ხვიჩა კვარაცხელიას „ნაპოლი“ ჩემპიონთა ლიგაში პორტუგალიურ „ბრაგასთან“ გადამწყვეტი მატჩისთვის ემზადება. ორი დღის წინ გავრცელდა ინფორმაცია, რომ ქართველ მოთამაშეს გრიპი დაემართა და იყო ალბათობა რომ ჩემპიონთა ლიგის მატჩი გამოეტოვებინა. საბედნიეროდ ხვიჩამ გრიპის პრობლემა უკან მოიტოვა.
გამოცემა „Spazio Napoli“-ს ინფორმაციით, ქართველმა ფეხბურთელმა გუშინდელ ვარჯიშში გუნდთან ერთად მიიღო მონაწილეობა, რაც იმის ნიშანია, რომ პორტუგალიური გუნდის წინააღმდეგ თამაშს მოახერხებს.
სამაგიეროდ, ვარჯიშში არ მონაწილეობდა ვიქტორ ოსიმენი, რომელიც მარაკეშში გაფრინდა, რათა აფრიკის წლის საუკეთესო ფეხბურთელის დაჯილდოების ცერემონიას დაესწროს. ოსიმენი ამ ჯილდოსთვის მოჰამედ სალაჰსა და აშრაფ ჰაკიმისთან ერთად იბრძოლებს. დაჯილდოების შემდეგ ნიგერიელი ნეაპოლში დაბრუნდება და „ბრაგასთან“ მისი თამაშის საკითხი ცხადია, ეჭვქვეშ არ დგას.
გამოცემა „Calciomercato“-ს ჟურნალისტმა დანიელე ლონგომ კი ხვიჩა კვარაცხელიაზე წერილი გამოაქვეყნა.
„ნაპოლის“ სჭირდება ნამდვილი კვარაცხელია, რომელმაც გასულ სეზონში გუნდი სკუდეტომდე მიიყვანა გოლებით, საგოლე პასით და მსოფლიო კლასის თამაშით. სეზონის განვლილ ნაწილში ნანახი ვერსია კი თითქმის ამოუცნობია: ხვიჩა „იუვეს“ წინააღმდეგ მოედანზე ყველაზე ცუდი იყო. ნერვიული, არც თუ ისე კონკრეტული და არცერთ მომენტში გადამწყვეტი. მაგრამ რა იმალება ქართველის ამ გარდაქმნის უკან? პირველ რიგში, სპალეტის წასვლამ და გარსიასთან ცუდმა ურთიერთობამ იმოქმედა. თუმცა, როგორც ჩანს, კონტრაქტზე მოლაპარაკებების ჩიხში შესვლამაც იმოქმედა.
კვარა „ნაპოლისგან“ უფრო დიდ ყურადღებას ელოდა იმ ბრწყინვალე სეზონის შემდეგ, რომლის კულმინაცია სკუდეტოს მოგება იყო. მისი აგენტები ცდილობდნენ კლუბის კარზე დაეკაკუნებინათ ხელფასის გაზრდის მოთხოვნით, მაგრამ დე ლაურენტისისგან არაფერი გამოვიდა. ერთი მხრივ, პრეზიდენტი ჯერ კიდევ 4-წლიანი კონტრაქტით სარგებლობს, მეორე მხრივ ახალ კონტრაქტზე დისკუსია მხოლოდ გაზაფხულიდან სურს. სტრატეგია, რომელსაც დივიდენდები არ მოაქვს, რადგან ქართველის სტიმულირების ნაცვლად, საპირისპირო ეფექტი აქვს, რაც მას უფრო დაუცველს და ნერვიულს ხდის. ცხადია, ბევრი დროა იმისთვის, რომ სიტუაცია შეიცვალოს და სეზონი გამოსწორდეს, მაგრამ მხარეებს შორის პირველი კონტაქტი იქნება საჭირო სამომავლო გეგმებისა და განზრახვების გასარკვევად“, – დაწერა დანიელე ლონგომ.
ხვიჩა კვარაცხელია 1.3 მილიონი ევროთი „ნაპოლის“ ერთ-ერთი ყველაზე დაბალანაზღაურებადი ფეხბურთელია.
ამის პარალელურად… გამოცემა „Il mattino“-ს მტკიცებით, ვიქტორ ოსიმენმა და დი ლაურენტისმა მიაღწიეს შეთანხმებას, რომლის საფუძველზე ნიგერიელი ხელშეკრულებას 2027 წლის ზაფხულამდე განაახლებს. ოსიმენის ხელფასი სეზონში 10 მილიონი ევრო და პლუს ბონუსები იქნება.
აურელიო დე ლაურენტისის მიზანია კონტრაქტი იანვრის დასაწყისში ოფიციალურად გაფორმდეს, სანამ აფრიკის ერთა თასი დაიწყება, სადაც ვიქტორს წასვლა და ნიგერიის ნაკრებში თამაში მოუწევს. ოსიმენის ამჟამინდელი კონტრაქტი 2025 წელს იწურება.
ესპანური გამოცემა „fichajes“-ის მტკიცებით, გიორგი მამარდაშვილის შეძენით ინგლისის პრემიერლიგის სამი კლუბია დაინტერესებული – „მანჩესტერ იუნაიტედი“, „ნიუკასლი“ და „ტოტენჰემი“.
„ქართველი კარის დარაჯი „ვალენსიაში“ ისევ მაღალ დონეზე თამაშობს და როგორც ჩანს, არიან კლუბები, რომლებსაც არ სურთ ამ შესაძლებლობის ხელიდან გაშვება. „ვალენსიის“ ფინანსური მდგომარეობის გამო პრემიერლიგის გუნდები ყურადღებით არიან, რადგან ესპანურ კლუბს დიდი ვალი აქვს და ამის გამოსასწორებლად იძულებულია, რომ ვარსკვლავები გაყიდოს. ამ ფინანსურ გაურკვევლობაში, ერთ-ერთი სახელი, რომელმაც გაიჟღერა, სწორედ გიორგი მამარდაშვილია.
22 წლის გიორგი მამარდაშვილი ბოლო სეზონებში „ვალენსიის“ ერთ-ერთი ყველაზე გამორჩეული ფიგურა გახდა. მისმა ტალანტმა და პოტენციალმა პრემიერლიგის რამდენიმე კლუბის ინტერესი გამოიწვია, რომელთა შორის „მანჩესტერ იუნაიტედი“, „ნიუკასლი“ და „ტოტენჰემი“ არიან.
სამივე ეს გუნდი ცდილობს შემდეგი სეზონისთვის მეკარის პოზიციის გაძლიერებას და როგორც ჩანს, მამარდაშვილი პერსპექტიული ვარიანტია. სისწრაფის, რეფლექსებისა და ფეხით თამაშის უნარის გამო მას ევროპულ ფეხბურთში ნათელი მომავალი აქვს. ერთ-ერთი კლუბი, რომელიც შედარებით უფრო აქტიურობს, „ნიუკასლია“, მაგრამ ვერ ვიტყვით, რომ დანარჩენ ორ გუნდთან შედარებით უპირატესობა აქვს.
„ვალენსიამ“ მამარდაშვილის გაყიდვით, შესაძლოა, დიდი შემოსავალი მიიღოს, რაც გამოიწვევს ფინანსური მდგომარეობის სტაბილიზაციას, მაგრამ, მიუხედავად ამისა, ერთ-ერთი ვარსკვლავის დაკარგვა გუნდისა და ფანებისთვის მძიმე დარტყმა იქნება.“
ავტორი
