისთვის” ,_ ნათქვამია განცხადებაში.
აღნიშნულ განცხადებას კვლავ უერთდებიან სხვა ხელოვანები და მათი სახელებიც დაემატება საერთო სიას. ამ ეტაპზე ხელმომწერი პირების სახელებისა და გვარების ნახვა ამ დოკუმენტში შეგიძლიათ.
წყარო: jam-news
