გუშინ, გამოცემამ „Il Mattino“ გაავრცელა ცნობა, ხვიჩა კვარაცხელია „ნაპოლისაგან“ ახალი კონტრაქტის განახლების სანაცვლოდ ხელფასის მკვეთრ მატებას ითხოვს.
ქართველის საფეხბურთო აგენტმა მამუკა ჯუღელმა აურელიო დე ლაურენტისთან თავიანთი პოზიცია დააფიქსირა და სეზონში 5 მილიონი ევრო მოითხოვა.
ამჟამად კვარას ხელფასი მხოლოდ 1.2 მილიონი ევროა, რითაც ხვიჩა „ნაპოლიში“ ერთ-ერთი ყველაზე დაბალანაზღაურებადი ფეხბურთელია.
კვარაცხელიამ გასულ სეზონში 43 მატჩში 14 გოლი გაიტანა, 14 საგოლე პასი გააკეთა და 5-ჯერ თერთმეტმეტრიანი მოიპოვა. მას ნეაპოლურ კლუბთან ხელშეკრულება 2027 წლის ზაფხულამდე აკავშირებს.
„ნაპოლიმ“ კი სეზონი „ფროზინონესთან“ მოგებით დაიწყო (3:1), რაც ვიქტორ ოსიმენის დუბლის დამსახურებაა. მატჩის შემდეგ ოსიმენმა ტელეკომპანია „DAZN“-თან ისაუბრა:
„მნიშვნელოვანი იყო კარგად დაწყება, ვულოცავ გუნდს, მაგრამ ასევე „ფროზინონეს“, რომელმაც კარგად ითამაშა. მიხარია, რომ გამარჯვებაში წვლილი ორი გოლით შევიტანე, ასე უნდა გავაგრძელოთ. მნიშვნელოვანია, რომ მწვრთნელს ჩემი სჯერა და ამ ნდობას მოედნიდან ვპასუხობ, გუნდისთვის ყველა მნიშვნელოვანი ფეხბურთელია, მთავარია გუნდის ერთიანობა“.
შემდეგ მას თავის მომავალზე ჰკითხეს:
„ბევრი სპეკულაცია იყო. აქ უფროსი პრეზიდენტია. მოლაპარაკებებს ვაწარმოებთ. ამჟამად „ნაპოლის“ ფეხბურთელი ვარ და ჩემი გუნდისთვის გულით თამაშს გავაგრძელებ. ვნახოთ, რა მოხდება სატრანსფერო ბაზრის ბოლომდე“.
ცნობილი გახდა, რომ „ნაპოლის“ „აინტრახტის“ ნახევარმცველის, იესპერ ლინდსტრომის დამატება სურს.
დე ლაურენტისი მზადაა 23 წლის დანიელ ფეხბურთელში გერმანულ კლუბს 25 მილიონი ევრო გადაუხადოს. ლინდსტრომი „ნაპოლიში“ ირვინგ ლოსანოს შემცვლელად ესახებათ, რომლის მომავალი ჯერაც უცნობია.
იესპერ ლინდსტრომმა კარიერა „ბრონდბიუში“ დაიწყო, 2021 წლიდან კი „აინტრახტის“ მაისურით 78 მატჩში 14 გოლის გატანა მოახერხა. დანიის ნაკრებში მას 10 შეხვედრაში 1 გოლი აქვს გატანილი.
ლუჩანო სპალეტიმ კი იტალიის ნაკრები ოფიციალურად ჩაიბარა. იტალიის ფეხბურთის ფედერაციამ დაადასტურა, რომ რობერტო მანჩინის სწორედ ტოსკანელი სპეციალისტი შეცვლის.
„მივესალმოთ ლუჩანო სპალეტის! ეროვნულ ნაკრებს დიდი მწვრთნელი სჭირდებოდა და ძალიან ბედნიერი ვარ, რომ მან აიღო ეს პასუხისმგებლობა. ლუჩანოს ენთუზიაზმი და გამოცდილება ფუნდამენტური იქნება იმ გამოწვევებისთვის, რომლებიც იტალიის ნაკრებს უახლოეს თვეებში ელის“, – განაცხადა იტალიის ფეხბურთის ფედერაციის პრეზიდენტმა გაბრიელე გრავინამ.
მხარეებს შორის კონტრაქტი 2026 წლის მსოფლიოს ჩემპიონატის ბოლომდე გაფორმდა, სპალეტის ხელფასი წელიწადში 3.2 მილიონი ევრო იქნება. ფედერაციის ვებ-გვერდზე ნათქვამია, რომ ლუჩანო მუშაობას 1-ლი სექტემბრიდან დაიწყებს. მისი პრეზენტაციაც სწორედ სექტემბრის დასაწყისში მოხდება, როდესაც იტალიის ნაკრები ევრო 2024-ის საკვალიფიკაციო ეტაპის მატჩებისთვის შეიკრიბება. ეროვნული გუნდი, რომელსაც შესარჩევში მხოლოდ 3 ქულა აქვს (ორ მატჩში), მომდევნო მატჩებს 9 და 12 სექტემბერს, ჩრდილოეთ მაკედონიისა და უკრაინის ნაკრებებთან ჩაატარებს.
სატრანსფერო ფანჯრის დახურვამდე რვა დღე რჩება, გიორგი მიქაუტაძის მომავალი კი ისევ გაურკვეველია.
მიქაუტაძის შესაძლო წასვლაზე „მარსელთან“ მატჩის შემდეგ ფრანგული კლუბის მთავარმა მწვრთნელმა ლაშლო ბოლონიმ საჯაროდ ილაპარაკა და აღნიშნა, რომ ამის დიდი შანსია.
გამოცემა „Le10Sport“ ვარაუდობს, რომ „მარსელთან“ „მეცში“ მიქაუტაძემ ბოლო თამაში ჩაატარა. გიორგის არაერთ გუნდს უკავშირებენ. აქედან, „მარსელში“ თავდამსხმელის დამატებაზე კლუბის ხელმძღვანელობამ უკვე თანხმობა გასცა, მას მერე, რაც ჯენგიზ იუნდერი გაასხვისეს. „ოლიმპიკი“ გიორგით ისედაც დაინტერესებული იყო. არ არის დავიწყებული „ლიონის“ვარიანტიც, რომელმაც სეზონი მძიმედ დაიწყო. ფრანგული გამოცემა არ გამორიცხავს მიქაუტაძის საფრანგეთიდან წასვლასაც, ყველაზე მეტი კი – ინგლისის პრემიერლიგაში.
ცნობილია, რომ „მეცი“ მიქაუტაძეში 20 მილიონ ევროს ითხოვს, თუმცა „ლიგა 1“-ის საწყის ორ ტურში გოლისა და საგოლე პასის შემდეგ შესაძლოა, მათი მოთხოვნა გაიზარდოს კიდეც.
ავტორი
