იტალიის პირველობის 33-ე ტურში, რომის „ლაციომ“ „სასუოლო“ დაამარცხა და ხვიჩა კვარაცხელიას „ნაპოლის“ გაჩემპიონობის საკითხი დროებით კიდევ გადადო. არადა, რომ ვერ გაემარჯვა ნეაპოლური კლუბი პირველობას ოფიციალურად იზეიმებდა.
გუშინ, დილიდან, მთელი ნეაპოლი განსაკუთრებული მოლოდინით ცხოვრობდა. თბილისის დროით 22:45 წუთზე, ქალაქ უდინეში ადგილობრივი „უდინეზესა“ და „ნაპოლის“ შეხვედრა იყო დანიშნული და სპალეტის კლუბს სანუკვარი მიზნის მისაღწევად მხოლოდ ერთი ქულა სჭირდებოდა.
თუ ნეაპოლელები ტიტულს უდინეში გაინაღდებდენ, „სერია ა“-ს ისტორიაში სულ მესამე იქნებოდნენ, ვინც ეს ფინიშამდე 5 ტურით ადრე შეძლო – „იუვენტუსმა“ 4 წლის წინ და „ინტერმა“ 2006-07 წლების სეზონში.
„უდინეზე“ საკუთარ სარბიელზე რთულად დასამარცხებელი გუნდია. ბოლოს აქ მათ 15 იანვარს („ბოლონიასთან“ 1:2) წააგეს და იმის შემდეგ 3 ქულა 6 მეტოქეს არ წაუღია, „მილანს“ კი დამაჯერებლად (3:1) სძლიეს.
მართალია „ნაპოლის“ „უდინეზესთან“ გასვლითი მატჩი ჰქონდა, მაგრამ ნეაპოლში, „დიეგო არმანდო მარადონაზე“ მაინც უდიდესი ზეიმი იყო დაგეგმილი. „ნაპოლის“ სტადიონზე გრანდიოზული ეკრანი დამონტაჟდა და ტიფოზები თამაშს სტადიონზე უყურებდნენ.
აღნიშნულ ღონისძიებაზე 50 000 ბილეთი (თითო 5 ევრო ღირდა) მალევე გაიყიდა – „მარადონა“ გადაჭედილი გახლდათ.
საყვარელი გუნდის მხარდასაჭერად გულშემატკივრები უდინეშიც ჩავიდნენ და გამოცემა „Il Corriere del Mezzogiorno“-ს მტკიცებით, ადგილობრივ „დაჩია არენაზე“, რომელიც 25 952 მაყურებელს იტევს, დაახლოებით 15 000 ნეაპოლელი ტიფოზი იმყოფებოდა.
„ნაპოლი“ დანიშნულების ადგილზე მაშინ ჩავიდა, როდესაც „ლაციოსა“ და „სასუოლოს“ შეხვედრის მე-60 წუთი მიმდინარეობდა. სასტუმრო „Là di Moret“-თან გუნდს ფანები დახვდნენ. შამპანურებიც გამზადებული ჰქონდათ გასახსნელად, მაგრამ „ლაციომ“ მოიგო და ზეიმი წესით ერთი დღით გადაიდო. ფეხბურთელები გულშემატკივრებთან გარეთ არ გამოსულან, მხოლოდ ალესიო ძერბინმა გამოიხედა ფანჯრიდან. იტალიური მედიის ინფორმაციით, ქალაქი უდინე უკვე წალეკა ცისფერმა ტალღამ…
დადგა საღამო და ყველაფერი ისე განვითარდა როგორც “ნაპოლისა“ და ხვიჩა კვარაცხელიას ქართველ გულშემატკივრებს სურდათ. შეხვედრა ფრედ – 1:1 დასრულდა და ქართველი თავდამსხმელი „ნაპოლისთან“ ერთად იტალიის ჩემპიონი გახდა. „ოქროს გოლი“ ვიქტორ ოსიმენის ანგარიშზე იყო.
მე-13 წუთზე ანგარიში მასპინძლებმა გახსნეს, სლოვენიელმა სანდი ლოვრიჩმა ლამაზი გოლი გაიტანა მერეტის კარში. 22-ე წუთზე ხვიჩა კვარაცხელიასა და როდრიგო ბეკაოს ეპიზოდი VAR-ზე გადამოწმდა, თუმცა პენალტი უდინეზეს კარში არ დაინიშნა.
ამ სათამაშო მომენტთან დაკავშირებით, ცნობილმა იტალიელმა მსაჯმა ლუკა მარელიმ განაცხადა, რომ პენალტი უნდა დანიშნულიყო.
„ვერ დავეთანხმები მსაჯს, ფეხბურთელებს შორის აშკარად იყო კონტაქტი. თანაც დააკვირდით, ხვიჩას მცველი მას შემდეგ შეეხო, რაც ბურთი მეკარის საჯარიმოს მიმართულებით წაიღო“.
53-ე წუთზე ოსიმენმა ანგარიში გაათანაბრა, მეკარემ ანგისას დარტყმული მოიგერია, კვარაცხელიას დარტყმული დაიბლოკა, თუმცა ნიგერიელმა ფორვარდმა დაამატა და სეზონში 22-ე გოლი გაიტანა. სპალეტიმ ქართველი 85-ე წუთზე გამოცვალა.
„ნაპოლიმ“ იტალიის პირველობა ისტორიაში მესამედ მოიგო. პირველად ჩემპიონი 1987 წელს გახდა, შემდეგ – 1990-ში. ბოლო ტიტულის მოგების შემდეგ 33 წელიწადი გავიდა.
ეს ისტორიაში მეორე შემთხვევაა, როცა ევროპის TOP 5 ლიგებში ქართველი ფეხბურთელი ჩემპიონი გახდა. პირველად ეს კახა კალაძემ შეძლო „მილანის“ რიგებში 2003/04 სეზონში.
ხვიჩა კვარაცხელიამ ჩემპიონის ტიტული სადებიუტო სეზონში მოიგო „ნაპოლისთან“ ერთად. დიეგო მარადონამ პირველი სკუდეტო „ნაპოლიში“ თავის მესამე სეზონში მოიგო.
„ნაპოლის“ პრეზიდენტი აურელიო დე ლაურენტისი სხვა გულშემატკივრებთან ერთად ნეაპოლში, „დიეგო არმანდო მარადონაზე“ იმყოფებოდა. ისტორიული შეხვედრის დასრულების შემდეგ იქ მყოფ 55 ათასს ნეაპოლელ ტიფოზის შემდეგი სიტყვებით მიმართა:
„მადლობა, ამით დავიწყებ. თქვენ ყოველთვის მეუბნებოდით, რომ გინდოდათ მოგება და აი, ჩვენ მოვიგეთ, ყველამ ერთად. ახლა, კვირას, „ფიორენტინასთან“ დიდ წვეულებას მოვაწყობთ. კიდევ ერთხელ გიხდით მადლობას.
დღეს, კულმინაციური დღე იყო, სკუდეტო უფრო ადრე მოვიგეთ, ვიდრე მოსალოდნელი გახლდათ. კიდევ ბევრჯერ უნდა გავიმარჯვოთ. რას გვეუბნება პროექტი „ნაპოლი“? არასდროს გაჩერდეთ. ეს ჩამოსასვლელი ადგილია და არა გასამგზავრებელი. ჩვენ სპალეტიდან ვიწყებთ.
არის თუ არა ეს კულიბალის სკუდეტო? არასდროს დავივიწყებ კავანის, ლავეცის, კუალიარელას, იგუაინს. ჩვენ იტალიის ჩემპიონობისკენ წლების განმავლობაში მივდიოდით და აი შედეგიც! მათ არასდროს დავივიწყებთ“.
ავტორი
