გუშინ „ნაპოლის“ სპორტულმა დირექტორმა კრისტიანო ჯუნტოლიმ ხვიჩა კვარაცხელიას შესახებ საინტერესო კომენტარი გააკეთა.
„ფეხბურთელის სიდიადე მოედანზე ჩანს. ვიცით, რომ მიმდინარე სეზონში ძალიან კონკურენტუნარიანი გუნდი ვიყავით, ამიტომ გული გვწყდება, რომ სკუდეტოსთვის ბოლომდე ვერ ვიბრძოლეთ. ნებისმიერ შემთხვევაში ვიბრძოლებთ ამ სეზონში დარჩენილი მიზნების მისაღწევად, მომდევნო სეზონისთვის კი ვეცდებით, შევქმნათ მაღალი დონის და კონკურენტუნარიანი გუნდი“.
ორი დღის წინ ცნობილმა რუსმა სპორტულმა კომენტატორმა და ტელეწამყვანმა დიმიტრი გუბერნიევმა, რომელიც უკრაინაში ომის დაწყების შემდეგ, რუსულ მედიას გაემიჯნა, ხვიჩა კვარაცხელია დიეგო მარადონას შეადარა.
„შესანიშნავია! ხვიჩა „ნაპოლიში“ მარადონას მსგავსად იქნება. მისით ბედნიერი ვარ. მას აქვს შესაძლებლობა ახალი სიმაღლეები დაიპყროს და ევროტურნირებზე ითამაშოს. შეძლებს ის ამას? დიახ, ალბათ შეძლებს, თუ ნაპოლი მას წაიყვანს.“
გუშინ ესპანურმა გამოცემამ „Deportevalenciano“ გიორგი მამარდაშვილს ახალი წერილი მიუძღვნა.
„ასაკისა და იმ პროგრესის გათვალისწინებით, რომლის მიღწევაც შეუძლია, „ვალენსიას“ ჰყავს მეკარე, რომელიც თავის ასაკში მსოფლიოში ერთ-ერთი საუკეთესოა. მისი შეძენა 20 მილიონ ევროდაა შესაძლებელი და ეს ფაქტი უყურადღებოდ ნამდვილად არ უნდა დავტოვოთ. ბიჭი, რომელიც სარეზერვო გუნდში სათამაშოდ მოვიდა, ძირითადი შემადგენლობის წევრი გახდა, თანაც ისე, რომ ამასთან დაკავშირებით, კითხვის ნიშნები არ ჩნდება. მას ყველა მახასიათებელი აქვს იმ კარისდარაჯის, რომელსაც გუნდისთვის ქულების მოუტანა შეუძლია, მის სანაცვლოდ გადახდილი თანხიდან გამომდინარე კი, შესაძლოა, მამარდაშვილის ტრანსფერი „ვალენსიას“ ისტორიაში ერთ-ერთი საუკეთესო იყოს. ქართველი ფეხბურთელის გამოსასყიდი თანხა 20 მილიონი ევროა და მისი ყოველდღიური პროგრესი მიგვანიშნებს, რომ ეს ბევრი ნამდვილად არაა.
„ვალენსიასთვის“ სწორედ ახლა დგას მომენტი, რომ მამარდაზე ფსონს ჩამოვიდეს. ერთი წელი რომ მოვიცადოთ და გიორგი აფეთქდეს, რაც მოსალოდნელიცაა, მასთან კონტრაქტის გახანგრძლივება ძალიან ძნელი იქნება, პარალელურად კი, თანამედროვე სატრანსფერო ბაზრის ფასების გათვალისწინებით, 20 მილიონი ევრო ძალიან ცოტაა. ვრცელდება ჭორები, რომ „ვალენსია“ მამარდაშვილს გაყიდის და შესაძლოა, ეს ამ ზაფხულსაც მოხდეს, მაგრამ პირადად ჩვენ, ვფიქრობთ, რომ გუნდში სხვა იდეა აქვთ და წარმატებული პროექტის მშენებლობაზე ზრუნავენ. ჩვენ მამარდაშვილის სახით ნამდვილი საჩუქარი მივიღეთ და ეს აუცილებლად უნდა გამოვიყენოთ, ოღონდ სპორტულ დონეზე. თუ ხვალ მის გამოსასყიდ თანხად 50 მილიონ ევროს მივუთითებთ და ვინმე გადაიხდის, ეს საერთოდ სხვა ამბავი იქნება, მაგრამ დღევანდელი მდგომარეობით, ფაქტია, რომ გიორგიზე დიდ ფსონს უნდა ჩამოვიდეთ“.
ბუნდესლიგის მორიგ ტურში, „ბაიერნი“ სტუმრად „მაინცს“ დაუპირისპირდა და დამარცხდა – 1:3. ამის შემდეგ კლუბი სკანდალში გახვეული აღმოჩნდა. მარცხის შემდეგ, „ბაიერნის“ თავკაცმა, იულიან ნაგელსმანმა ფეხბურთელებს დასვენების უფლება მისცა და მათი უმრავლესობა იბიცაზე გაემგზავრა. ამას გერმანიაში დიდი გამოხმაურება მოჰყვა.
მომხდართან დაკავშირებით, საკუთარი პოზიცია ლოთარ მათეუსმაც დააფიქსირა და მოთამაშეთა ქცევას „მიუღებელი“ უწოდა.
„მატჩის ასეთ სტილში წაგების შემდეგ, ეს აბსოლუტურად მიუღებელია. რომ მოეგოთ, ვიტყოდი, რომ იბიცაზე 3 დღით დარჩენა შეეძლოთ. ნაგელსმანი რომ ვიყო, უფრო მკაცრ ზომებს მივიღებდი და ასეთი მატჩის შემდეგ, დასვენების დღეებს გავაუქმებდი“.
„ბაიერნის“ სპორტული დირექტორი, ჰასან სალიჰამიჯიჩი უფრო „ლმობიერი“ აღმონდა: – „ფეხბურთელებმა დასვენების დღეებზე იბიცაზე წასვლა თავად მოითხოვეს და სურდათ, გუნდში არსებული გარემო და ურთიერთობები უფრო მაღალ დონეზე აეყვანათ“.
წინა კვირას უიმბლდონის საჩოგბურთო ტურნირზე რუსს და ბელორუსს სპორტსმენებს ასპარეზობა აეკრძალათ. ორი დღის წინ ცნობილმა ესპანელმა ჩოგბურთელმა რაფაელ ნადალმა ეს გადაწყვეტილება გააპროტესტა.
„ვფიქრობ, ეს გადაწყვეტილება ჩემი კოლეგების მისამართით ძალიან უსამართლოა. ისინი არ არიან დამნაშავეები იმაში, რაც უკრაინაში ხდება. ძალიან ვწუხვარ ჩემი კოლეგების გამო. ვისურვებდი, რომ სიტუაცია სხვაგვარად შეიცვალოს. ვნახოთ, რა იქნება მომავალში და როგორ მოიქცევიან თავად მოთამაშეები. როდესაც ხელისუფლება კონკრეტული ქვეყნების მისამართით რაღაც შეზღუდვას აწესებს ყველაფერი გასაგებია, ამ შეზღუდვას უნდა დაემორჩილო. მაგრამ, ამ შემთხვევაში ხელისუფლებამ უიმბლდონს მხოლოდ რეკომენდაცია მისცა, ორგანიზატორები კი უკიდურეს ნაბიჯზე წავიდნენ, იმის მიუხედავად, რომ მთავრობა მათ ამის გაკეთებას არ აიძულებდა“.
ნადალის სიტყვებს გუშინ უკრაინელი ჩოგბურთელი სერგეი სტახოვსკი გამოეხმაურა.
„რაფა, ჩვენ ერთად ვასპარეზობდით და ერთმანეთის წინააღმდეგ გვითამაშია. გთხოვ, მითხარი რამდენად სამართლიანია, რომ უკრაინელი მოთამაშეები სამშობლოში ვერ ბრუნდებიან? რამდენად სამართლიანია, რომ უკრაინელი ბავშვები ჩოგბურთს ვერ თამაშობენ? რამდენად სამართლიანია, რომ უკრაინელები იხოცებიან?“
ავტორი
