ხვალიდან თბილისში, ტრანსპორტში თანხის გადახდის ახალი სისტემა ამოქმედდება.
მაგალითად, თუ აქამდე 50-თეთრის ერთჯერადად გადახდით შესაძლებელი იყო 90 წუთის განმავლობაში ულიმიტოდ სარგებლობა საზოგადოებრივი ტრანსპორტით (მეტრო, ავტობუსი, “მარშრუტკა”), ახლა ფასი ორმაგდება და 1 ლარის გადახდა იქნება საჭირო. თუმცა შემოდის ერთწლიანი გადახდის სისტემაც.
სააბონემენტო პაკეტები ასეთი იქნება:
- ულიმიტო 90 წუთიანი ბარათი – ფასი იქნება 1 ლარი;
- ულიმიტო 1-დღიანი ბარათი – ფასი იქნება 3 ლარი;
- ულიმიტო 1-კვირიანი ბარათი – ფასი იქნება 20 ლარი;
- ულიმიტო 1-თვიანი ბარათი – ფასი იქნება 40 ლარი;
- ულიმიტო 3-თვიანი ბარათი – ფასი იქნება 100 ლარი;
- ულიმიტო 6-თვიანი ბარათი – ფასი იქნება 150 ლარი;
- ულიმიტო 1-წლიანი ბარათი – ფასი იქნება 250 ლარი.
იმ სოციალური ჯგუფებისთვის, რომლებიც შეღავათებით სარგებლობდნენ, გადახდის წესი და საფასური არ იცვლება.
უფასო და შეღავათიანი მგზავრობით მომხმარებელთა რამდენიმე კატეგორია ისარგებლებს. ესენია – თბილისში რეგისტრირებული უსინათლოები, მათი თანმხლები და გამცილებელი პირები; მოსწავლეები; უბნის ინსპექტორები და დედაქალაქის პოლიციის დეპარტამენტის ოპერატიული მთავარი სამმართველოს მოსამსახურეები; თბილისის მუნიციპალური ბაგა-ბაღების თანამშრომლები; თბილისში რეგისტრირებული სამხედრო ძალების ვეტერანები და სხვ. ამასთან, შეღავათიანი მგზავრობის ტარიფით კვლავაც ისარგებლებენ სტუდენტები, პენსიონერები და სხვა საზოგადოებრივი ჯგუფები.
მგზავრობის შეღავათიანი ტარიფით – 0.2 ლარით – კვლავაც ისარგებლებენ დედაქალაქის უმაღლესი და პროფესიული საგანმანათლებლო დაწესებულებების სტუდენტები; საჯარო ზოგადი და პროფესიული საგანმანათლებლო დაწესებულებების თანამშრომლები; პენსიონერები; დედაქალაქის საკუთრებაში არსებული პოლიკლინიკების მედპერსონალი; მანდატურები და სხვ.
მგზავრობის შეღავათიანი ტარიფი – 0.1 ლარი ასევე უცვლელი დარჩება თბილისის ტერიტორიაზე მცხოვრები სოციალურად დაუცველი მოქალაქეებისთვის, რომელთა ოჯახის სარეიტინგო ქულა 70 000 და მასზე დაბალია.
რაც შეეხება “მეტრომანის” გაუქმების შესახებ გავრცელებულ ინფორმაციას, სატრანსპორტო კომპანიაში აცხადებენ, რომ ბარათი არ უქმდება და მისით მგზავრობის ღირებულების გადახდა კვლავ შესაძლებელი იქნება.
“გურია ნიუსს” თბილისის სატრანსპორტო კომპანიაში განუცხადეს, რომ მგზავრობის საფასურის გადახდა შესაძლებელი იქნება კომერციული ბანკის ბარათებითაც, თუმცა განახლებული ტარიფით.
“ერთი მგზავრობა ეღირება ამ შემთხვევაში ერთი ლარი. სხვა ულიმიტო ბარათები რაც არის, ერთ-კვირიანი, ერთ-თვიანი, ის ტარიფები არ გავრცელდება ამათზე”,_ ამბობენ სატრანსპორტო კომპანიაში.
