„ნაპოლის“ მთავარმა მწვრთნელმა ფრანჩესკო კალცონამ „ტორინოსთან“ მატჩის (1:1) შემდეგ შემდეგი განცხადება გააკეთა:
„ბევრი მომენტი შევქმენით, საკუთარ კართან ცოტა მომენტი მივიღეთ. „ტორინო“ არ არის შეჩვეული ტანჯვას, მაგრამ ყველა კომპონენტში უკეთ ვითამაშეთ. გუნდზე არაფერი მაქვს სათქმელი, თუ ასე გავაგრძელებთ, შორს წავალთ.
„ბარსელონასთან“ მატჩისთვის ისე მოვემზადებით, როგორც ყოველთვის ვემზადებით. ჩვენ „ნაპოლი“ ვართ, ძლიერი გუნდი გვყავს, ჩვენი თამაში უნდა ვაჩვენოთ. ვიცით, რომ ძლიერი მეტოქე გვყავს, მაგრამ თავდაჯერებული ვართ.
კვარას სეზონის შეცვლა როგორ მოვახერხე? ის განსაკუთრებული ფეხბურთელია, ვენდობი და რასაც ვავალებ, ყველაფერს კარგად აკეთებს. თუმცა, ბევრი ფეხბურთელით ვარ კმაყოფილი, დღეს მარიო რუი ერთ-ერთი საუკეთესო იყო. მეორე ტაიმში 52 წუთიდან ბურთი თამაშში მხოლოდ 24 წუთი იყო და ეს ძალიან ცოტაა. იყო ნერვიულობის რისკი, მაგრამ ბიჭებმა მოგება ბოლომდე სცადეს“, – თქვა კალცონამ.
ხვიჩა კვარაცხელიას მიმდინარე სეზონში ყველა ტურნირზე ჩატარებულ 36 მატჩში 10 გოლი, 5 საგოლე პასი და 2 მოპოვებული პენალტი აქვს აქტივში. „ნაპოლი“ 44 ქულით მეშვიდეა და მომდევნო მატჩს ჩემპიონთა ლიგაზე „ბარსელონასთან“ ჩაატარებს.
„ტორინოს“ მთავარი მწვრთნელის, ივან იურიჩის ასისტენტმა მატეო პარომ კი საბა საზონოვზე ისაუბრა.
„საზონოვი თამაშში ჩავრთეთ, რადგან კვარას კარგად იცნობს. ის არის ბიჭი, რომელიც ძალიან ბევრს მუშაობს. შემდეგ კვარას პოზიცია შეუცვალეს და ჩვენც მოგვიწია გეგმის შეცვლა“, – თქვა პრესკონფერენციაზე პარომ.
იტალიურმა მედიამ ხვიჩა კვარაცხელიას თამაში „ტორინოსთან“შემდეგნაირად შეაფასა.
Sportmediaset 7 ქულა: „პირველ ტაიმში ცოტა გაუჭირდა მეტოქის მოტყუება და ორი დიდებული შანსი ჰქონდა გოლის გასატანად, მაგრამ მილინკოვიჩ-სავიჩმა ორჯერვე აჯობა. მეორე ტაიმში ტემპი გააძლიერა, ანგარიში შესანიშნავი გოლით გახსნა და რამდენჯერმე კვლავ დაუპირისპირდა „გრანატას“ მეკარეს“.
Tuttonapoli 7 ქულა: „მე-14 წუთზე დიდებული შანსი ჰქონდა, მაგრამ მეტისმეტად შუაში დაარტყა. გოლთან ახლოს ვარდნაში თავითაც იყო, მაგრამ მიზანს მარიო რუისთან ლამაზი სამკუთხედით მაინც მიაღწია. ერთადერთი, ვინც ყველანაირად ცდილობდა“.
Calciomercato 7 ქულა: „ის დაბრუნდა, ზედიზედ მესამე მატჩში გაიტანა. საგოლე კომბინაცია თვითონ დაიწყო და დაასრულა. ბოლომდე მაღალი დონის ხარისხით ცდილობდა, ყოველთვის სურდა ბურთი და დუბლთან ახლოს რამდენჯერმე იყო. ერთადერთი ნაკლი მის თამაშში დასაწყისში გამოუყენებელი მომენტია“.
Eurosport 7.5 ქულა: „მხოლოდ ბრწყინვალე მილინკოვიჩ-სავიჩმა არ შეასრულებინა დუბლი ან თუნდაც ჰეთ-თრიქი. თამაში, რომელშიც მან ყველაფერი კარგად გააკეთა“.
Tuttomercatoweb 7.5 ქულა: „ერთ დღეს, როცა ის მოახერხებს საბოლოო ფაზაში ცივსისხლიანად მოქმედება მეტოქის საჯარიმოში, მსოფლიოს ერთ-ერთ საუკეთესო ფეხბურთელზე ვისაუბრებთ. მხოლოდ ეს ბოლო ნაბიჯი აკლდება და მატჩის დასაწყისში გამოუყენებელი მომენტი სწორედ ამაზე მიანიშნებს. გოლი მაინც გაიტანა, არც ისე ბანალური. მატჩის მიწურულს გუნდი მხრებით ატარა და პრაქტიკულად ყველგან იყო. ისევ საუკეთესო“.
ვეტერანმა იტალიელმა ფეხბურთელმა მასიმო ამბროზინიმ „ნაპოლი“ – „ტორინოს“ მატჩის შემდეგ ხვიჩა კვარაცხელიაზე ისაუბრა.
„თამაშზე ზეგავლენის მოხდენის სურვილი მისი მხრიდან ყოველთვის არსებობდა, უბრალოდ, ახლა ეს უკეთ გამოსდის. უნდა ითქვას, რომ ამჟამად ფიზიკურ კონდიციის თვალსაზრისითაც უკეთესადაა. კოფი ჯიჯის წინააღმდეგ ერთი-ერთზე თამაში რთულია და მოედნიდან მისი გასვლის შემდეგ უფრო მეტი ინიციატივა გამოავლინა. კვარაცხელიასგან კიდევ ერთი შესანიშნავი თამაში ვიხილეთ“, – თქვა ამბროზინიმ.
„ნაპოლი“ – „ტორინოს“ შეხვედრის შემდეგ ნეაპოლური კლუბის განაპირა მცველმა მარიო რუიმ გამოცემასთან „Dazn“ მატჩი შეაფასა და კომენტარი ხვიჩა კვარაცხელიაზეც გააკეთა.
“ბოლო პერიოდში მეც, “კვარასაც” და სხვა ფეხბურთელებსაც საკუთარი თავის რწმენა დაგვიბრუნდა. ქართველი განსაკუთრებული მოთამაშეა, მასში ყველაზე მეტად ის მომწონს, რომ მოედანზე სპექტაკლის დადგმა შეუძლია”, – განაცხადა მარიო რუიმ.
13 მარტს, ჩემპიონთა ლიგის მერვედფინალური ეტაპის განმეორებით მატჩში “ბარსელონა” “ნაპოლის” უმასპინძლებს. კატალონიური გუნდის მთავარმა მწვრთნელმა ხავი ერნანდესმა მოახლოებული შეხვედრის შესახებ ისაუბრა.
“სამშაბათს განსხვავებული მატჩი გვექნება, “ნაპოლი” ხუთი მცველით არ გვეთამაშება, როგორც ეს “მალიორკამ” გააკეთა. მეტოქე განსხვავებული დონის იქნება, თუმცა ამისთვის მზად ვართ. ბიჭები შესანიშნავ ფორმაში არიან. ზოგადად ჩემპიონთა ლიგაზე მცირე შეცდომაც კი შესაძლოა, საბედისწერო აღმოჩნდეს, ამიტომ ყურადღებით უნდა ვიყოთ”, – განაცხადა ხავიმ.
გუნდებს შორის გამართული პირველი შეხვედრა ფრედ 1:1 დასრულდა.
ავტორი
