გუშინ იტალიურ მასმედიასთან, ვეტერანმა იტალიელმა ფეხბურთელმა მასიმო ბრამბატიმ საინტერესო განცხადება გააკეთა:
„იუვენტუსის“ ბოსების ადგილას დი მარიას არ შევინარჩუნებდი. ეკონომიკური საკითხი ტექნიკურთან შერწყმული უნდა იყოს. სეზონის განმავლობაში რამდენი ხანი არ იყო ტრავმირებული დი მარია? სამი თვე მაინც გამოტოვა და ასეთი ფეხბურთელის ხელფასი 7 მილიონია. უმჯობესია კვარაცხელია იყიდო. ჯუნტოლიმ აჩვენა, რომ კარგი იყო, სხვებმა ეს ვერ გააკეთეს“, – განაცხადა მასიმო ბრამბატიმ.
არგენტინელ დი მარიას, რომელიც „იუვენტუსმა“ გასულ წელს უფასოდ დაიმატა, ხელშეკრულება მიმდინარე სეზონის ბოლოს ეწურება.
გუშინ, ასევე საინტერესო ინფორმაცია გამოაქვეყნა გამოცემამ „La Repubblica“. აღმოჩნდა რომ „ნაპოლის“ ამჟამინდელი მთავარი მწვრთნელი ლუჩანო სპალეტი კიდევ ერთი სეზონის განმავლობაში კლუბში დარჩენასა და კონტრაქტის განახლებასთან ახლოსაა.
დე ლაურენტისი და ლუჩანო სპალეტი მოლაპარაკებებს აწარმოებენ და დიდი შანსია კონტრაქტი 2025 წლის ზაფხულამდე გახანგრძლივდეს, თანაც ლუჩანოს ხელფასი გაიზარდოს.
გამოცემა „Tuttomercatoweb“-ის მტკიცებით, „ნაპოლი“ გუნდის კაპიტან ჯოვანი დი ლორენცოს ხელშეკრულებას გაუხანგრძლივებს. მხარეებს შორის მოლაპარაკებები წარმატებით მიმდინარეობს, რომლის თანახმად, ჯოვანი კლუბთან კონტრაქტს 2026 წლის ზაფხულამდე გაახანგრძლივებს, 2027 წლამდე განახლების ოფციით.
ჯოვანი დი ლორენცო „ნაპოლიმ“ 2019 წელს „ემპოლიდან“ დაიმატა და მას შემდეგ 181 მატჩში 12 გოლის გატანა მოახერხა.
გუშინ, „ნაპოლის“ პრეზიდენტმა აურელიო დე ლაურენტისმა იტალიურ მედიას ვრცელი ინტერვიუ მისცა:
„ეს არის სკუდეტო, რომელიც ნეაპოლელებს აჯილდოებს, ისინი მას 33 წელი ელოდნენ და ამიტომ, მომავალშიც შეგვიძლია დიდი მიზნები დავისახოთ. ერთი იდეა მაქვს: რატომ ვთამაშობთ ზამთარში თოვლთან, წვიმასა და სეტყვასთან ერთად? არ შეიძლება სეზონი 1 აპრილს დავიწყოთ? ეს სააპრილო ხუმრობა არაა, არამედ აუცილებლობა. აპრილიდან ოქტომბრის ბოლომდე 7 თვეა და შესაძლებელია ამ დროს შიდა ჩემპიონატებისა და ევროთასების ჩატარება, ნოემბრიდან მარტამდე კი ფეხბურთელებს 5 თვე დარჩებათ დასასვენებლად, ეროვნულ ნაკრებებში სათამაშოდ.
ფიფა და უეფა დომინანტური პოზიციიდან მოქმედებენ და მათ არავინ არაფერს ეუბნება. ისინი ჩვენთან ერთად უნდა დასხდნენ მაგიდასთან და პატივი სცენ ჩვენს ლიგებს, რადგან ტიფოზები მას ევროტურნირებსა და ეროვნულ ნაკრებებზე წინ აყენებენ. მყავს მოთამაშეები, რომლებსაც ნაკრებებში ხანგრძლივი მგზავრობა უწევთ. 48 საათი სამხრეთამერიკაში ან აზიაში და მეორე დღეს ჩვენთან თამაშობენ, ეს სიგიჟეა.
ჩემი გუნდისთვის არა მხოლოდ ოსიმენი და კვარა არიან მნიშვნელოვანი ფეხბურთელები, ასევე სხვებიც, კაპიტანი დი ლორენცო საოცარია, უაღრესად თავაზიანი, რომლის იმედი ყოველთვის შეიძლება გქონდეს. სპალეტი კი წინამძღოლია, ყველამ და ყოველთვის უნდა ისწავლოს მისგან.
დარწმუნებული ვარ, რომ მომდევნო სეზონისთვის ყველა მათგანს შევინარჩუნებ, მაგრამ მხოლოდ ეს არ არის: მინდა სხვებიც დავიმატო. მინდა გუნდში მყავდეს ამერიკელი ფეხბურთელი, თუნდაც მათი ჩემპიონატი მაღალი დონის არ იყოს, ეროვნული ნაკრები მაღალი დონისაა. ასევე მინდა იაპონელი ფეხბურთელი, უკვე გვყავს სამხრეთკორეელი. თუმცა, არ მსურს რომელიმე ჩვენი ფეხბურთელის გაყიდვა.
რაც ანჩელოტის და გატუზოს დროს მოხდა, ამან ვერ დამარწმუნა. ასე რომ, საბოლოოდ გადავწყვიტე გუნდიდან გამეშვა ყველა ის ფეხბურთელი, რომელიც დემოტივირებული ჩანდა. ვიგრძენი სიახლის საჭიროება. კვარაცხელიას 3 წელი ვაკვირდებოდით, მაგრამ კოვიდის პერიოდი იყო და საკმარისი ფული არ გვქონდა, რადგან კოვიდის გამო 258 მილიონი დავკარგეთ. დიდი თანხა მოითხოვეს მის ტრანსფერში, მერე რაღაცები შეიცვალა და ჯუნტოლიმ ძალიან კარგად იმუშავა, რომ 11 მილიონად დაიმატა. ოსიმენს ჰქონდა ჯანმრთელობის პრობლემები და აღდგენა მოახერხა.
სპალეტი? მას ჯერ კიდევ რუსეთში მუშაობის დროს ვაკვირდებოდი, ბევრჯერ შევთავაზე „ნაპოლიში“ მუშაობა. ერთხელ მილანში წავედი მის სანახავად. ვუთხარი, რომ გატუზოსთან რა მოხდებოდა არ ვიცოდი, ამიტომ მსურდა მზად ყოფილიყო. მან კი მიპასუხა: მე ივნისიდან ვიმუშავებ, სეზონის მიმდინარეობისას ამის სურვილი არ მაქვს. ამიტომ, სეზონის დასრულებას დაველოდე“, – განაცხადა დე ლაურენტისმა.
ესპანური გამოცემა „Eldesmarque“-ის ინფორმაციით, გიორგი მამარდაშვილის თამაშებს „ვალენსიას“ სტადიონზე სისტემატურად აკვირდებიან „ვესტ ჰემის“, „კრისტალ პალასისა“ და „ლესტერ სიტის“ წარმომადგენლები.
მამარდაშვილის გარდა ინტერესის სფეროში ამერიკელი ნახევარმცველი იუნუს მუსაც გახლავთ.
„იუნუს მუსა და გიორგი მამარდაშვილი „ვალენსიას“ ყველაზე ძვირფასი მოთამაშეები არიან სატრანსფერო ბაზარზე. მათი თვისებებიდან გამომდინარე კი ისინი ყველაზე მეტად პრემიერლიგას ერგებიან. ორივე ფეხბურთელის დამატება სურთ რამდენიმე ინგლისურ კლუბს, გიორგის აგენტიც პრემიერლიგის კლუბებს შეხვდა.
ინგლისური კლუბები „ვალენსიას“ წარუმატებელი სეზონის მიუხედავად ამ ფეხბურთელებს აქტიურად აკვირდებიან. აქ იყვნენ „ლივერპულის“, „მანჩესტერ სიტის“, „არსენალის“ წარმომადგენლებიც, მაგრამ არის სამი გუნდი, რომელიც იუნუსის და გიორგის მატჩებს არ ტოვებს: ესენი არიან „ლესტერი“, „ვესტ ჰემი“ და „კრისტალ პალასი“. მათი სკაუტები იმდენად ხშირად ესწრებიან „ვალენსიას“ თამაშებს, როგორც ამ გუნდის ყველაზე დიდი ფანატიკოსები.
სამივე გუნდი სატურნირო ცხრილის ქვედა ნაწილშია, მაგრამ ეკონომიკური პოტენციალი სამივეს აძლევს საშუალებას ფსონი დადონ ამერიკელ ნახევარმცველზე ან ქართველ მეკარეზე და შეუძლიათ „ვალენსიას“ ფინანსური მოთხოვნების დაკმაყოფილება.
ნებისმიერ გუნდს მოუწევს მოლაპარაკებების მაგიდასთან დაჯდომა, ვისაც იუნუსის ან გიორგის შეძენა სურს, რადგან „ვალენსიას“ საბედნიეროდ, ორივეს კლუბთან კონტრაქტი აკავშირებს. ამერიკელის ხელშეკრულება ძალაში 2026 წლამდეა და გამოსასყიდი ფასი 100 მილიონია, ხოლო გიორგიმ ახლახან გაახანგრძლივა კონტრაქტი 2027 წლამდე და მისი გამოსასყიდი ფასიც 100 მილიონია“, – დაწერა გამოცემამ.
ავტორი
