_ იცით, რა? _ მარად გაუხუნარი სლოგანია „ყველაფერი საუკეთესო ბავშვებს“, რომელ დროშიც არ უნდა თქმულიყო და ითქვას ეს. კომუნისტებს ხომ ბევრი რამ საუცხოო ჰქონდათ, ესეც ზუსტად და საუცხოოდ თქვეს. ნუ შეგვეშინდება ამის აღიარება. ახლა ჩვენ ვაგრძელებთ ბავშვებზე ასე ზრუნვას, _ გვეუბნება პანოზე მომუშავე ხელოვანი, პროფესიით ფარმაცევტი, ქალბატონი ლალი თავართქილაძე, რომელიც ოზურგეთში საერთაშორისო პროექტს ახორციელებს.
_ წუთით შევისვენე, დილიდან ხ ან ხარაჩოზე ვარ, ხან _ სახურავზე. ახლა წამით მიწას დავუბრუნდი… წუთშესვენება საკმარისია. რამდენი რამ დამიხატავს, მომიპირკეთებია, მაგრამ ბავშვებისთვის რასაც ახლა ვაკეთებ, ეს ყველასა და ყველაფერზე აღმატებული სახელოვნებო „საკბილო“ არის. ვფიქრობ, ყველაზე უკეთ უნდა გამომივიდეს…_ გვეუბნება, მისივე სიტყვებით რომ ვთქვათ, წუთშესვენებაზე მყოფი ქალბატონი.
არგენტინული პროექტი _ “ყველანი ერთად მსოფლიოში ბავშვთა შიმშილის დასაძლევად!” 5 კონტინენტის 58 ქვეყანას აერთიანებს. მე როცა ინტერნეტით ჩავერთე, 40 ქვეყანა იყო. ახლა კი 58-ია. ამ თემაზე შექმნილია 3000 მოზაიკური პანო. ოზურგეთი ამ პროექტში მონაწილეობის გამო, აღნიშნული მიმართულებით, მსოფლიოს ყურადღების ცენტრშია.
_ კედელზე ცალკე გამოვსახე პატარა მოზაიკური ხე, რომლის ტოტები განსაკუთრებულ ადამიანთა გვარ-სახელს წარმოაჩენს. მათ შორის უპირველესი. ირაკლი გაბედავა და ბუკა ჩხარტიშვილი იქნებიან, ჩემი ძვირფასი მეგობრები და დამხმარენი, ადამიანები, რომლებსაც საკუთარი ქალაქის სილამაზე ეამაყებათ და მთელი ძალისხმევით მეხმარებიან, _ გვეუბნება ლალი თავართქილაძე.
ეს პროექტი მომავალ წელს, გაზაფხულზე დასრულდება.
_ რა იქნება შემდგომ, როგორი იქნება გახსნის ცერემონიალი, ამაზე მერმის ვისაუბროთ. ახლა კი, საქართველოს სხვა ქალაქებშიც უნდა გავაკეთო მსგავსი მოზაიკა. მარტო ოზურგეთი არ არის ჩართული ამ პროექტში, უბრალოდ, მე ჩემი ქალაქით დავიწყე, _ გვითხრა მან.
“გურია ნიუსი“ წარმატებას უსურვებს ამ საოცარი ენერგიის და ნიჭის მქონე ქალბატონს!
